Alejandro Vernon
Alejandro Vernon (* 17. Januar 1937 in Punta Gorda) is en belizeschen Politiker.
Leven
[ännern | Bornkood ännern]Vernon is 1937 as Söhn von Isabel Arias Vernon un den Politiker Samuel „Sam“ Vernon in Punta Gorda, Brietsch-Honduras, boren.[1] Na sien Vader is he ok Samuel Vernon Jr. nöömt worrn. Op Engelsch warrt sien spaanschen Vörnaam Alejandro fakener ok mit Alexander weddergeven. Vernon güng von 1945 bet 1951 op de St. Peter Claver School in Punta Gorda un von 1951 bet 1954 op de St. John's College High School in Belize-Stadt.[1] Von 1954 bet 1961 hett he in Guatemala leevt un dor ünner annern in de Tourismusindustrie arbeidt.[1] He weer an dat Centro Internacional de Adiestramiento de Aviación Civil in Mexiko-Stadt un hett sik dor to en Flegerloots utbillen laten.[1]
Vernon hett 1965 Iris Paulino freet.[1]
Politik
[ännern | Bornkood ännern]Nadem he 1961 na Brietsch-Honduras trügg is, weer he in de People’s United Party (PUP). He is 1963 Stadtraad in Punta Gorda worrn un hett 1965 bet 1968 un 1970 bet 1973 dat Amt as Börgermeester övernahmen.[1] Bi de Parlamentswahl in Brietsch-Honduras 1965 kunn he sik in’n Wahlkreis Toledo Noord mit 41,5 % von de Stimmen nich gegen Edwin Morey von de National Independence Party dörsetten. Vernon is denn aver bi de Wahl 1969 in’n Wahlkreis Toledo Noord mit 53,0 % von de Stimmen in dat Repräsentantenhuus wählt worrn un hett sik dorbi gegen Edwin Morey dörsett. Bi de Wahl 1974 kunn he sik in’n Wahlkreis Toledo Süüd mit 41,9 % von de Stimmen nich gegen Charles Wagner von de United Democratic Party (UDP) dörsetten.
Nadem Vernon ut de PUP rutflagen is, hett he 1976 sien egen Partei grünnt, de Toledo Progressive Party (TPP). De Partei dee sik in’n Grenzkunflikt twüschen Belize un Guatemala för Guatemala insetten. 1975 harrn Guatemala un Grootbritannien (as Koloniaalmacht in Belize) Truppen an de Grenz tohooptagen. Bi de Parlamentswahl 1979 weer Vernon denn för de TPP Kannedaat in’n Wahlkreis Toledo Noord. He hett aver blots 4,0 % von de Stimmen kregen un is op’n drüdden Platz kamen. Wunnen hett den Wahlkreis Basilio Ah von de UDP. 1981 is Belize unafhängig un internatschonaal in siene Grenzen anerkannt worrn. För Guatemala weer dat en groten Rüggslagg in’n Grenzkunflikt. De TPP harr dormit ehr Ziel verfehlt. De Partei hett sik restruktureert un hett denn Toledo Popular Party heten. Vör de Wahl 1989 hett sik de TPP de PUP anslaten.
Ehren
[ännern | Bornkood ännern]In Punta Gorda gifft dat en Alejandro Vernon Street.
