Bokel (Gemeen Jeem)
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 4,56 km² | |
| Inwahners: | ||
| Postleettall: | 27404 | |
| Vörwahl: | 04268 | |
| Geograafsche Laag: | Koordinaten:53° 12′ N, 9° 17′ O53° 12′ N, 9° 17′ O | |
|
| ||
Bokel (hoochdüütsch Bockel) is en Dörp in de Gemeen Jeem in’n Landkreis Rodenborg, Neddersassen.
De Naam von’n Oort is vör allen bekannt dör de Raststeed un Opfohrt an de Autobahn 1.
Geografie[ännern | Bornkood ännern]
De Naveröörd sünd Wehldörp in’n Noorden, Jeem in’n Noordoosten, Heesdörp in’n Oosten, Mulmshoorn in’n Süden, Horß in’n Süüdwesten un Narbn in’n Westen.
Historie[ännern | Bornkood ännern]
De Oort kummt 986 as Bocholt toeerst in en Besittoorkunn von dat Klooster Zeven vör. De Naam kummt von Book (Böök, as in Bookecker) un lo (Holt), also för en Busch ut Böken. 1364 is de Oort Besitt von dat Arzbisdom Bremen worrn. In dat Vörder Register is de Oort (Bokoll schreven) mit dree Buursteden vertekent. Ok de Familie von Borgh harr dormaals al Besitt in Bokel. Dor is later denn dat Riddergood Bokel op boot worrn, dat toeerst de Familie von Düring tohöört hett un later de Familien Marschalck von Bachtenbrock un von Hammerstein-Gesmold.
In’n Eersten Weltkrieg sünd söss Soldaten ut Bokel fullen oder vermisst un in’n Tweten Weltkrieg teihn[1].
Verwaltungsgeschicht[ännern | Bornkood ännern]
Bokel leeg vör 1885 in de Böörd Jeem in’t Amt Zeven, denn bet 1932 in’n Kreis Zeven un na 1932 in’n Kreis Bremervöör. 1977 is dat Deel von’n Landkreis Rodenborg worrn.
1929 is de Gemeen Bokel oplööst un Deel von de Gemeen Jeem worrn. To’n 1. Oktober 1949 is Bokel aver wedder en egenstännige Gemeen worrn.[2] Von 1965 bet 1974 weer de Gemeen Maat von de Samtgemeen Zeven. An’n 1. März 1974 is Bokel mit de Gemeenreform in Neddersassen mit Jeem, Heesdörp, Narbn un Wehldörp to de ne’e, gröttere Gemeen Jeem tohoopslaten worrn is.
Inwahnertall[ännern | Bornkood ännern]
| Johr | Inwahners |
|---|---|
| 1824[3] | 7 Füürsteden |
| 1848[4] | 60 Lüüd, 9 Hüüs |
| 1. Dezember 1910[5] | 61 |
| 1. Oktober 1949[2] | 167 |
Religion[ännern | Bornkood ännern]
Bokel is evangeelsch-luthersch präägt un höört to dat Kaspel von de Margarethenkark in Jeem.
För de Kathoolschen is de Christ-König-Kark in Zeven tostännig, de siet 1. November 2006 to de Karkengemeen Corpus Christi in Rodenborg tohöört.
Wapen[ännern | Bornkood ännern]
Dat Wapen von Bokel wiest op sülvern Grund en blauen Balken un dree gröne Bökenbläder rundüm.
De Bökenbläder staht as Symbol för den Naam von’n Oort. De blaue Balken steiht op de een Sied för de Autobahn, op de annere Sied verwiest de Balken op dat ole Wapen von de Familie von Düring. Utklookt hett dat Wapen Arnold Rabbow ut Berlin un an’n 28. Juni 2011 is dat as Wapen von dat Dörp annahmen worrn.
Kultur[ännern | Bornkood ännern]
En Denkmaal för de Fullenen ut Bokel ut de beiden Weltkrieg’ steiht an de Dörpstraat.
Brüük[ännern | Bornkood ännern]
To Oostern warrt in Bokel en Oosterfüür ansteken un Maiboomplanten to Pingsten gifft dat ok.
Infrastruktur[ännern | Bornkood ännern]
Verkehr[ännern | Bornkood ännern]
Bokel liggt an de Bundsstraat 71, de in’n Noorden von Zeven kummt un in’n Süden na Mulmshoorn un denn na Rodenborg löppt. So bi 500 m in’n Süden von Bokel hett de B 71 en Opfohrt op de Autobahn 1 (Opfohrt 49 Bokel). Ans geiht von de B 71 noch de Kreisstraat 112 na Westen af, de na Narbn löppt.
De nächste Bahnhoff is de Bahnhoff Rodenborg an de Bahnlien Hamborg–Bremen.
Ünnernehmen[ännern | Bornkood ännern]
Een von de gröttsten Ünnernehmens in Bokel is Dat Autohus, dat glieks an de Opfohrt op de A 1 sitt.
Scholen[ännern | Bornkood ännern]
De Kinner ut Bokel gaht op de Grundschool Elsdörp.
Lüüd[ännern | Bornkood ännern]
De Viezvörsitterin von’n Landsverband von de Jöödschen Gemenen von Neddersassen, Sara-Ruth Schumann, hett de letzten Johren von’n Tweten Weltkrieg in Bokel dörleevt.
För Infos över de Familien Marschalck von Bachtenbrock un von Hammerstein-Gesmold, de op Good Bokel leevt hebbt, kiek ünner Good Bokel.
Footnoten[ännern | Bornkood ännern]
- ↑ http://www.denkmalprojekt.org/dkm_deutschland/gyhum-bockel_wk1u2_ns.htm
- ↑ a b Neues Archiv für Niedersachsen. Band 3, W. Dorn, 1949, Sied 871
- ↑ C. H. Jansen: Statistisches Handbuch des Königreichs Hannover. 1824, Sied 64: http://books.google.de/books?id=tG0AAAAAcAAJ&pg=PA64
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 141: http://books.google.de/books?id=eOI-AAAAcAAJ&pg=PA141
- ↑ http://www.gemeindeverzeichnis.de/gem1900/gem1900.htm?hannover/zeven.htm
