Plattdüütsche Bibliografie un Biografie
De Plattdüütsche Bibliographie un Biographie (PBuB, vun ooltgreeksch: Βίβλιος, Book, Βίος, Leven un γράφειν, schrieven) is en Wark, wo een över plattdüütsche Böker un plattdüütsche Schrieverslüde in nakieken kann. Dat schall dorüm gahn, dat een all sülvstännige plattdüütsche Warken, de vun 1800 bit to dat Johr 2000 rutkamen sünd, dor in finnen kann (Bibliographie) un ok en beten wat över dat Leven vun jem ehre Schrievers dor in nalesen kann (Biographie). Hüdigendags is de PBuB to 90% fardigstellt. In’t Johr 2008 schall allens torecht ween.
Blangen de Informatschonen över de Schrievers gifft dat ok noch en List vun al Verlagen, de in düsse Tiet plattdüütsche Schriften rutbröcht hefft.
De PBuB is in’t Internet to finnen un warrt tohopenstellt un rutbröcht vun Peter Hansen in'n Updrag vun dat Institut för Nedderdüütsche Spraak in Bremen. De PBuB is op Hoochdüütsch tohopenstellt.
