Apostel (Jesus Christus)

Vun Wikipedia

En Apostel (vun greek. ἀπόστολος apóstolos oder aramääsch saliahGesandten, Sendbade“) is een, de en Kunn oder Bottschop overbringen deit in'n Naam vun een annern, de em stüert hett. Dat Woort warrt sunnerlich in de Bibel ehrn Sinn bruukt vun en Minschen, de vun Jesus vun Nazaret losschickt is, um dat Evangelium kunnig to maken. Eenmol warrt ok Jesus sülms en „Apostel...vun den Gloven, den wi bekennt“ nömmt (Hebr. 3,1).

Jesus siene eersten Apostels[ännern | Bornkood ännern]

De eersten Apostels sünd, na de christliche Traditschoon, de 12 Jüngers vun Jesus. Judas Iskariot hett sik later sülms dat Leven nahmen, nadem he Jesus verraden harr. Dor is denn Matthias nafolgt. So hett dat 12 Apostels geven, man een vun jem is uttuuscht wurrn. Twolf is en symboolsche Tahl.

De 12 Apostels harrn in de lesten Johre vun Jesus to den binnersten Krink vun siene Anhängers tohöört. Nadem Jesus sturven weer, gungen se bi un breden dat Evangelium in Judäa, Syrien, Lüttasien un Süüdeuropa (mit Rom) ut.

Düt sünd de eersten Jüngers un Apostels vun Jesus ween:

  1. Andreas (Broer vun Simon Petrus)
  2. Bartholomäus
  3. Philippus
  4. Jakobus (Alphäus sien Söhn)
  5. Jakobus de Öllere (mit Binaam „Boanerges“, Söhn vun Zebedäus)
  6. Johannes (mit Binaam „Boanerges“, annern Söhn vun Zebedäus)
  7. Judas Thaddäus (ok Judas Lebbäus nömmt, Broer vun Jakobus den Jüngeren)
  8. Matthäus (ok “Levi” nömmt)
  9. Matthias (na de Himmelfohrt hett he den Platz vun Judas Iskariot innahmen)
  10. Simon Petrus (Petrus is en Oversetten vun sien Binaam Kephas)
  11. Simon (faken mit den Tosatz "de Zeloot" oder "de Ievrige")
  12. Thomas

Latere Apostels[ännern | Bornkood ännern]

  • Ok Paulus hett sik sülms en Apostel nömmt, ofschoonst he Jesus nie nich drapen harr, so lang, as de up de Eer leven dö. Man he vertell sülms, he harr em later sehn, as Jesus al in’n Himmel weer un dor weer he to’n Anhänger vun Jesus dör wurrn. Faken warrt he vundeswegen ok as 13. Apostel tellt.

De Apostels un de apostoolsche Nafolg in de christliche Karken[ännern | Bornkood ännern]

De Röömsch kathoolsche un de Orthodoxe Karken nömmt sik sülms en „apostoolsche Karken“. Düsse Naam steiht up de Grundlaag vun den „Primat vun Petrus“. Düt Lehrstück seggt, Petrus weer „de Eerste mank de Apostels“ ween (Principes Apostolorum). Vundeswegen harr Jesus em ok de Herrschop over siene Karken geven. Na de „Apostoolsche Sukkzeschoon“, de in de kathoolsche Karken gellen deit, is de Herrschop vun Petrus dör Handupleggen an de Paavsten overdragen wurrn. Un de Regeern vun de annern Apostels is denn an de Bischöpp overgahn.