Richard Vosslo

Vun Wikipedia

Richard (Carl Theodor August) Vosslo (* 26. Januar 1859 in Friedrichshof bi Tessin; † 4. Mai 1939 in Waren) weer de Begrünner von de Volkskunn in Mekelborg.

Vosslo is as drüdd Kind von’n Goodsbesitter Adolf (Ferdinand) Vosslo in Friedrichshof bi Tessin boren. He weer faken op Besöök op de Hööv von sien Opa bi Waren un sien Unkel in Körkwitz, wo he toeerst wat mitkregen hett von de Volkswiesheiten un Brüük von de eenfachen Lüüd.

Na dat Abitur 1876 an de Grote Stadtschool in Rostock hett he bet 1883 Klassische Philologie in Rostock, Leipzig un Berlin studeert. Dat Schrieven von sien Dokterarbeid över de greeksche Spraak hett he aver afbraken un hett dat Lehramt wählt. Vosslo weer na sien Referendartied in Wismar von 1886 bet 1922 Persepter an dat Gymnasium in Waren un hett Latien un Greeksch lehrt.

Beröhmt is he vör allen för sien Sammeln un Forschen to de mekelbörgsche Volkskunn. Vonaf 1883 is he dör meist jeden enkelten Oort in Mekelborg reist un hett Geschichten un Leder un över Brüük, Arbeidswiesen un Levensformen op Zedels opschreven. Dat weren oplest so üm un bi twee Millionen Zedels. Disse Zedels kemen denn sorteert na Sachgruppen un Öörd in sien Zedelkassenarchiv. Op Basis von disse Zedels hett he veel to dat Mekelbörgsche Wöörbook bidragen.

Vosslo siene Zedels sünd ok hüüd noch de Grundlaag för dat Institut för Volkskunn an de Universität Rostock. De von Vosslo sammelten Gegenstänn un Drachten liggen nu in dat Mekelbörgsche Volkskunnmuseum in Swerin.

Vosslo is 1939 doodbleven un liggt op’n Olen Karkhoff in Ribnitz begraven.

He hett twee Maal den John-Brinckman-Pries von de Hansestadt Rostock kregen, denn de Grote Medallje för Kunst un Wetenschop von dat Groothartogdom Mekelborg-Swerin, 1934 de Goethe-Medallje för Kunst un Wetenschop von de Regeren von Mekelborg un de Leibniz-Medallje.

Vosslo weer Ehrensenater un Ehrendokter von de Universität Rostock un Ehrenbörger von de Stadt Waren. Dat Richard-Wossidlo-Gymnasium in Waren hett 1939 na em sien Naam kregen un ok dat Richard-Wossidlo-Gymnasium in Damgorn heet sied 1950 na em.

Ok bi dat mekelbörgsche Volk hett he as „uns Perfesser Vosslo“ hooch Ansehn genaten.

Warken[ännern | Bornkood ännern]

  • Volkstümliches aus Mecklenburg. (een Heft)
  • Mecklenburgische Volksüberlieferungen. Band 1 bet 3
  • Ein Winterabend in einem mecklenburgischen Bauernhause. Theaterstück
  • Aus dem Lande Fritz Reuters: Humor in Sprache und Volkstum Mecklenburgs. Mit einer Einleitung über das Sammeln volkstümlicher Überlieferungen.
  • Buernhochtied. Theaterstück

Weblenken[ännern | Bornkood ännern]