Amt Vesack

Dat Amt Vesack weer en Verwaltungsrebeed un Gericht von de Hansestadt Bremen in Vesack. Dat Leid över dat Amt harr en Amtmann, de ünner den Senaatskommissar för de Havenstäder stünn.

Dat Amt dee in’n Noordwesten an dat hannöversche Amt Blomendal grenzen un in’n Oosten an dat hannöversche Amt Leessem. In’n Süüdoosten leeg de Landkreis Bremen un op dat annere Över von de Werser in’n Süüdwesten de ollnbörgschen Ämter Demost un Elsfleth.

Historie

Segelmark von dat Amt

Dat Amt is 1816 grünnt worrn. Dat Amt hett Opgaven övernahmen, för de in Bremen dat Ünnergericht Bremen tostännig weer.

Mit de Rieksjustizgesetten von 1879 sünd Justiz un Verwaltung trennt worrn. Dat Amt Vesack weer blots noch för de Verwaltung tostännig. För de Justiz is dat Amtsgericht Bremen nee inricht worrn. De gröttste Deel von de Opgaven leeg nu bi de Gemeen Vesack un bi dat Amtsgericht. Dat geev keen Bedarf mehr för en utbillten Jurist bi dat Amt. Dorüm hett de Baas von de Polizeiverwaltung dat Leid von dat Amt mit övernahmen.

Vermögensverwaltung, Bo-, Füür- un Mellpolizei sünd 1909 an de Gemeen övergahn. 1938 is dat Amt kumplett oplööst worrn.

Amtlüüd

• 1816–1836: August Christian Wilmanns
• 7. September 1836–1850: Gustav Conrad Kulenkamp
• 3. Februar 1851–1879: Hermann Franz Friedrich Droste
• ~1904/1908: Polizeikommissär Friedrich Ludwig Kassau
• ~1926: Polizeihauptmann Karl Herbst