Hottentottenaante

Hottentottenaant(e); Hottentottenteeling
Hottentottenaante
Systematik
Ünnerstamm: Warveldeerten (Vertebrata) Klass: Vagels (Aves) Ornen: Gösevagels (Anseriformes) Familie: Aantenvagels (Anatidae) Ünnerfamilie: Echte Aanten (Anatinae) Tribus: Swemmaanten Geslecht: Aanten an sik Oort: Hottentottenaant(e)
Wetenschoplich Naam
Anas hottentota
Eyton, 1822

Eier von de Hottentottenaante

De Hottentottenaante oder Hottentottenteeling (Anas hottentota) is en Aantenvagel ut Afrika. He warrt to de Swemmaanten, un dor nu wedder to de Aanten an sik rekent.

Wie se utsehn deit

Dat Lief vun de Hottentottenaante warrt 30-33 cm lang. Dor is se nich veel grötter mit, as een vun de Dwargaanten. Utmaken kann man ehr an de dunkere Koppkappen, den dunkeren Nacken, de hellbrunen Backen un Kehlen un an den blauen Snavel. An un for sik kann se in de free Natur dör'nanner brocht weern mit de Roodsnavelaante, man bi de fallt de rode Snavel up un se is ok grötter un blasser un hett witte Backen. In'e Luft kann een de Hottentottenaante an ehre ringe Grötte, dat gaue Flegen un an den dunkern Flunkenspegel erkennen. Dat Fedderkleed blifft dat Johr over liek un ok Waart un Aante verscheelt sik nich groot.

Wo se vorkamen deit un wie veel dat gifft

De Regionen in Afrika, wo de Hottentottenaante vorkamen deit, hangt nich tosamen. En Populatschoon leevt for sik in en Rebeet vun'n Norden vun Nigeria over Niger un Kamerun hen bit an den Tschad. Vun düsse Populatschoon is en annere afscheedt dör den Regenwoold un leevt in en breeden Gördel vun Äthiopien bit na de ööstliche Kap-Provinz in Süüdafrika. Un den gifft dat noch en Twieg vun de Aanten, de leevt in Madagaskar. Vunwegen datt düsse Aante meist in'e Schummertied oder in'e Nacht unnerwegens is, is dat swaar, den Bestand rut to kriegen. Dat lett avers so, as wenn düsse Aart allerwegens, wo se vorkamen deit, nich just roor is. In Madagaskar warrt se to de Aantenaarden rekent, de an'n Lac Alaotra an'n fökensten vorkaamt. In Süüdafrika leevt se ok an Staubeckens un grote Veehdobben. Dor vermehrt se sik ok. Alltohopen warrt taxeert, datt in'n Tschad 1.000 bit 5.000 Aanten vun düsse Aart, in Oost- un Süüdafrika 25.000 - 100.000 Exeplare un up Madagaskar 5.000 bit 10.000 Hottentottenaanten leevt.

Wo se leven deit

Hottentottenaanten hoolt sik an'n leevsten an flacke Söötwatermeere un Waterstäen up. Dor söökt se an'n Översuum ehr Freten un hoolt sik meist twuschen de Swemmplanten up. Ok in Zonen mit Reit un Papyrus sünd se faken to finnen. Bi Gefohr versteekt se sik twuschen de Planten. Grote Swarms vun Hottentottenaanten sünd ok buten de Brödeltied man roor. Faken avers leevt se tosamen mit annere Aantenaarden, as de Roodsnavelaante oder de Afrikaansche Dwargaante.

Wat se freten deit

Ehr Freten söcht se an'n leevsten in de Schummertied an Land oder in Feller, as Riesfeller, wenn de unner Water staht. Se bruukt ok Waterstäen, de vun Hoofdeerter bruukt weert un an de ehre Övers dat starke Sporen vun ehre Träe gifft. Ehr Freten finnt se bi dat Grünneln, oder wenn se mit Kopp unner Water dör dat flacke Water lopen deit. Over Dag slöppt se faken up dat Water, man se kummt ok to'n Rohn an Land. Se fritt tomeist Saat un Früchte, man se nümmt ok Warvellose Deerter up. Wenn dat dor noog vun gifft, könnt de ok den grötteren Deel vun ehr Freten utmaken.

Wie se sik vermehrt

De Paare blievt over en langere Tied tosamen. De Waarten blievt ok bi de Aanten, wenn de Küken utföhren deit. Eier vun Hottentottenaanten weert over dat ganze Johr hen funnen. Wohrschienlich is dat de Regen, de in grote Deele vun de Gemarken, wo de Aante tohuse is, de Brödeltied utlösen deit. Se is avers veel mehr Standvagel, as annere Aantenaarden in Afrika un leevt meist an Waters, de over dat ganze Johr hen nich utdrögen doot. Dat Nest warrt in de Plantenzonen langs dat Water boot. Man ok lüttje Inseln, as se tostanne kaamt dör Böme, de in't Water liggen doot oder dör Papyrusblöten, weert bruukt. Dat Nest warrt ut dat Materiol herstellt, wat sik unmiddelbor um dat Nest umto finnen lett. De Eier sünd cremefarvt bit en beten na Geel hen. Normolerwiese weert sess bit negen Eier leggt. Bröden deit bloß man dat Seken. Dat Bröden duert 25 bit 27 Dage. Flegen könnt de Lüttjen denn na 60 bit 65 Dage.

Vun Minschen holen

De eersten levennigen Hottentottenaanten sünd 1929 un 1935 na Frankriek un England henkamen. To'n eersten Mol tücht' wurrn sünd se 1938 in Grootbritannien. In de 1950er un 1960er Johre sünd faken Wildfänge in Europa verkofft wurrn. In düsse Tied sünd se vundeswegen faken vun Privatlüde as Smuckvagels holen wurrn. En Tucht up lange Duer is eerst in de 1960er Johre anfungen wurrn. Hüdigendags gifft dat en stabile Populatschoon vun Hootentottenaanten, de in Geheges nahtücht' wurrn sünd. Zoos wiest jem hen un wenn in ehre Tropenhallen, as de Tierpark Berlin oder de Zoo in Zürich.

Belege

Literatur

• Janet Kear (Rutg): Ducks, Geese and Swans. Oxford University Press, 2005, ISBN 0198546459
• Hartmut Kolbe; Die Entenvögel der Welt, Ulmer Verlag 1999, ISBN 3-8001-7442-1

Kiek ok bi

• List vun Vagels