Abwärts (Film)
| Filmdaten | |
|---|---|
| Plattdüütsch Titel: | — |
| Originaltitel: | Abwärts |
| Düütsch Titel: | Abwärts |
| Produkschoonsland: | Düütschland |
| Johr vun’t Rutkamen: | 1984 |
| Originalspraak: | Düütsch |
| Öllersfreegaav in Düütschland: | FSK 16 |
| Filmkru | |
| Speelbaas: | Carl Schenkel |
| Dreihbook: | Carl Schenkel Frank Göhre |
| Produkschoon: | Matthias Deyle Thomas Schühly |
| Musik: | Jacques Zwart |
| Kamera: | Jacques Steyn |
| Snitt: | Norbert Herzner |
| Dorstellers | |
| |
Abwärts (op plattdüütsch so veel as „Afwarts“) is de Titel vun en düütschen Thriller ut dat Johr 1984, bi den Carl Schenkel Speelbaas weer. In den Film geiht dat üm veer Lüüd, de in en Fohrstohl inslaten sünd, de aftostörten drauht.
Inholt
[ännern | Bornkood ännern]In en Frankforter Bürohoochhuus blifft an en Freedagavend de Fohrstohl steken, as en bi Arbeiten vergetenen Schruventrecker in’n Fohrstohlschacht dör de Vibratschonen rünnerfallt un den Sicherungskasten tweimaakt. In de Kabien sitt veer kumplett ünnerscheedliche Lüüd fast: Jörg, de för en Warfünnernehmen arbeit un sik sülvt as düchtig sppodriek dorstellt, sien attrktive un ehrgiezige Kollegin Marion, Pit, de nich veel vun sellschoppliche Normen hollt, as ok de biedere Bookholler Gössmann.
Wegen de vöhrigen Boarbeiten is de Alarm afstellt worrn, so dat an de Poort vun den Vörfall keeneen warrt markt. De Insaltenen mööt also eertmol mit jemehr Laag un sik sülvst kloorkamen. Gau entwickelt sik Arger twüschen Jörg un Pit, de sik vun jemehrn Charakter wegen nich vergahn künnt, man ok vun wegen dat Pit un Marion mitenanner anbannelt, de kort vörher noch wat mit Jörg an’t Lopen harr. Liekers doot se jemehr Kräft tosamen, üm ut’n Fohrstohl ruttokamen. Veel Spood hebbt se dormit aver nich. As jemehr Arger wedder hoochkaakt kummt dat op’t Dack vun de Kabien to en Kamp twüschen de beiden. Pit stört dorbi vun’t Dack af un rutscht den Schacht rünner, in den he an en Reep swoorbesehrt hangen blifft. Ut egen Kraft mutt he sik later wedder hoochtehn
Man, ok de torüchholern Gössmann hett sien lütt Geheemnis. Dat kummt rut, as sien Aktentasch rünnerfallt un apen geiht: De Tasch is neemlich randvull mit Geld, dat he jüst vun sien Firma klaut hett, vun wegen dat he as ollen Macker dor keen Tokunft mehr hett un bald op sien Kündigung töövt. Opletzt markt de Pörtner doch noch, dat en Alarm anwiest warrt un röpt na den technischen Nootdeenst (Heinz un Otto). Bi den Versöök, den Fohrstohl mit’n Helpsmotor na baven to fohren, verhaakt sik en Metallstück twüschen Kabien un Wand, dat bi den Kamp rünner fallen is. De mechaansch Belasten hollt dat Drahtseel nich ut un fangt an to rieten, de Kabien suust eenige Stockwarken daal, vördem de Technikers den Fall ophollen künnt. Jem is kloor, dat de Fohrstohl bald kumplett afstörten deit. As weer de Düvel achtern jem ran, loopt se de Treppen rünner, un teht de Lüüd enkelt mit’n Kladdergeschirr ut de Kabien rut. Marion, Pit un Gössmann künnt in letzte Minuut noch reddt warrn, man Jörg stört opletzt mit den Fohrstohl af, vun wegen dat he de Tasch mit dat klaute Geld vun Gössmann nicht torüchlaten will.
As de Nootfalldeenst un de Polizei ankamen sünd, warrt Pit in’t Krankenhuus bröcht. Gössmann warrt, as he ut dat Hoochhuus rutgahn will, vun’n Pörtner ophollen. He verjaagt sik so dull, dat he sien Tasch fallen lett, de dorophen apen geiht. Man, an Steed vun dat klaute Geld fallt sien Wäsche ut de Tasch – he geiht ahn Geld na Huus, wiel de Sarg mit de Liek vun Jörg wegbröcht warrt.
Kritiken
[ännern | Bornkood ännern]De Film is in’t Kino dormols bi de Tokiekers un ok bi’n gröötsten Deel vun de Kritikers goot ankamen. Ofschoonst to’n Deel kritiseert weer, dat sik de Figuren to klischeehaft verhollen doot un se nich veel Deep wiesen, weer de Meenung ünnern Streek, dat Abwärts en handwarklich soliden Thriller weer, de sik goot in dat vun’t US-amerikaanschen Kino prägte Genre meten künn.
Utteken
[ännern | Bornkood ännern]Abwärts is mit söven renomeerte Filmpriesen uttekent worrn:
- 1984: mit den Caixa de Catalunya vun’t Katalaansch Internatschonal Filmfestival in de Kategorie Best Speelbaas för Carl Schenkel
- 1984: mit den Pries vun de internatschonalen Kritiker-Jury vun’t Katalaansch Internatschonal Filmfestival för Carl Schenkel
- 1985: mit den Düütschen Filmpries in de Kategorie Rutragend Schauspeler för Götz George
- 1985: mit den Düütschen Filmpries in de Kategorie Rutragen Kameraarbeit för Jacques Steyn
- 1985: mit den Bayerischen Filmpries in de Kategorie Best Speelbaas för Carl Schenkel
- 1985: mit den International Fantasy Film Award vun’t Fantasporto in de Kategorie Best Speelbaas för Carl Schenkel
- 1985: mit den Tokiekerpries vun’t Fantasporto för Carl Schenkel
Anners wat
[ännern | Bornkood ännern]De Film weer an verscheden Öörd dreiht: De Opnahmen vun’t Hoochhuus weern in’n Silver Tower vun de Dresdner Bank in Frankfort an’n Main dreiht, wiel de Binnenopnahmen vun den Film in’t Europääsche Patentamt in München maakt worrn sünd.
Marion, de eenzige Fro in’n Fohrstohl, weer vun de nedderlännsche Renée Soutendijk speelt. Se weer later vun Hannelore Elsner synchroniseert.
Weblenken
[ännern | Bornkood ännern]- Abwärts in de Internet Movie Database (engelsch)