Over the Hedge

Vun Wikipedia
Filmdaten
Plattdüütsch Titel:
Originaltitel: Over the Hedge
Düütsch Titel: Ab durch die Hecke
Produkschoonsland: USA
Johr vun’t Rutkamen: 2006
Läng: 83 Minuten
Originalspraak: Engelsch
Öllersfreegaav in Düütschland: FSK 0
Filmkru
Speelbaas: Tim Johnson
Karey Kirkpatrick
Dreihbook: Karey Kirkpatrick
Lorne Cameron
David Hoselton
Len Blum
Produkschoon: Bonnie Arnold
Christian Kubsch
Musik: Rupert Gregson-Williams
Ben Folds
Snitt: John K. Carr
Szenenbild: Kathy Altieri
Kledaasch: Jane Poole
Dorstellers

Sprekers: Afsnitt in’n Artikel

Over the Hedge (op plattdüütsch so veel as „Över’n Knick“; dt. Titel: Ab durch die Hecke) is de Titel vun en US-amerikaanschen Animatschoonsfilm ut dat Johr 2006. De Film is vun DreamWorks Animation produzeert worrn un weer in Düütschland vun United International Pictures verleht. Grundlaag för den Film is dat Comic, dat ünner den glieken Naam rutkamen is.

Inholt[ännern | Bornkood ännern]

De Waschboor RJ (in de düütschen Faten „Richie“) söcht wat to Freten un kummt op den Infall, den Boor Vincent to beklauen, de noch Winterslaap hollen deit. Man, he maakt dorbi toveel Larm, so dat Vincent opwaakt un em tofaten kriggt. De hele Vörraat fallt op de Straat vör en Lastwagen un sünd tonichten. De Boor lett RJ blots ünner een Bedingen lopen: in blots een Week, wenn de Winterslaap vörbi wesen schüll, mutt allns wedder an Oort un Steed wesen. Wenn nich, geiht dat RJ an’n Kragen.

Woll weet RJ, woneem he de Saken klauen kann, man he weet ok, dat he dat nich alleen henkriggt. As he dör en Woold stroomert beobacht he en bunt tosamensette „Familie“ vun Deerten, de jüst ut’n Winterslapp wedder togang kummt. Dat Seggen hett de Schildpadd Verne. Em anslaten hebbt sik de Katteker Hammy, dat Stinkdeert Stella, twee Opossums un en poor Stickelswien. Wiel den Winterslaap is aver üm jemehrn Woold en Siedlung nee boet worrn, so dat se sik nu vun en Heck inslaten finnt. As RJ höört, dat se nu gor nich weet, woneem se wat to Freten herkriegen schüllt, kummt em de Infall: he stellt sik jem vör un will jem wiesen, woneem se vun de Minschen wat kriegen künnt. In’t Geheemen is sien Plaan, dat se de Saken tosamenroovt, de he den Boor geven mutt. Dorvun seggt he aver nix.

Verne will vun RJ sien Plaans nich recht wat weten, vör allen ok wegen de Gefohr. Man mehr un mehr höört de annern op RJ , so dat de langsom to’n Anföhrer warrt. So kriegt se gau so veel to Freten tohopen, dat RJ sien Schuld afbetahlen kann. De Minschen laat sik dat aver nich beden, dat de Beester jem wat klaut un de Goorns in unschick bringt. So roopt se en Kamerjager, de jem bikamen schall. Verne, de al de hele Tiet argdenkern weer, warrt dat toveel. He will nich den Arger vun de Minschen op sik tehn un beslutt, de klauten Saken wedder torüch to bringen. Dorbi kriegt de beiden sik in de Plünnen, wat de Acht vun en Huushund op jem lenkt. De verfolgt jem dör de Goorns, wobi opletzt ok de Wagen mit de Levensmiddel twei geiht.

Dormit steiht Verne nu alleen dor un kriggt en slecht Geweten, dat he RJ so behinnert hett. Se besluut, noch eenmol in de Siedlung to gehn, un de Saken direkt ut en Huus to roven. RJ maakt en vigelienschen Plaan, üm all de Fallen un Sekersheitsapparaten uttoschalten un sogor ok den Huuskater koolt to stellen. De Plaan geiht op, man ut Versehen verraat sik RJ dorbi, dat he de Saken an en willen Boor afgeven mutt, üm sien egen Huut to redden. An’t Enn löpt dat aver doch noch scheev un se warrt opdeckt. RJ kann sik mit dat Freten in Sekerheit bringen, man de annern Deerten warrt vun den Kamerjager fungen un insparrt.

Vincent hett allns mit ankeken un loovt RJ dorför, dat he ahn Rücksicht de Saken an sik bröcht un de annern jemehr egen Schicksal överlaten hett. Dorbi warrt RJ kloor, dat em sien ne’e Familie veel wichtiger is as de Gefohr, de vun den Boor utgeiht. Foorts verfolgt he dat Auto vun den Kamerjager. Na en wille Jagd kann he sien Lüüd befre’en un utneihn. Twüschen de Fronten vun Vincent op de een Siet un den Kamerjager un en Inwahnersche op de annern Siet kummt em opletzt ern Infall, woans se ut de Saak rutkamt. Opletzt warrt de Boor, tosamen mit den Kamerjager un de Naversche in de ehrn Goorn lannt. De Polizei nimmt den Boor mit in en Deerreservat, wiel de Naversche wegen de illegalen Fallen, de se vun’n Kamerjager köfft hett insparrt warrt. As RJ sik opletzt anschicken deit, nu wedder sien egen Weeg to gahn, warrt he vun Verne inlaadt Deel vun de Familie to warrn. Mit grote Freid nimmt he dat Anboot an.

Kritik[ännern | Bornkood ännern]

  • De film-dienst schreev vun en ünnerhollen Tekentrick-Aventüer, dat an’n Reekner utklamüstert weer. Bi’t Gestalten weer de Film ’n beten to stroomlienenförmig, bröcht liekers aver jümmer wedder Infäll to’n Vergnögen.[1]
  • De TV Spielfilm meen, dat de Film nich an den Humor vun Shrek ramkamen künn, in Saken Infallsriekdom den Sommerhit „Madagascar“ aver noch üm Längden överdrapen de. Jeedeen Gag seet, ok wenn de een oder annere schon mol ennerworrns to sehn weer. De Film weer en charmanten Familienfilm, gegen den sien Utsaag keen Pädagoog wat utsetten künn: Fründschop un Teamwork maakt dat Leven lichter.[2]
  • De taz bericht in ehr Utgaav vun’n 6. Juli 2006, dat sik dat Dreihbook kommodig vun de Filmen ut dat Disney-Studio afheven de – dat jümmer noch in dat Kindchenschema vun Goot un Böös steiht, man wenig övertüügt – ofschoonst dat Happy End moralisch korrekt weer. Dormit is dat keen Film blots för de ganz lütten Tokiekers – wat as Loov meent weer.[3]
  • Critic.de fünn, dat de Film düütlich mehr tofreden maken de as all de annern Animatschoonfilmen ut dat Studio. He döög ok för en Kinnergeboortsdag. Man, üm nich blots de lütten Tokiekers to ünnerhollen, müssen sik de Makers vun de „Droomsmeed“ düütlich mehr infallen laten.[4]

Utteken[ännern | Bornkood ännern]

De Film weer för tosamen twintig Filmpriesen vörslahn un hett söss dorvun wunnen:

  • 2006: den Capri Arts Award för Enzo Ghinazzi
  • 2006: den Tokiekerpries vun’t Indianapolis International Film Festival in de Kategorie Best Familienfilm för Tim Johnson un Karey Kirkpatrick
  • 2007: den Annie Award in de Kategorie BestFiguren-Design in en Animatschoonsfilm för Nicolas Marlet
  • 2007: den Annie Award in de Kategorie Best Speelbaas in en Animatschoonsfilm för Tim Johnson un Karey Kirkpatrick
  • 2007: den Annie Award in de Kategorie Best Storyboarding in an Animated Feature Production för Gary Graham
  • 2007: den KCFCC Award in de Kategorie Best Animatschoonsfilm

Stimmen[ännern | Bornkood ännern]

Rull Originalspreker Düütsche Synchronisatschoon Leevwesen
RJ (Richie) Bruce Willis Götz Otto Waschboor
Verne Garry Shandling Bernhard Hoëcker Schildpadd
Hamilton Hammy Steve Carell Ralf Schmitz Katteker
Ozzie William Shatner Kaspar Eichel Opossum
Heather Avril Lavigne Jeanette Biedermann Opossum
Stella Wanda Sykes Heike Schroetter Stinkdeert
Lou Eugene Levy Michael Nowka Stickelswien
Penny Catherine O’Hara Heidrun Bartholomäus Stickelswien
Vincent Nick Nolte Ben Becker Boor
Kamerjager Thomas Haden Church Jörg Hengstler Minsch
Huuskatt Omid Djalili Tayfun Bademsoy Perserkatt
Nugent Brian Stepanek Roland Hemmo Rottweiler
Gladys Allison Janney Andrea Aust Minsch

Borns[ännern | Bornkood ännern]

  1. film-dienst, 14/2006, S. 20
  2. http://www.tvspielfilm.de/filmlexikon/?type=filmdetail&film_id=602207 Filmkritik bi TV Spielfilm
  3. http://www.taz.de/pt/2006/07/06/a0199.1/text
  4. Filmkritik op Critic.de

Weblenken[ännern | Bornkood ännern]