Mairie Jeem

De Mairie Jeem weer in de Franzosentied (1810 bet 1813) een von de dree Mairien, in de de Kanton Rodenborg indeelt weer. De Seet weer in Jeem. Se harr 1543 Inwahners.

Historie

De Ümgegend von Jeem hett vör de Franzosentied to de Ämter Rodenborg, Zeven un Otterbarg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Jeem een von de negen Mairien in’n Kanton Zeven von’n Distrikt Bremervöör, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Jeem weer nu een von de dree Mairien in’n Kanton Rodenborg, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Jeem, Zeven un Mulmshoorn ut’n Kanton Zeven, de Mairie Narbn ut’n Kanton Otterbarg un de Mairie Karktimk ut’n Kanton Hanst. Von de Mairie Zeven is de gröttere Deel an de Mairie Jeem gahn. Blots Zeven sülvs hett mit annere Öörd en ne’e Mairie Zeven billt. Von de Mairie Karktimk sünd Winkeldörp un Steenfeld an de Mairie Jeem kamen un de Rest is mit annere Öörd to en gröttere Mairie Karktimk worrn. Ut de Mairie Mulmshoorn sünd de Öörd Luhn un Jeersdörp an de Mairie Rodenborg gahn un de Rest an de Mairie Jeem.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Jeem, Bokel, Wehldörp, Wehldörperholt, Siek, Heesdörp, Hetzweeg, Abbendörp, Wittkopsbossel, Olenhöben

• Kaiserriek Frankriek:

  Jeem (133 Inwahners), Hollenhoff (13), Brüttendörp (103), Olendörp (284), Wehldörp (46), Wehldörperholt (6), Winkeldörp (82), Steenfeld (55), Bokel (33), Narbn (144), Heesdörp (95), Siek (31), Brümmerhoff (19), Borchelsmoor (109), Benkeloh (24), Wenkeloh (21), Westerholt (106), Bult (22), Emmen (6), Westeresch (68), Vahl (56), Mulmshoorn (87)

Vondaag sünd düsse Öörd Deel von de Gemeen Scheeßl, de Stadt Rodenborg un de Samtgemenen Zeven, Tarms, Fintel un Söttmer.