Amt Ritzbüttel
Dat Amt Ritzbüttel weer en Rebeed an de Spitz von dat Elv-Werser-Dreeeck, dat von 1394 bet 1937 to Hamborg tohöört hett. De Höövdoort weer Ritzbüttel mit dat Slott Ritzbüttel, in dat hambörgsche Amtlüüd seten.
Historie[ännern | Bornkood ännern]
De Borg Ritzbüttel is so üm 1340 rüm boot worrn un hett de Familie von Lapp tohöört. Nadem Hamborg de Borg 1393 belagert un innahmen harr, hebbt Lapp sien de Borg und de Ümgegend an’n 31. Juli 1394 för 2000 Mark an Hamborg verköfft. Dit Land hett denn Amt Ritzbüttel heten. Dat harr för Hamborg besünner Bedüden, denn so harr Hamborg Kuntrull över de Elvmünn un harr Togang to en Haven, de dichter bi de Noordsee leeg un ok bi starken Iesgang op de Elv noch to bruken weer.
Dat Regeer över dat Amt harrn Amtlüüd ut Hamborg (mehrstendeels Senaters; List von de Amtlüüd), de in de Borg Ritzbüttel, later dat Slott Ritzbüttel, jemehr Seet harrn.
1810 hett Frankriek ünner Napoleon dat Amt innahmen. Dat hett toeerst bet to’n 31. Dezember 1810 to dat Departement von de Elv- un Wersermünn in dat Königriek Westfalen höört un denn to dat Departement von de Elvmünnen un direkt to Frankriek. An’n 18. März 1813 müssen de Franzosen dat Amt denn opgeven un dat is wedder Deel von Hamborg worrn. Dat Amt sülvs hett in disse Tied de Mairie Ritzbüttel billt.
Gustav Heinrich Kirchenpauer weer 1864 de letzte Hambörger Senater, de Amtmann in Ritzbüttel weer, nadem hett dat bloot noch Amtsverwalter geven.
Eerst na över 500 Johr un dat Groot-Hamborg-Gesett von’n 1. April 1937 hett Hamborg de Kuntrull över Amt Ritzbüttel afgeven. Denn is dat Deel von’n Kreis Land Hadeln in dat Land Hannover worrn.
Inwahnertall[ännern | Bornkood ännern]
| Johr | Inwahners |
|---|---|
| 1755 | 3.010 Inwahners, 587 Hüüs |
| 1816[1] | 4.231 |
| 1826[1] | 6.280 |
| 1838[2] | 5.289 |
| 3. Dezember 1866[3] | 6.708 |
| 1. Dezember 1871[4] | 6.376 |
| 1. Dezember 1910[5] | 18.282 |
Wapen[ännern | Bornkood ännern]
Dat Wapen von dat ole Amt wiest op roden Grund över en wellten, sülvern Schildfoot mit en gröön Stück Land, op dat en gollen Toorn steiht.
Dat Wapen geiht trügg op dat Segel von 1720. De Toorn is de Grote Baak, de bet 1801 vör Ritzbüttel stünn.
Öörd in dat Amt[ännern | Bornkood ännern]
Arensch, Berensch, Cuxhoben, Döös, Duhnen, Groden, Godendörp, Holt, Ritzbüttel, Spangen, Neewark, Ox, Sahlenborg, Stickenbüttel, Süderwisch, Westerwisch.
Footnoten[ännern | Bornkood ännern]
- ↑ a b Neue allgemeine geographische und statistische Ephemeriden, Band 19. 1826, Sied 367: http://books.google.de/books?id=zRtDAAAAcAAJ&pg=PA367
- ↑ Franz Heinrich Neddermeyer: Zur Statistik und Topographie der Freien und Hansestadt Hamburg und deren Gebietes. 1847, Sied 288: http://books.google.de/books?id=sHoAAAAAcAAJ&pg=PA288
- ↑ Statistik des Hamburgisches Staats. Ergebnisse der Volkszählung vom 3ten December 1866. S. 44, http://books.google.de/books?id=C6Q5AQAAIAAJ
- ↑ Statistik des Hamburgisches Staats. Ergebnisse der Volkszählung vom 1. Dezember 1871. S. 78, http://books.google.de/books?id=C6Q5AQAAIAAJ
- ↑ http://www.gemeindeverzeichnis.de/gem1900/gem1900.htm?hamburg/ritzebuettel.htm
Koordinaten:53° 51′ N, 8° 42′ O