28 Days
| Filmdaten | |
|---|---|
| Plattdüütsch Titel: | — |
| Originaltitel: | 28 Days |
| Düütsch Titel: | 28 Tage |
| Produkschoonsland: | USA |
| Johr vun’t Rutkamen: | 2000 |
| Läng: | 100 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Betty Thomas |
| Dreihbook: | Susannah Grant |
| Produkschoon: | Celia D. Costas Jenno Topping |
| Musik: | Richard Gibbs |
| Kamera: | Declan Quinn |
| Snitt: | Peter Teschner |
| Dorstellers | |
| |
28 Days (op Platt so veel as „28 Daag“; dt.: 28 Tage) is de Titel vun en US-amerikaansch Filmdrama vun Betty Thomas ut dat Johr 2000. De Hööftrull hett Sandra Bullock speelt.
Inholt[ännern | Bornkood ännern]
Gwen Cummings arbeit as Journalistin in New York City. Se is’n geern seen „Partymuus“ un sütt ehr Leven tohopen mit ehrn Fründ Jasper as en eenzig lang Fest mit Alkohol- un Kokainorgien ahn Enn.
Een Morgen waakt se na en dörsopen Nacht op un kummt to laat to de Hochtiet vun ehr Süster. Dor op de Fier suppt se wieter un is wedder mol afsluut ut de Kehr un lannt denn ok noch in de Hochtietstort, as se dat Gliekgewicht verlütt. Üm den Schaden uttoglieken will se en ne’en Koken köpen un stiggt besopen in de Hochtietslimousien. Op de Fohrt verlütt se aver de Kontroll över dat Auto, neiht dör en Goorntuun, rammt en Wahnhuus un warrt insparrt. In de Naklapp warrt se to 28 Daag Gefängnis veroordeelt, de ümwannelt warrt in en 28 Daag lang Afwennkuur in en Zentrum för Suchtkranke, woneem se vun ehr Sucht loskamen schall. Dor mutt se mit en Reeg vun Regeln kloor kamen, as to’n Bispeel dat Singen mit de annern Patienten tosamen, dat afslute Handyverbott un so wieter. Natürlich hett se dat eerst swoor sik in de Klinik torecht to finnen, aver mit de Tiet frünnt se sik mit eenige vun de Patienten an. So to’n Bispeel de 17-johrige Andrea, mit de se sik en Slaapruum deelt. Andrea is afhangig vun Heroin. An den Dag vör den se rutlaten warrn schall kummt se aver an Drogen ran un starvt in de Nacht an en Överdosis.
To’n Anfang warrt Gwen in dat Zentrum regelmatig vun ehrn Fründ Jasper besöcht, de ehr heemlich mit Alkohol un Tabletten versorgt. Mit de Tiet begrippt Gwen, dat se so nich wietermaken kann un lehnt dat af, wieter versorgt to warrn. Sünners ok, as Jasper ehr en Andrag maken deit un se den Champagner, den he dorför mitbröcht hett, wegkippt. Wiel de Therapie verkiekt se sik in den sex-, drogen- un alkoholsüchtigen Baseballspeler Eddie Boone. Liekers, dat Gwen mehrfach gegen de Regeln vestött un ok kort dorvör is, rutsmeten to warrn un in’t Gefängnis to gahn, kann se opletzt de Afwennkuur mit Spood afsluten. As sik jemehr Weg denn splitt, gifft Eddie ehr den Raat, sik vun Jasper to scheden, vun wegen dat he nich goot is för ehr. In de Twüschentiet hett sik Gwen mit ehr Süster utsnackt un sik wedder mit ehr verdragen. Se winnt annere Ansichten över dat Leven, as se dat vör de Therapie harr un wohrhaftig maakt se mit Jasper Sluss, as de wedder anfangt ehr op Partys un Drinkorgien mitnehmen to wullen. Se warrt gewohr, dat Eddies Oordeel över Jasper richtig weer.
Kritiken[ännern | Bornkood ännern]
Lexikon vun’n internatschonalen Film: Ein ganz auf Sandra Bullock zugeschnittener, inszenatorisch uninspirierter Star-Film, der nie die Balance zwischen Komödie und Problemfilm findet.
James Berardinelli schreev op 'ReelViews', dat de Film dat Bild vun’n Alkoholismus ut de 'Hollywood-Sicht' beschönigt wiesen de. He meen, Sandra Bullock de veel to goot utsehn för den Tyyp vun en alkoholkranke Fro un dat ehr Dorstellen 'flach' ('flat') un 'nich charismaatsch' ('uncharismatic') weer.
Roger Ebert kritiseer in de 'Chicago Sun-Times' vun’n 14. April 2000 de Dorstellen vun Steve Buscemi. He schreev, Sandra Bullock wies in’n Film en 'böverflachige Besehrborkeit'.
Achtergrund[ännern | Bornkood ännern]
Üm sik för de Dreiharbeiten to rüsten hett Sandra Bullock eenige Tiet in en Rehabilitatschoonsklinik tobröcht. Vör jede Szeen, in de se in de Rull ahn Kontroll tattern schüll, hett se en dreefachen Espresso drunken. De meisten künstlerischen Arbeiten, de bi de Diskusschoonsrunnen in de Grupp in’n Achtergrund to sehn sünd, weern wohrhaftig vun Reha-Patienten maakt.
In de düütschen Synchroniseren is Sandra Bullock in dissen Film vun Nana Spier an Steed vun ehr Bettina Weiß snackt worrn, de normalerwies ehr Faststimm is.
Weblenken[ännern | Bornkood ännern]
- 28 Days in de Internet Movie Database (engelsch)
- Kritiken to 28 Days op Rotten Tomatoes