Amt Bremerhoben

Dat Breemsche Amt Bremerhoben weer en Verwaltungsrebeed un Gericht von de Hansestadt Bremen för Bremerhoben. Dat Leid över dat Amt harr en Amtmann, de ünner den Senaatskommissar för de Havenstäder stünn.

Historie

Dat Amt Bremerhoben is an’n 1. Mai 1827 grünnt worrn, nadem dat Königriek Hannover dat Rebeed an de Münn von de Geest an de Stadt Bremen aftreden hett, ut dat denn Bremerhoben billt worrn is. Dat Amt Bremerhoben hett Opgaven övernahmen, för de in Vesack dat Amt Vesack tostännig weer un in Bremen dat Ünnergericht Bremen.

Mit de Rieksjustizgesetten von 1879 sünd Justiz un Verwaltung trennt worrn. Dat Amt Bremerhoben weer blots noch för de Verwaltung tostännig. För de Justiz is dat Amtsgericht Bremerhoben nee inricht worrn. De Posten von’n Amtmann is to disse Tied nich mehr nee besett worrn. De gröttste Deel von de Opgaven leeg nu bi de Gemeen Bremerhoben un bi dat Amtsgericht. Dat geev keen Bedarf för en utbillten Jurist bi dat Amt. Bet 1895 hett dorüm de Baas von de Polizeiverwaltung dat Leid von dat Amt mit övernahmen. 1895 wull Bremen denn aver wedder mehr staatliche Repräsentanz wiesen, besünners gegenöver de prüüßschen Landrääd ut de Ümgegend.

Mit de Veerte Verordnung över den Neeopbo von dat Riek von 1939 is Bremerhoben Deel von dat prüüßsche Wersermünn worrn un dat Breemsche Amt Bremerhoben is oplööst worrn. De letzte Amtmann, Helmuth Andreas Koch, is 1937 al von de Natschonalsozialisten afsett worrn un sietdem harr dat keen Amtmann mehr geven. De Haven von Bremerhoben is 1939 aver nich mit Deel von Wersermünn worrn. He is 1938 direkt an de Stadt Bremen fullen. In düt Havenrebeed hett dat dat Havenboamt geven, dat 1939 ok Opgaven von de Gemeen övernahmen hett un dorüm in dat Johr ümdöfft worrn is in Hansestadt-Breemsch Amt Bremerhoben. Dat Hansestadt-Breemsche Amt Bremerhoben is 1998 mit dat Havenamt Bremen tohoopgahn un hett denn Hansestadt-Breemsch Havenamt heten. 2002 is dat ganz oplööst worrn un de Opgaven sünd to’n gröttsten Deel von de BremenPorts Management + Services GmbH & Co. KG övernahmen worrn.

Amtlüüd

• 1827–1832: Johann Heinrich Castendyk
• 2. Mai 1832–12. Juli 1850: Johann Daniel Thulesius
• 16. Oktober 1850–1871: Georg Wilhelm Gröning
• 30. Juni 1871–1878: Friedrich August Schultz
• 1878–1895: nüms
• 1895–1901: Friedrich Dommes
• 1901–1912: Caspar Hermann Heye
• 1912–1913: Waldemar Becké
• 1913–1923: Erich von Seelen
• 1923–1937: Helmuth Andreas Koch
• 1937–1939: nüms