Mailand–Sanremo

Vun Wikipedia
Wesseln na: Navigatschoon, Söök
Hööftfeld in Diano Marina 2004
Alessandro Petacchi winnt in’ Sprint (2005)
Hööchtprofil 2006

Dat Radrennen Mailand–Sanremo is mit över 290 Kilometern dat längste Eendagsrennen in’ Profi-Radsport. Dat wurr to de so nömm Monumente vun den Radsport tellt un hörr för dree Johr to de in dat Johr 2005 inführt UCI ProTour, en Reeg vun de wichtigst Radrennen vun dat Johr. Siet 2011 hörrt dat Rennen to de Nahfolgeserie UCI World Tour.

De wichtigste un beroopenst Klassiker vun Italien funn bit 2012 jedes Johr an en Saterdag Enn’ Märt statt, bevör mit de Utgaav 2013 ut Verkehrsgrünnen de Utdragensdag up den Sönndag leggt wurr.[1] Dat Rennen hett den Binaam La Primavera (Fröhjohr) kreegen; mitünner wurrd disse Binaam ok as „prima vera corsa“ leest, also dat „eerste richtige Radrennen“ vun dat Johr.[2] La Classicissima, as dat Rennen ok respektvull nömmt wurrd, funn eerstmals 1907 statt un weer bit to dat Afschaffen vun de teihn Veranstalten ümfaaten Rad-Weltcup dat eerste Rennen vun disse Rennserie. Siet de eerst Utdragen wurrd dat Rennen vun de Gazzetta dello Sport organiseert.

Bi dat eerst Rennen an’ 14. April 1907 hemm 33 Rennfohrer deelnommen. Sieger wurr dormals Lucien Mazan ut Frankriek mit en Snitt vun 26,6 km/h. In’ Gegensatz dorto leeg de Dörsnittsgeschwindigkeit 2010 bi 43 km/h. De Deelnehmer vun dat eerst Rennen kreegen en Upwandsentschädigung vun fiev Lire.

Streck[ännern | Bornkood ännern]

De Oort Cipressa

De Streckenführen vun Mailand nah Sanremo ändnert sück vun Johr to Johr man blots wenig. In’ Gegensatz etwa to Paris–Roubaix, dat 80 Kilometer nördlich vun Paris in Compiègne los geiht, fangt Mailand–Sanremo tatsächlich in Mailand, nauer up de Piazza Castello, an. Dornah führt de Streck över Binasco, Pavia, Voghera, Tortona, Novi Ligure, Ovada un den Turchino-Pass – mit 588 Meter de hööchste Punkt vun de Route – an de Middelmeerküst. De wurrd an de westlich Peripherie vun Genua reckt. Spektakulär sünd vör allen de denn folgen Passagen, se führen – gröttstendeels de historsch Via Aurelia folgend – direkt an de italieensch Riviera entlang.

Dat över wiet Deelen meest völlig flach Rennen hett sück bit vör eenig Johren an mehreren kört Anstiegen kört vör dat Enn’ vun de Streck entscheeden. Dorünner vör allen de Stiegen nah Cipressa (etwa 20 Kilometer vör dat Teel up 240 Meter Hööcht liggend) un de Anstieg nah Poggio di Sanremo (rund söss Kilometer vör dat Teel up 162 Meter Hööcht liggend). In’ Radsport snackt man ok kört vun de Cipressa un den Poggio. Dorto kommen noch de Capo Mele (65 m), de Capo Cervo (77 m) un de Capo Berta (130 m). In de letzt führen disse as „Capi“ betekent Anstiege aber selten to en Selektschoon, so dat de Entscheeden intüschen meest in en Massensprint utdragen wurrd. Dit wiest sück ok in de Siegerlist, de toletzt vun Sprintern as Erik Zabel, Mario Cipollini, Oscar Freire, Alessandro Petacchi, Mark Cavendish un Gerald Ciolek domineert wurr.

De Rekordsieger[ännern | Bornkood ännern]

De meesten Siege bi de „Classicissima“ hett de belgisch „Kannibale“ Eddy Merckx uptowiesen. He wunn in elf Johren tüschen 1966 un 1976 insgesamt söbenmal. Achter Costante Girardengo (söss Siege) un neben Gino Bartali up Platz 3 vun de ewige Ranglist liggt Erik Zabel, de van 1997 bit 2001 veermal in Sanremo wunn.

Siegerlist[ännern | Bornkood ännern]

Weblenken[ännern | Bornkood ännern]

Commons-logo.svg Mailand–Sanremo. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. velonews.com van’ 29. November 2012: RCS Sport clarifies move of Milan-San Remo and Giro di Lombardia to Sundays
  2. Mailand-Sanremo up catenacycling.com (italieensch)