Al Kaida

Vun Wikipedia
Wesseln na: Navigatschoon, Söök

Al Kaida, ok al-Qaida (araabsch: القاعدة al-qāʿida [[alˈqaːʕɪda]]) is en Nett vun verscheden musliemsche Gruppen, tomeist vun den Twieg vun de Sunniten, de den Dschihad (Hillgen Krieg) gegen ehre Fienden föhren wüllt. Se snackt woll mit’nanner, man hangt bloß man locker tohopen. Unner annern warrt jem vörsmeten, se harrn Ansläge in Kenia, Tansania, up de Al-Ghriba-Synagoog up de Insel Djerba, up Sharm El-Sheikh an’n 23. Juli 2005 un sunnerlich de Terroranslääg vun'n 11. September 2001 in de USA utöövt. Al Kaida warrt unner annern vun den düütschen Verfassungsschutz[1] un vun de USA[2] to de övernatschonalen Terrorgruppen torekent. För düsse Aart vun Terrorismus gellt se dor as „Prototyp“ bi.

Wat de Naam bedüden deit un wie he schreven un utspraken warrt[ännern | Bornkood ännern]

De Naam Al Kaida warrt faken översett as „de Grundlaag“. Man dat araabsche Woort qāʿida kann ok noch „Regel“, „Fundament“, „Datenbank“ un „Butenstäe“ bedüden, dorto ok noch „de, de sitten deit“. Bitherto warrt de Naam ganz verscheden schreven. In’n Duden steiht „Al Kaida“ mit „al-Qaida“, man hauptsächlich ok „El Kaida“. In de düütschen Dagblöer is ok noch „al-Kaida“ to finnen un „al-Qaeda“ (so steiht dat faken ok in de US-Press). In de Nahrichtenagenturen in düütsche Spraak hefft se sik midderwielen up de Schrievwiese „Al Kaida“ eenigt.[3]. De Grund för düsse velen Schrievwiesen liggt dor in, dat de araabsche Schrift sik nich so eenfach na de düütsche röver setten lett, tomalen dat den eersten Bookstaven Qaf in de (platt-)düütsche un engelsche Spraak nich gifft.

Nich bloß dat Qaf, man ok dat Ain gifft dat in de plattdüütsche Spraak nich un so kriegt Lüde, de nich mit dat Araabsche groot wurrn sünd, dat meist nich hen, de Bookstaven richtig ut to spreken. In’n Groten un Ganzen is to seggen, dat dat „q“/ „k“ as en düütsch k utspraken weern mutt un dat de beiden Bookstaven „a“ un „i“, de denn kaamt, tohopentrocken weert to en Tweeluut. Dor is avers dat „a“ lang bi ut to spreken un dat „i” kort. Amenne höört sik dat denn an, as “al Kaaida” oder “al Kaaeda”, de Toon liggt up dat “a”.

Upbo vun Al Kaida[ännern | Bornkood ännern]

De Verfassungsschutz meent, dat Al Kaida hüdigendags keen Grupp mehr is, de alltohopen vun en Baas, as Osama bin Laden oder Aiman az-Zawahiri anföhrt warrt. Dat weer nich mehr mööglich, vunwegen dat se in de ganze Welt achter düsse Gruppen ran sünd. He seggt, Al Kaida weer en „virtuelle Grupp, de de Lüde, de nu just wat anstellen doot, anstött“.[4] Ok annere Lüde, de sik dor mit befaten doot, meent, Al Kaida weer dat grote Dack, wo sik allerhand meist unafhängige Gruppen unner tohopenfinnen könnt. Düsse Gruppen stimmen in de Ideologie övereen un ok in dat, wo se up to wollen. Düt „Nett sunner Anföhrers“ [5] is över dat ganze Land hen mit lüttje Gruppen verstreiht. Dat gifft keen Befehlskeden un keen Verteeknissen vun de Liddmaten. Vundeswegen kann de Polizei un de Geheemdeenst dor bloß swaar rankamen un sik dor man slecht twuschenmengeln.

Düsse Gruppen sünd man tämlich unafhängig vun’anner, man as ehrn gemeensamen Kopp is bit to sien Dood an'n 1. Mai 2011 jummers noch Osama bin Laden ut Saudi-Arabien ankeken wurrn. Vordem weer al mol seggt wurrn, he weer bi den Krieg in Afghanistan 2002 ümkamen, man dat stimm nich, vunwegen dat he sik mellt hett up Videofilmen, de 2004, 2007 un 2009 utstrahlt wurrn sünd.

Liddmaten[ännern | Bornkood ännern]

Grünnt hett de Grupp Osama bin Laden. To de annern Anföhrers hefft düsse Lüde tellt, oder tellt dor jummers noch to:

Annere bekannte Liddmaten sünd (ween):

Achtergrund[ännern | Bornkood ännern]

De Naam „Al Kaida“ stammt woll vun den Dschihad-Theologen Abdallah Azzam vun her. In’n April 1988 hett Azzam in de Tiedschrift „al-Dschihad“ upropen, nu möss en „dannige Grundlaag“ (araabsch al-Qaida al-sulba) tostanne bröcht weern. Al vun’n Anfang vun de 1980er Johren harr Azzam versöcht, vun Pakistan ut de Mujahedin in Afghanistan in ehren Krieg gegen de Sowjetunion to hölpen. He hett dor Geld un Lüde för tohopenbröcht. Vun 1984 af an weer bin Laden dor mit bi. Stütt hefft se dormols vun annere islaamsche Länner kregen, man dortieds ok noch vun den Geheemdeenst vun Pakistan un vun de USA. Amenne güng dat dormols gegen de Sowjets ehren Kommunismus. Azzam hett sik dormols de Lehr infallen laten vun dat „Verdeffenderen vun musliemsche Gemarken as den Muslim siene persöönliche Plicht“ (so hett en vun siene Böker ut dat Johr 1984 heten). Düsse Plicht hett nich bloß för den Striet gegen nich-musliemsche Regeerungen gollen, man ok gegen Fienden vun buten, as in Afghanistan. Azzam stamm vun Palästina her un so hett he toeerst mol dacht an Afghanistan un an Palästina, man in sien Wark vun 1984 hett he ok snackt vun de Philippinen, de Gemarken vun Kaschmir, vun den Libanon, vun den Tschad un Eritrea. In all düsse Länner scholl jedeen Moslem siene Plicht doon un to de Wapen griepen. Ok hett he den Dood as Marteler sunnerlich rutstellt un de Theorie vun den Sülvstmordanslag up’e Been stellt. Bin Laden hett nich lang bruukt, denn füng he an, en unafhängigen Kriegstrupp vun Arabers up to stellen. De stünnen denn nich mehr direktemang unner de Mudschahedin ehr Kommando. Later hett he sunnerlich gegen de Amerikaners in siene Heimat Saudi-Arabien streden. Kriegslüde vun de Al Kaida hefft an’n Anfang vund e 1990er Johren ok bi den Krieg in dat vörmolige Jugoslawien mitmaakt.

Belegen[ännern | Bornkood ännern]

  1. verfassungsschutz.de: Verfassungsschutzbericht 2005 Anfang 2006
  2. USA-List vun de Terrorgruppen vun’n 11. Oktober 2005 afropen an’n 11. Oktober 2006
  3. Agenturjournalismus.de: Einzelbegriffe afropen an’n 1. August 2008
  4. Verfassungsschutzbericht 2005, S. 199
  5. Hoffman, Bruce, Terrorismus – der unerklärte Krieg, Bonn 2006, S. 77