Steffi Graf

Vun Wikipedia
Wesseln na: Navigatschoon, Söök
Steffi Graf 2008 in Tokyo

Stefanie Maria Graf (* 14. Juni 1969 in Mannheim), beter bekannt as Steffi Graf, is en ehmolige düütsche Tennisspelersche, de in ehr Profi-Loopbahn tosamen 22 Grand-Slam-Turneren wunnen un 377 Weken lang op Platz 1 vun de Tennis-Weltranglist stahn hett. In’t Johr 1988 hett se all veer Grand-Slam-Turneren wunnen un dorto noch de Olympschen Spelen, un hett so as opstunns eenzige Person den Golden Slam wunnen.

Biografie[ännern | Bornkood ännern]

De 1970er Johren[ännern | Bornkood ännern]

Steffi Graf weer jüst mol dree Johr oolt, as se in ehr Heimatgemeen int baadsche Brühl 1973 to’n eersten mol en Tennissläger anfaat hett. Op den Gedanken hett ehr ehr Vadder Peter Graf bröcht. De harr as Versekerungskoopmann un Bruuktwagenhännler arbeidt, bit he in’t Öller vun 27 Johren den Tennissport för sik opdeckt hett. In wenige Johren hett he bit in de Regionalliga opstegen un hett gliektietig ok en Diploom as Tennistrainer maakt. Fröh is em dat motoorsche Talent vun sien Dochter opfallen, un füng dormit an, dat mit jümmer sworere Opgaaven na un na to föddern. Twee Johr later hett Steffi bi dat traditschonelle „Jüngsten-Turneer“ in München wunnen. As Sövenjohrige hett se wietere Turneren wunnen. Vun wegen dat Peter Graf vun dat Utnahmtalent vun sien Dochter övertüügt weer, hett he twee Johr later all sien Beropen opgeven un sik denn blots noch üm sien Dochter un ehr sportliche Loopbahn sorgt.

1980–1986: Opstieg[ännern | Bornkood ännern]

In’t Johr 1981 hett Steffi Graf dat eerste mol an de düütschen Hallenmeesterschoppen för de Utwassenen deelnahmen un hett dor Opsehn maakt. De dormolige Weltranglisten-Achtigste Eva Pfaff hett dree ümkämpt Sätz bruukt, üm gegen ehr to winnen. Dat Speel vun de Ölvenjohrigen hett sik dorbi vör allen dör Snelligkeit op’n Platz uttekent un dör en harde Vörhand, mit de de dat junge Deern jümmer wedder henkregen hett, dat Speel to bestimmen. In de düütschen Fackpress is se dorüm to de Tiet mit Respekt as „Wunnerkind“ betekent worrn. De dormolige Bundstrainer Klaus Hofsäss hett op Anfraag hen seggt, dat Graf dat gröttste Talent weer, dat dat in Düütschland je geven hett. Binnen ehr egen Öllersklass weer se weltwiet ahn Konkurrenz.

Dat Johr dorop hett se as Dörteihnjohrige de Düütschen Jöögdmeesterschoppen vun de Achteihnjohrigen wunnen. An’n 18. Oktober 1982 is de junge Düütsche mit dörteihn Johren un veer Maanden bi de WTA as Profispelersche mellt worrn. Vadder und Dochter kregen vun wegen den ungewöhnlich fröhen Instieg in’n Profisport Kritik, man ok Tostimmen. Vele Facklüüd un Trainers harrn de Sorg, dat Steffi dordör gau physisch un mental utbrennen künn. Man Steffi Graf is dor mit de Wöör gegenan gahn: „Ik will dat aver so!“ Een Week later is Graf to’n eersten mol in de Weltranglist föhrt worrn, an Steed 214. Se weer dormit toeerst de jüngste Spelersche, de jemols in’t Ranking opduukt is.

Ehr eerste Profiturneer weer dat Hallenturneer in Filderstadt. In de eerste Rund drööp se op de twintigjohrige ehmolige Weltranglisten-Eerste Tracy Austin, de mit 4:6 un 0:6 klor winnen künn. Austin weer sülvst mol as Wunnerkind fiert worrn un weer de jüngste Winnersche vun de US Open. Se segg dormols in’n Rahmen vun’n jümmer duller warrn Rummel üm Steffi, dat dat in de USA Hunnerte vun Deerns geev, de de glieken Anlagen harrn.

1983 speel Steffi Graf eerstmols bi de French Open in Paris mit un keem dor in de tweete Rund. Liekers dat se teemlich fröh utscheedt is, hett sik de Fackwelt wieter Acht geven op de junge Düütsche. Grafs ungewöhnlich hard slahn Vörhand hett dormols eerste Anstalten na sik togen, ehr Speel technisch to ünnersöken. Facklüüd hebbt meent, dat Graf de beste Dörteihnjohrige weer, de bit dorto je in’n Tennissport mitmaakt hett. An’t Enn vun’t Johr weer Graf al op Platz 98 vun de Weltranglist opstegen. Mit en Sünnerverlööfnis vun de Regeren vun’t Land Baden-Württemberg hebbt Vadder un Deern beslaten, dat Steffi vun de Realschool afgeiht.

1984 stünn Graf to’n eersten mol in’t Achtelfinale vun de Australian Open un vun Wimbledon. Op den so nöömten „Hilligen Rasen“ an de Churchroad hett de britsche langjohrige Spelerin Jo Durie all ehr Kräft bruukt, üm de dormols Föffteinjohrige in’n drüdden Satz mit 9:7 to slahn. Kathleen McKane Godfree, en 88-johrige tweemolige Wimbledon-Winnersche vun de 1920er Johren, de ünner de Tokiekers weer, weer övertüügt dorvun, dat Steffi Graf twee Johr later blots noch swor to slahn weer.

Disse Ansicht schien sik över’t Johr to bewohrheiten. Blots en poor Weken later hett Steffi Graf bi dat as Schauveranstalten dörföhrte Olympsche Turneer in Los Angeles wunnen. De Düütsche weer je jüngste ünner de Deelnehmers. In’n Harvst hett se bi’t Turneer in Filderstadt mit Claudia Kohde-Kilsch in’t Veerdelfinale to’n eersten mol en Top-Ten-Spelersche slahn un stünn to’n eersten mol in dat Finale vun en WTA-Turneer. An’t Enn vun’t Johr stünn Graf al op Platz 22 vun de Weltranglist.

De Opstieg güng 1985 wieter. In Paris un in Wimbledon stünn se beide molen in’t Achtelfinale. An’t Johresenn weer Steffi de Sösste in de Weltranglist – ahn dat se een Turneer wunnen harr. Dat Johr füng ahn de Australian Open an. Ehr Vadder, Peter Graf, harr ehr seggt, se schull dor nich mitmaken. Dordör schüll Steffi beter ehr Kräften schonen un lever an’t Verbetern vun ehr spelerisch Talent arbeiden. In Miami bi’t Sandplatzturneer drööp Graf in’t Halffinale dat eerste mol op de beste Grundlienenspelersche vun de Tiet, de Weltranglisten-Tweete Chris Evert, de se aver nich slahn künn. In’n Verloop vun’t Johr hebbt de beiden sik noch dree mol gegenöverstahn, wobi Evert noch dat betere Speel harr. Ok in Wimbledon keem Graf wedder in’t Achtelfinale, woneem se aver knapp gegen de Veerte in de Weltranglist, Pam Shriver, verloren hett. Man, ehr Künnen op de gauen Plätz hett sik al andüüt. Bi de US Open in Flushing Meadows künn se to’n eersten mol in dat Halffinale vun en Grand-Slam-Turneer intehn. Dor is dat Wunnerkind Graf to’n eersten mol op Martina Navrátilová darpen, de tosamen mit Chris Evert siet Anfang vun de 1980er Johren dat Welttennis bi de Fronslüüd domineert hett. Navrátilová hett dat Speel mit 6:2 un 6:3 wunnen, hett op Nafraag aver jümmer wedder seggt, dat Steffi Graf allens harr, üm ganz bit na baven to kamen, wenn se free vun Sehren bleev.

Al 1986 hett sik dat ok wiest. Graf hett dat Johr över acht Turneren wunnen un verbeter sik bit to’t Johresenn op den drüdden Platz vun de Weltranglist. Se harr nu blots noch de beiden US-Amerikanersches Evert un Navrátilová vör sik. Bi de Hardplatzturneren in’t Fröhjohr keem dat wedder to en Tosamendrapen mit Chris Evert, de beide Finalspelen klor winnen künn. Man kort later hett sik de Wind dreiht. Noch jümmer 16-johrig hett Graf dat Sandplatzturneer in Hilton Head wunnen. Se wunn över Evert mit 6:4 un 7:5 un harr dormit nu dat eerste mol en Turneer bi de Profi-Spelers wunnen. En wieter’t achtbor Tosamendrapen geev dat bi’t Vörbereiden op dat tweete Grand-Slam-Turneer vun dat Johr vun Paris bi de German Open in Berlin. In’t Finale stünnen sik to’n drüdden mol Steffi Graf un de Weltranglisten-Eerste Martina Navrátilová gegenöver. Ahn dat dor een mit rekent harr, hett Graf dat Match mit 6:2 un 6:3 wunnen, un Navrátilová wies sik denn ok emotschonal teemlich mitnahemn bi disse eersten Nedderlaag gegen de junge Graf. Later keem Graf ok in dat Halffinale vun de US Open, woneem se wedder gegen Navrátilová to spelen harr. Dat ümkämpt Speel güng knapp an de Amerikanerin. Un noch eenmol kemen de beiden in dat glieke Johr tosamen bi de sik ansluten Hallensaison, as se sik bi de Virginia-Slim-Meesterschoppen drapen deen. Ok dor hett Steffi Graf verloren. An’t Johresenn stünn Graf wieter op Rang 3 vun de Weltranglist.

1987: De Dörbrook[ännern | Bornkood ännern]

Dat Johr 1987 hett den Dörbrook för Steffi Graf bröcht un stünn ganz in’t Teken vun’t Duell mit de Martina Navrátilová. Bi 75 Matches, hett Graf blots twee verloren. Se künn ölven Turneren för sik entscheeden, hett to’n eersten mol bi en Grand-Slam-Turneer wunnen un steeg an de Spitz vun de Tennis-Weltranglist.

As in’t Vörjohr hett de 17-johrige dat eerste Grand-Slam-Turneer in Australian utlaten, üm de Tiet to’t Verbetern vun ehr Speel to nütten. Se hett ehr Vörhand, noch en lütt Stück harder maakt, de denn to’n besten Slag in’t Fronstennis worrn is. Graf künn dormit dat Speel meist so bestimmen, as se dat geern wull. In disse Tiet weer Steffi Graf in de Medien ok faken as „Fräulein Vorhand“ oder „Gräfin Gnadenlos“ betekent. Mit söven wunnen Turneren un 45 wunnen Matches in en Reeg hett se een vun de längsten Winn-Regen överhaupt in’t Frons-Tennis opstellt un togliek den besten Saisonanfang. Graf ehr Dörmarsch füng invt Fröhjohr op de amerikaanschen Hardplätz in Boca Raton an. In dat nafolgen Turneer vun Key Biscayne hett se to’n eersten mol in dat sülve Turneer de Weltranglisten-Eerste, Martina Navrátilová, un de Tweete, Chris Evert, slahn. Beide Matches hett se klor in twee Sätz wunnen. Evert hett in’t Finale bi’t 1:6 un 2:6 jüst noch dree Spelen wunnen. De Dominanz vun Graf hett sik to’n eersten mol ok ahn Ünnerbreken op de Sandplätz wiest. Bi dat tweete Grand-Slam-Turneer vun dat Johr, de French Open, keen dat wedder to dat Match Graf, de 44 Spelen in Reeg wunnen harr, un Navrátilová, dat Graf mit 8:6 in’n drüdden Satz wunnen hett. Se is de jüngste French-Open-Winnersche vun all Tieten.

Ok in Wimbledon dröpen de beiden wedder openanner. Ditmol harr Navrátilová wedder Spood, de as beste Spelerin op’n Rasenplatz gell. Dat Speel hett wiest, dat ok de Amerikanersche bi Grundlienenduellen gegen de harde Vörhand vun Graf nicht ankamen künn, man bi Angrepen un Släg op de Rüchhandsiet harr Steffi Graf nich recht wat gegentosetten. Liekers, dat Graf Wimbledon verloren harr, keem se in de Weltranglist jümmer dichter an Navrátilová ran. De Wessel an de Spitz vun’t Fronstennis, de al aftosehn weer, keem an’n 17. August 1987: Steffi Graf hett in’t Finale vun Manhattan Beach över Chris Evert wunnen, steeg dordör op den eersten Platz vun de Tennis-Weltranglist un hett so Martina Navrátilová aflöst, de blots mit’n poor Ünnerbreken siet 1978 an de Spitz stahn harr. Bi de US Open, dat letzte Turneer in’t Johr, stünnen de beiden sik wedder gegenöver, un wedder wünn Navrátilová. Liekers bleev Graf an eerster Steed vun de Weltranglist un is bit to’n 10. März 1991 vörn bleven.

1988–1990: An de Spitz[ännern | Bornkood ännern]

Grand-Slam-Winners in’t Tennis
Johr Natschoonalität(en) Naam(s) Wettkamp
1938 USA Donald Budge Mannslüüd-Enkel
1951 AustralienAustralien Frank Sedgman, Ken McGregor Mannslüüd-Dubbel
1953 USA Maureen Connolly Fronslüüd-Enkel
1962 Australien Rod Laver Mannslüüd-Enkel
1963 AustralienAustralien Margaret Smith Court, Ken Fletcher Mixed
1969 Australien Rod Laver Mannslüüd-Enkel
1970 Australien Margaret Smith Court Fronslüüd-Enkel
1983 / 1984 ČSSR/USA Martina Navrátilová Fronslüüd-Enkel
1984 ČSSR/USAUSA Martina Navrátilová, Pam Shriver Fronslüüd-Dubbel
1988 Düütschland Steffi Graf Fronslüüd-Enkel
(Golden Slam)
1992 / 1993 USAWittrussland Gigi Fernández, Natallja Swerawa Fronslüüd-Dubbel
1993 / 1994 Düütschland Steffi Graf Fronslüüd-Enkel
2002 / 2003 USA Serena Williams Fronslüüd-Enkel

Dat Johr 1987 hett Steffi Graf an de Spitz vun de Tennis-Weltranglist bröcht, man de Saison 1988 weer de Beste, de Steffi Graf harr. Mit dat Winnen vun’n Golden Slam schreev se in dat Johr Tennishistorie. Graf hett in Melbourne, Paris, Wimbledon un an’n 10. September 1988[1] ok bi de US Open, womit se de eerste Spelersche siet Margaret Smith Court in’t Johr 1970 un de drüdde överhaupt weer, de en regulären „Grand Slam“ dörbröcht hett. Bito hett se ok de Goldmedaille in’t Enkel un de Bronzemedaille in’t Dubbel (tosamen mit Claudia Kohde-Kilsch) bi de Olympischen Spelen in Seoul wunnen un dormit as eerste Spelersche in de Tennis-Historie den so nöömten „Golden Slam“ tostannen bröcht. In Wimbledon hett se ok de Vörherrschop vun Martina Navrátilová broken. Ünnern’n Streek hett se in dat Johr 72 Spelen wunnen bi jüst mol dree Nedderlagen. Tweemol hett se dorbi gegen de Argentinierin Gabriela Sabatini verloren, de meist jüst so oolt weer, as Steffi Graf. Bi eenige Turneren hebbt de beiden knappe Duellen bestreden, so dat Sabatini as to tokamen Rutfodderin vun Graf ansehn weer. Graf weer 1988 to de Weltsportlerin vun’t Johr wählt un kreeg de Ehrenbörgerschop vun de Gemeen Brühl.

Ok 1989 speel Steffi Graf wedder vörn mit. Vun de Grand-Slam-Turneren hett se blots de French Open düchtig knapp (gegen de Spaansche Arantxa Sánchez Vicario) verloren, so dat se jüst so even an en Dubbel-Grand-Slam vörbi neiht is. En tweete Nedderlaag müss se gegen Gabriela Sabatini insteken. Mit 86 wunnen spelen weer dat aver ehr tweetbeste Saison, de se harr. Vun de Women’s Sport Foundation is Graf to de „Sportlersche vun’t Johr“ nöömt worrn.

1990–1992: Ne’e Konkurrenz[ännern | Bornkood ännern]

Steffi Graf ehr utermatig Bestimmen vun’t Fronstennis hett bit in’n April 1990 anduert. Twüschen 1988 un de Australian Open in’n Januar 1990 hett se acht vun de negen utspeelten Grand-Slam-Turneren wunnen. Na ehrn drüdden Spood in Melbourne hett se ok in Tokio, Amelia Island un Hamborg wunnen. Ehr Överlegenheit weer to de Tiet so gresig, dat de wunnen Matches meist al vörut sett weern un de Spood blots noch över de Tall vun de Spelen oder över de Samtduer vun’t Match fastmaakt weern.

In’t Fröhjohr 1990 keem Peter Graf aver in de Möhl vun de düütschen Boulevard-Press. De Bild hett behaupt, dat Steffi ehr Vadder en Affär mit en Naaktmodell harr mit de he ok en gemeensom Kind hebben schüll. As disse Naricht in de Medien op’n Hööchpunkt weern, müss sik Graf bi de German Open in Berlin to’n eersten mol gegen de opstreven Jugoslawsche Monica Seles slahn geven. Dat weer ehr eerste Nedderlaag na’n Reeg vun 66 Spelen un för Steffi Graf de tweetlängste Reeg, de dat in’t Tennis an wunnen Spelen je geven hett. Seles harr Graf ok in’t Vörjohr meist al mol slahn un weer nu en eernsthafte Rutfodderin för Graf, de aver in disse Tiet ok gegen annere Spelers ungewöhnlich faken verleren de. In de Johren 1990 bit 1992 hett se jeed Johr „blots“ noch een Grand-Slam-Turneer wunnen, de annern güngen an Monica Seles, de an’n 10.März 1991 to’n eersten mol ok den eersten Platz in de Tennis-Weltranglist övernahmen hett. Vörut güng en Nedderlaag gegen ehr fröhere Dubbel-Mitspelersche Gabriela Sabatini bi’t WTA-Turneer in Boca Raton, USA. Ok dat Finale vun’t olympsche Tennisturneer in Barcelona 1992 bröcht en Överraschen, as Steffi Graf, de as rutragen Favoritin in’t Turneer stünn, gegen de eerst sössteihn Johr olle Jennifer Capriati verloren hett.

1993–1996: Tweete Phaas[ännern | Bornkood ännern]

1993 lööp dat wedder wat beter op’n Platz. Steffi Graf hett wedder dree vun de Grand-Slam-Turneren wunnen un keem ok wedder torüch an de Spitz vun de Weltranglist. Disse Spood stünn aver ünner keen goot Licht, vun wegen dat in’n April 1993 bi’t WTA-Turneer in Hamborg de psychisch opfallige Günter Parche, de en groden Anhanger vun Steffi Graf weer, de bit dorhen föhrende Monica Seles mit en Messer in’n Rüch steken hett. De Sehren weren an’n Enn nich so dull, man Seles harr vör allen psychisch grode Last, mit den Angreep fardig to warrn un künn eerst na twee Johren wedder na’n Sport torüch finnen.

Graf hett dorna wedder eenige vun de Turneren wunnen. In de Johren 19995 un 1996 hett se jeedmol de Turneren in Paris, Wimbledon un New York wunnen, man so bilütten geev dat ok eerste Anteken vun Sleet bi Graf. In beide Johren kunn se bi de Australian Open nich mitmaken, vun wegen dat se besehrt weer.

1996–1998: Sehren un Stüerschandaal[ännern | Bornkood ännern]

De Mannheimer Staatsafkaatschop harr al siet 1995 en Ünnersöken gehen Steffi Graf un ehrn Vadder an’t Lopen. Se beid sünd anschullig wesen, dat se nich noog Stüern betahlt harrn, vun wegen dat jümmer wedder Antritts- un Priesgeller op de Konten vun utlännsche Bdrieven verswunnen weern un de würklichen Innahmen vun Steffi Graf nich gliek weern as de bi’t Finanzamt angeven. Vun wegen dat de Gefahr bestünn, dat Peter Graf Bewiesen tonichten maken oder weglopen künn, weer he in’n Augsut 1995 in Ünnersökenshaft nahmen. Anfang 1997 is he to en Freeheitsstraaf vun dree Johren un negen Maanden veroordeelt worrn. Dat Verfohren gegen Steffi Graf is opletzt gegen en Geldoplaag (§ 153a Abs. 1 StPO) instellt worrn, vun wegen dat se versekern künn, dat se sülvst vun ehrn Geldkram keen Ahnen harr un sik alleen op ehrn Sport kunzentreert harr un se „aktiv an’ Weddergootmaken mitarbeidt hett“. De Medien spekuleeren doröver, dat bi’t Nabetahlen vun de Stüern meist dat hele Vermögen vun de Familie Graf insett warrn müss, üm dat en wietere Straafverfolgen hinnert warrt.

In dat ohr 1997 hett Graf blots 19 Matches spelen künnt, von de se de meisten Wunnen hett. Man den eersten Ranglistenplatz künn se dormit nich hollen un verlöör denn an Martina Hingis. In’t glieke Johr in’n Juni kreeg se en Sehren an’t Knee un müss dorophen opereert warrn. Se künn dorüm över een Johr keen WTA-Turneer mehr spelen. An’n 8. Juni 1998 is se to’n eersten mol siet 1983 nich mehr in de Weltranglist opföhrt worrn.

1999: Comeback un Afscheed[ännern | Bornkood ännern]

1999 hett Graf noch mol en Grand-Slam-Turneer wunnen. In de Twüschentiet weer se nu ok al 29 Johren. In’t Finale vun de French Open hett se gegen de 18-johrige ne’e Weltranglisten-Eerste Martina Hingis wunnen. An’n Vördag vun’t Ennspeel hett Hingis bekannt geven, dat ehr Winnen an’n nächsten Dag den Generatschonenwessel endgellig klor maken deit. Wohrhaftig hett de Swiezersche gegen’t Enn vun’n tweeten Satz al teemlich klor den Toon angeven un weer blot noch dree Punkten vun’t wunnen Match weg. Man, Graf künn dat Speel noch eenmol rümrieten un hett den drüdden Satz denn klor mit 6:2 wunnen. Steffi Graf segg later, dat dat „de schönste Sieg vun ehr Loopbahn“ weer un togliek verklor se, dat se nienich mehr in’t Stadion Roland Garosse spelen warrt, vun wegen, dat se sik keen schöner’n Afscheed vörstellen künn.

Bi dissen Snack kemen glieks Spekulatschonen op, dat Graf no vun’n Sport torüchpedden wull. Bi’t Turneer in Wimbledon stünn se denn aver tohopen mit dat Tennis-Idol ut ehr Jöögd, John McEnroe, to’n eersten mol in dat Halffinale vun’t mischte Dubbel. Man, op de Speel hett se verzicht, vun wegen, dat se wedder Problemen kreeg mit ehr Knee un se ok noch dat Enkel-Finale spelen müss. Dorvör harr se al in’t Veerdel-Finale Venus Williams slahn, man dat Endspeel hett se gegen Lindsay Davenport denn verloren.

Dör den Intog in’t Finale is se noch mol wedder op Platz 3 vun de Weltranglist stegen. As Graf noch mol wedder verloren hett, vun wegen dat se an’n 3. August 1999 besehrt en Speel afbreken, müss verklor Graf teihn Daag later in en Pressekunferenz, dat se op’n Slag ehr Profi-Loopbahn an’n Nagel hangen wull.

Anners wat[ännern | Bornkood ännern]

1999 is Steffi Graf to’n föfften mol as de „Sportlerin vun’t Johr“ vun Düütschland wählt worrn. En poor Weken later geev se bekannt, dat mit ehrn langjohrigen Levenspartner, den Rennfohrer Michael Bartels uteneengahn wull. Dorto geev dat ’n beten later Snackeree, dat se wat mit ehrn lateren Ehmann Andre Agassi harr. Graf un Agassi hebbt an’n 22. Oktober 2001 heiraadt, veer Daag later keem jemehr Söhn Jaden Gil op de Welt. Jemehr Dochter Jaz Elle is twee Johr later an’n 3. Oktober 2003 boren worrn.

Steffi Graf is Grünnersche un Vörsittersche vun de gootmehnen Stiften „Children for Tomorrow“,de sik üm traumatiseerte Kinner in de helen Welt kümmern deit. Butendem hett se dat Ünnernehmen Mrs.Sporty Franchise GmbH mitgrünnt, dat Sportclubs för Fronslüüd bedrifft. Se leevt in Las Vegas.

1989 weer Graf in en Gastrull in de düütschen Filmkummedie Otto – Der Außerfriesische to sehen.

Ehr Loopbahn ünner’n Streek[ännern | Bornkood ännern]

Wunnen Turneren[ännern | Bornkood ännern]

Steffi Graf hett in ehr Loopbahn 22 Matches bi Grand-Slam-Turneren wunnen. Veer mol hett se de Australian Open wunnen, fief mol de US Open, söss mol de French Open un söven mol Wimbledon. In dissen Punkt warrt se blots vun de Australierin Margareth Smith Court mit 24 Siegen överdrapen. 1988 hett Graf all veer Grand-Slam-Turneren för sik entscheden künnt un dormit as drüdde Spelersche in de Tennishistorie na Maureen Connolly un Margaret Smith Court den so nöömten Grand Slam vull maakt. Mit de Goldmedaille bi de Olympschen Sommerspelen in Seoul hett se en bit dorhen noch nienicht dorwesen Spood fiert, de as „Golden Slam“ in de Historie vun’n Tennisport ingahn is.

Tosamen hett Graf 107 Turneren wunnen un beleggt  – meten an de Tall vun de wunnen Turneren in’t Enkel –den drüdden Platz in de ewigen Bestenlist vun de Profispelerinnen achter Martina Navrátilová un Chris Evert.

Wunnen hett Steffi Graf ok bi de Olympschen Sommerspelen 1984 in Los Angeles, man to de Tiet harr Tennis blots eerst den Stand vun en Demonstratschoonssportoort. Fief mol hett Steffi dat Tennis Masters (1987, 1989, 1993, 1995 und 1996) wunnen un mit de düütsche Mannschop tweemol den Federation Cup (1987 und 1992).

Bilanz bi Grand-Slam-Turneren
Turneer 1983 1984 1985 1986 1987 1988 1989 1990 1991 1992 1993 1994 1995 1996 1997 1998 1999 tosamen
Australian Open 2r 4r - - - S S S VF - F S - - 4r - VF 4
French Open 2r 3r 4r VF S S F F HF F S HF S S VF - S 6
Wimbledon - 4r 4r - F S S HF S S S 1r S S - 3r F 7
US Open - 1r HF HF F S S F HF VF S F S S - 4r - 5
Enkeltsiegen bi Grand-Slam-Turneren
Johr Turneer Endspeelgegnersche Resultat
1987 French Open Martina Navrátilová 6:4, 4:6, 8:6
1988 Australian Open Chris Evert 6:1, 7:6
1988 French Open Natallja Swerawa 6:0, 6:0
1988 Wimbledon Martina Navrátilová 5:7, 6:2, 6:1
1988 US Open Gabriela Sabatini 6:3, 3:6, 6:1
1989 Australian Open Helena Suková 6:4, 6:4
1989 Wimbledon Martina Navrátilová 6:2, 6:7, 6:1
1989 US Open Martina Navrátilová 3:6, 7:5, 6:1
1990 Australian Open Mary Joe Fernandez 6:3, 6:4
1991 Wimbledon Gabriela Sabatini 6:4, 3:6, 8:6
1992 Wimbledon Monica Seles 6:2, 6:1
1993 French Open Mary Joe Fernandez 4:6, 6:2, 6:4
1993 Wimbledon Jana Novotná 7:6, 1:6, 6:4
1993 US Open Helena Sukova 6:3, 6:3
1994 Australian Open Arantxa Sánchez Vicario 6:0, 6:2
1995 French Open Arantxa Sánchez Vicario 7:5, 4:6, 6:0
1995 Wimbledon Arantxa Sánchez Vicario 4:6, 6:1, 7:5
1995 US Open Monica Seles 7:6, 0:6, 6:3
1996 French Open Arantxa Sánchez Vicario 6:3, 6:7, 10:8
1996 Wimbledon Arantxa Sánchez Vicario 6:3, 7:5
1996 US Open Monica Seles 7:5, 6:4
1999 French Open Martina Hingis 4:6, 7:5, 6:2

Rekorden[ännern | Bornkood ännern]

Steffi Graf

  • is de eenzige Tennisspelersche, de den Grand Slam op veer ünnerscheedliche Boddenbeläg (Rebound-Ace, Sand, Rasen un Supreme Court) maakt hett.
  • is de eenzige Spelersche, de all veer Grand-Slam-Turneren tomindst veer mol wunnen hett.
  • is de eenzige Spelersche, de bi all veer Grand-Slam-Turneren ehrn Titel verdeffenderen künn.
  • is de eenzige Tennispelersche, de vun negen speelte Grand-Slam-Turneren acht wunnen hett (1988/1989(1990).
  • is de eenzige Tenisspelersche, de all dree top-setten Speler bi en Grand-Slam-Turneer slahn künn.
  • hett dat gaueste Speel vun all Tieten bi en Grand-Slam-Ennspeel maakt (1988 bi de French Open gegen Natallja Swerawa in 34 Minuuten mit 6:0, 6:0). Mit 6:0, 6:0 hett anners blots Dorothea Lambert Chambers 1911 in Wimbledon noch en Grand-Slam-Ennspeel wunnen.
  • is de eenzige Spelersche, de dat Tennisjohr achtmol an eerste Steed afslaten hett.
  • is mit 186 Weken de längste nich ünnerbroken Reeg lang op’n eersten Platz vun de Weltranglist wesen. Bit 2007 gell dat ok noch för de Mannslüüd, bit Roger Federer disse Reeg överdrapen hett.
  • hett tosamen 377 Weken lang op den eersten Platz vun de Weltranglist stahn.

Annere persönliche Bestleistungen[ännern | Bornkood ännern]

In ehr Loopbahn hett se alltosamen 902 mol wunnen bi 115 Nedderlagen. Disse Proportschoon vun 88,7 % warrt blots noch vun Chris Evert (90 %) överdrapen. Ehr beste Johrsbilanz – de tweetbeste jemols – wiest 86 Siegen un twee Nedderlagen op. Twüschen Juni 1989 un Mai 1990 bleev se 66 Spelen lang in Folg ahn Nedderlaag. Dorin warrt se blots vun Martina Navrátilová överdrapen. In’t Enkel hett se 32 mol in Ennspelen vun Grand-Slam-Turneren stahn un steiht dormit achter Chris Evert un Martina Navrátilová an drüdde Steed. Steffi Graf hett en Bedrag vun 21.895.277 US-Dollar an Priesgeller wunnen, wat en Rekord bit in’n Januar 2008 weer, de denn vun Lindsay Davenport bi de Australian Open instellt worrn is.

Utteken[ännern | Bornkood ännern]

  • ITF-World Champion 1987, 1988, 1989, 1990, 1993, 1995, 1996
  • WTA-Player Of The Year 1987, 1988, 1989, 1990, 1993, 1994, 1995, 1996
  • Düütsche Sportlersche vun’t Johr 1986, 1987, 1988, 1989, 1999
  • 1988 Ehrenbörgersche vun de Gemeend Brühl
  • 1988 Weltsportlerin vun’t Johr
  • 1999 Verlehen vun’n Prinz-von-Asturien-Pries in Spanien
  • 1999 Düütsch Fernsehpries Sünnerpries tosamen mit Boris Becker
  • 1999 Olympsch Orden vun’t IOC
  • 1999 Female Athlet Of The Century (Category: Ballsports) / Ballsportlersche vun’t Johrhunnert
  • 2004 Opnahm in de International Tennis Hall of Fame in Newport/ Rhode Island/ USA
  • 2004 Ehrenbörgersche vun’t Land Baden-Württemberg
  • 2007 Düütsch Medienpries tosamen mit Andre Agassi

Schriftwark[ännern | Bornkood ännern]

  • Stefanie Graf, Karlheinz Schmidt: Mein mentales Fitness-Programm: So kommen Sie in Topform. Goldmann, München 2000, ISBN 3-442-16315-3
  • Steffi Graf und Karlheinz Schmidt: Wege zum Erfolg. Midena-Verlag 2001, ISBN 3-310-00614-X

Literatur[ännern | Bornkood ännern]

  • Klaus Brinkbäumer, Hans Leyendecker, Heiner Schimmöller: Reiche Steffi, armes Kind: Die Akte Graf. Hamborg 1996, ISBN 3-455-15005-5
  • Rolf Hauschild, Hansjörg Falz: Danke, Steffi: Die unvergeßlichen Jahre der Königin des Centre Court. Sportverlag, Berlin 1999, ISBN 3-328-00867-5
  • Doris Henkel: Steffi Graf (Superstars des Sports). Copress Verlag, München 1993, ISBN 3-7679-0431-4
  • Sue Heady: Steffi: Allem zum Trotz. Heel, Königswinter 1996, ISBN 3-89365-498-4
  • Ron Knapp: Sports Greats: Steffi Graf. Enslow Publishers 1995
  • Hans Reski, Irmgard Stoffels Lübbe: Steffi Graf. Leben und Karriere eines deutschen Tenniswunders. Bergisch-Gladbach 1986.
  • Hans-Dieter Schütt: Steffi Graf: Superstar, Porträt. Sportverlag, Berlin 1993, ISBN 3-328-00581-1
  • Marita Weber: Steffi Graf: Aufschlag zum Erfolg, ein Traum hat sich erfüllt. Delphin-Verlag, München 1987, ISBN 3-7735-5355-2

Borns[ännern | Bornkood ännern]

  1. Deutsche Welle – Klennerblatt to’n 10. September 1988

Websteden[ännern | Bornkood ännern]