Duhnen
| Wapen/Flagg | Koort | |
|---|---|---|
 |
|
|
| Basisdaten | ||
| Flach: | 5,78 km² | |
| Inwahners: | 1.037 (31. Dezember 2006) | |
| Inwahnerdicht: | 179,4 Inwahners pro km² | |
| Postleettall: | 27476 | |
| Vörwahl: | 04721 | |
| Geograafsche Laag: | Koordinaten:53° 53′ N, 8° 39′ O53° 53′ N, 8° 39′ O |
|
Duhnen is en Oort in de Gemeen Cuxhoben in’n Landkreis Cuxhoben, Neddersassen.
Inholtsverteken |
Geografie [ännern]
Duhnen liggt an de Noordsee ganz an de Noordspitz von dat Elv-Werser-Dreeeck un an’n Trechter von de Elvmünn. De Eilannen Neewark un Scharhörn liggt na’n Noordwesten to. De Geest stött hier hart an de Noordsee.
De Naverdörper sünd Döös in’n Oosten, Stickenbüttel in’n Süüdoosten un Sahlenborg in’n Süüdwesten.
Historie [ännern]
Dat eerst Maal in de Oorkunnen kummt Duhnen as Dune 1310 in en Hannelsverdrag twischen Hamborg und Hadeln vör.
1394 warrt de Oort tohoop mit Döös, Stickenbüttel, Sahlenborg, Steenmarn un Ritzbüttel an Hamborg verköfft.
Duhnen is an’n 1. März 1935 mit de Gemeen Cuxhoben tohoopleggt worrn. Cuxhoben un Duhnen hebbt noch bet to’n Groot-Hamborg-Gesett (1. April 1937) to Hamborg tohöört. Denn sünd se Deel von’n Kreis Land Hadeln worrn.
Duhnen billt vondaag tohoop mit Döös un Cuxhoben en Strandbad an de Noordsee un is mit disse Öörd deelwies tohoopwussen. De eersten Kurgäst hett dat so von 1875 af an geven, aver dat güng denn vör allen ünner Robert Dohrmann von 1902 af an vöran, de ünner annern mit dat Duhner Waddrennen anfungen hett.
De Oort is nu vör allen dör den Tourismus präägt un hett en Barg Hotels, Pensionen un Gastronomie. De Waddensee is as Deel von de Natschonalparks Neddersassisch Wattensee un Hamborgsch Wattensee besünners schuult.
Inwahnertall [ännern]
| Johr | Inwahners |
|---|---|
| 1826[1] | 188 Inwahners. 35 Hüüs |
| 1847[2] | 206 |
| 3. Dezember 1866[3] | 209 |
| 1. Dezember 1871[4] | 207 |
| 1. Dezember 1910[5] | 440 |
| 31. Dezember 2006 | 1.037 |
Religion [ännern]
Duhnen is evangeelsch präägt un höört to dat Kaspel Döös. 1953 hett Duhnen en Kapell kregen, de an’n Dohrmannplatz steiht, de vör allen in de Feerntied för de Feerngäst dor is.
Wapen [ännern]
Dat Wapen wiest op hellblauen Grund en sülvern Born. De Schildfoot is gollen un twischen Schildfoot un Schild is noch en düüsterblauen Striepen.
Archäologie [ännern]
De Twellbarg is so üm un bi dree Meter hoog un en Graffbarg ut de Bronztied (üm un bi 1200 v. Chr.). Fröher hett dat ok noch en tweten Barg geven, de aver to Anfang von dat 20. Johrhunnert liek maakt worrn is. 1948 hett Dietwald Brandt den Barg ünnersöcht un dor ünner annern de Steen von en Boomsark, twee Armring’, en Stück von en Fingerring, en Mest, en Nadel un en Liefreemknoop funnen.
De Ringwall An’n Karkhoff is so bi 40 m in’n Dörmeter. De Binnenwall is so bi 1,2 m hoog un de Butenwall wat sieder. De Butenwall hett ok noch en lütten Graven. De Butenwall un de Graven sünd aver blot noch in’n Noordwesten un Süden to kennen. Annerwegens sünd de liek maakt worrn.
De Ringwall is toeerst 1905 von Carl Schuchhardt ünnersöcht worrn. Archäoloogsche Funnen hett Schuchhardt nich groot maakt. 2001 bet 2009 is de Anlaag denn noch wedder neet ünnersöcht worrn. Dorbi hebbt se faststellt, dat de Wall ut Heidplaggen un wohrschienlich so üm un bi 1500 v. Chr. boot worrn is.
Kultur [ännern]
Elk Johr in’n Juli gifft dat dat Duhner Waddrennen, wat en Peerrennen in den Waddensee is.
Infrastruktur [ännern]
Verkehr [ännern]
De wichtigsten Straten för Duhnen sünd de Kreisstraat 2 na Stickenbüttel, de Heinrich-Grube-Weg na Döös un de Scharmoorweg na Sahlenborg.
De nächste Bahnhoff is de Bahnhoff Cuxhoben an de Nedderelvbahn un de Bahnlien Bremen-Cuxhoben.
Footnoten [ännern]
- ↑ Neue allgemeine geographische und statistische Ephemeriden, Band 19. 1826, Sied 368: http://books.google.de/books?id=zRtDAAAAcAAJ&pg=PA368
- ↑ Franz Heinrich Neddermeyer: Zur Statistik und Topographie der Freien und Hansestadt Hamburg und deren Gebietes. 1847, Sied 190: http://books.google.de/books?id=sHoAAAAAcAAJ&pg=PA191
- ↑ Statistik des Hamburgisches Staats. Ergebnisse der Volkszählung vom 3ten December 1866. S. 44, http://books.google.de/books?id=C6Q5AQAAIAAJ
- ↑ Statistik des Hamburgisches Staats. Ergebnisse der Volkszählung vom 1. Dezember 1871. S. 78, http://books.google.de/books?id=C6Q5AQAAIAAJ
- ↑ http://www.gemeindeverzeichnis.de/gem1900/gem1900.htm?hamburg/ritzebuettel.htm
Weblenken [ännern]
- Tourismus-Websteed to Duhnen (hoochdüütsch)
