Happy End (Film)

Vun Wikipedia
Wesseln na: Navigatschoon, Söök

Happy End is en Begreep, de ut de engelschen Spraak afleidt, man vun de Grammatik an sik verkehrt is, wiel dat Happy Ending heten müss. Översett heet dat soveel as en glücklich End in’n Sinn dorvun, at en Saak goot utgeiht.

In’n Allgemenen kann dormit de gode Utgang vun jeed mööglich Begeevnis meent wesen, de mit Lasten un Mucken verbunnen is. De glieke Bedüden hett dat Sprickwoort: „Enn goot, allens goot!“

In’n Sünneren is de Begreep dör de Filmkunst övernahmen worrn un betütt sik toeerst vör allen op den Utgang vun en Kinofilm oder en Feernsehreeg, jüst so aver ok op dat Enn vun en Roman oder en Vertellen. Meent is dormit de tyypsch gode Afsluss vun de Geschicht, as dat begäng is. Dat gellt sünners för den Spood vun de Hööftfiguren as t. B., dat sik dat Poor an’n Enn tohopenfinnen deit, de Bomb jüst noch rechttietig afstellt warrn kann oder de Welt jüst noch so even för de bösen Verbrekers reddt warrn kann.

Dat Happy End is en Stilmiddel, dat geern in de Filmindustrie insett warrt, dormit de Kinobesöker mit en goot Geföhl un Samtindruck na’n Film na Huus gahn kann. In’n statistischen Middel bringt en Film mit’n goden Utgang mehr Innahmen as en Film ahn Happy End. So warrt ok kloor, worüm faken de nadenkliche Utgang vun en Vörlaag ut de Literatur bi’t Verfilmen ännert warrt. Sünners in Hollywood warrt Filmen geern ut weertschoppliche Grünnen mit en Happy End dreiht.

Aver jüst, vunwegen dat Happy End as en Instrument insett warrt, is de Begreep nich blots positv beleggt. In’n egen Sinn vun dat Woort is de Engelsche Utdruck nich nipp un nau gliektosetten mit den goden Utgang vun en Geschicht. Faken betekent dat Happy End ok en Utgang de meist al to goot is. All Minschen weet, woans dat würkliche Leven utsütt un wo komplizeert dat aflöpt. De Kinobesöker mag geern mitlieden un sik mitfreien, man ok wenn he sik an’n Enn en gode, positive Luun un Instellen wünscht, kann en to goot meent Happy End, dat to dick opdragen is, na en eernsten un realistischen Film jüst dat utlösen, wat an sik hinnert warrn schüll, neemlich dat de Tokieker en Flapp tütt.

Nipp un nau disse Saak mit dat överdreven Happy End grippt Kurt Tucholsky in sien bekannt Gedicht Danach op, dat na en ganzen Barg vun echte Problemen afsluten deit mit de Wöör:

„...Und darum wird beim Happy End im Film jewöhnlich abjeblendt.“