Amos Burn

Amos Burn (* 31. Dezember 1848 in Kingston upon Hull; † 25. November 1925 in London) weer en engelsch Schachmeester, de Ennen vun dat 19. Johrhunnert to de best Spelers vun sien Land hörrn de.

Dat Speel hett he eerst mit 16 Johr lehrt un anfangs hett he ok blots bi lokale Turniere mitmakt, de he aber meest wunne hett. To'n Berop wull he dat aber nich maken, wiels hüm dat to unseker weer. He hett denn Koopmann lehrt. Wiels he völ un lang in't Utland muss, geef dat immer mal mehrjohrig Pausen bi sien Uptreden in de Turnierarena.

1886 hull he Wettkämpe tegen Henry Edward Bird (9:9) un George Henry Mackenzie (4:4 bi 2 Remisen) unentschieden. Sien eersten international beachtet Turniererfolg kreeg he dör sien mit Isidor Gunsberg deelt Sieg in London 1887, vör Joseph Henry Blackburne un Johannes Hermann Zukertort. 1889 wunn he dat Turnier in Amsterdam vör de latere Schachweltmeester Emanuel Lasker un wurr in Breslau Tweeter achter Siegbert Tarrasch. Sien gröttsten Spood harr he 1898 in Köln as he de Düütsch Schachkongress (düütsch Meesterschap) wunnen hett un Rudolf Charousek, Wilhelm Steinitz, Michail Tschigorin un Carl Schlechter achter sück leet.

Dornah nehm sien Speelstärke kontinuierlich af un Turniere kunn he nich mehr winnen. 1912 is he to'n letzten Mal antreden un keem in Breslau up Platz 12. He hett denn bit to sien Dood de Schachkolumne in de Zeitung The Field leit.

Burn weer kien agressiven Speler un bevorzug eher en defensiven Stil. He weer en Anhänger vun dat Positschoonsspeel.

Nah hüm is en Variante in de Franzöösch Verteidigung nöömt, de nah de Tüüg 1. e2-e4 e7-e6 2. d2-d4 d7-d5 3. Sb1-c3 Sg8-f6 4. Lc1-g5 d5xe4 entsteiht.

Sien best Historsch Elo-Tall weer 2728 in Oktober 1900.

Literatur

Richard Forster: Amos Burn, a chess biography. McFarland, Jefferson 2004. ISBN 0-7864-1717-X