Boethius

Vun Wikipedia
Wesseln na: Navigatschoon, Söök
Boethius

Anicius Manlius Severinus Boethius (klassisch [[boˈeːtiʊs]], modern ok [[boˈeːtsiʊs]], ok Boëthius schreven; * um 480/485; † twuschen 524 un 526 in Pavia oder in Calvenzano in de hüdige Provinz Bergamo) weer en Gelehrten, Politiker un neeplatoonschen Philosophen un Theologen in de Tied vun de Ostgoten ehren König Theoderik den Groten. Unner em hett he hoge Ämter in'e Hand harrt. Man he is in Verdacht kamen, he harr sik mit Anhängers vun den Kaiser vun Oostrom gegen de Herrschop vun de Ostgoten afsnackt. Vundeswegen is he inspeert un vunwegen Hoochverrat verordeelt un henricht' wurrn.

Boethius hett sik vornahmen, en ehrgiezig Bildungsprogramm um to setten. He harr dat dor up afsehn, Platon un Aristoteles ehre Warke alltohopen in latiensche Oversetten vor to leggen un dor en Kommentar to to schrieven. He meen, dat weern de Grundtexte vun de greeksche Literatur in Philosophie un Wetenschop.[1] Fudder hett he ok Lehrböker schreven. Dor woll he den Karn vun dat Bildungsgoot, wat up em to kamen weer, for de Tokumst mit redden, vunwegen dat dat in'n Westen, wo allerwegens Latiensch snackt wurrn is, mit de Kennis vun de Greeksche Spraak unbannig bargdal gahn weer. Ok hett he sik vornahmen, achteran woll he wiesen, dat Platon un Aristoteles overeen stimmen döen, so, as he dat, mit de meisten Minschen dortieds, annehmen dö. Vunwegen dat he so fröh sturven is, is he mit düt unbannige Wark nich feerdig wurrn. Man he is doch de wichtigste Mittler wurrn, de de greeksche Logik, Mathematik un Musiktheorie an de latiensche Welt vun dat Middeloller bit in dat 12. Johrhunnert wietergeven hett. Bannigen Indruck maakt hett siene Schrift De Consolatione Philosophiae („Vun de Philosophie ehren Troost“), de he achter Trallen schreven hett. Dor hett he in upschreven, wat he over Ethik un Metaphysik denken dö. Bovenhen hett he ok Traktate over Theologie schreven.

Belege[ännern | Bornkood ännern]

  1. Boethius, Tweeten Kommentar to De interpretatione, S. 79,9 – 80,1 Meiser.