Windsor Castle

Vun Wikipedia
Zur Navigation springen Zur Suche springen
Windsor Castle bi Sünnenünnergang
Windsor Castle, Blick dör den Böveren Hoff up den Südflögel
Empfang van den Emir vn Kuwait dör de Königin mit de Household Cavalry

Windsor Castle [['wɪnzə 'kɑ:sl]], ok woll Slott Windsor, is dat gröttste dörgängig bewahnt Slott van de Welt. De Oorsprünge van Windsor Castle liggen in de Tiet van Wilhelm den Eroberer. Dat Slott befinnd sück mit dat gesamt Windsor-Anwesen in‘n Besitt van de Kroon un wurr dör den königlichen Huushollen verwalt. Dat Slott is Deel van de Royal Collection, wiels dat Windsor-Anwesen den Crown Estate ünnersteiht.

Tosommen mit den Buckingham Palace un den Holyrood Palace in Edinburgh is dat een van de offiziellen Hööftresidenzen van de britisch Monarken. De Borg liggt in de Stadt Windsor in de Grafschap Berkshire in den Landsdeel England. Ünnerhalv van de Burg floot de Themse up ehr Weg nah Osten to de Hööftstadt London. Windsor Castle wurrd ok as dat „engelsch Versailles“ betekent.

Slott Windsor weer immer de offizielle Weekenend-Residenz van de Könige un wurr van Königin Elisabeth II. todem jedes Johr för een Maand to Ostern bruukt, wiels se de Wiehnachtsferien up hör privaten Anwesen Sandringham House un de Maanden August un September in dat schottisch Balmoral Castle verbringt. To’n Anlaat van hör 80. Gebortsdag hett de Königin hör ständigen Wahnsitt nah Windsor Castle verleggt un hollt sück siether blots noch dree Daag pro Week (begäng van Dienstag bis Dönnerdag) to Arbeitszwecken in den Londoner Buckingham Palace up. Hör Anwesenheit sücht man an de königlichen Wappenstandarte up den Round Tower, wiels in hör Afwesenheit dor de Union Jack weiht.

De meesten Könige un Königinnen van England harrn direkten Infloot up de Konstruktschoon un de Entwicklung van dat Slott, dat hör to hör Tieden jewiels as Garnison, Festung, Wahnhuus, offizieller Palast un af un to ok as Gefängnis deent hett. Hüüd deenen de Bauwarken sowohl as Museum as ok för staatlich Veranstaltungen as ok to privaten Zwecken van de Königin. De Geschichte van dat Slot tun de van de britisch Monarkie sünd nich to trennen mitnanner verbunnen. De Geschichte van dat Slott lett sück chronologisch dör de Herrschapstieden van de Monarken, de dat in’t Eegendom harrn, nahvulltrecken. Wenn sück dat Land in’n Freeden befunn, wurrn to dat Slott groot un prächtig Zimmer tofüügt. In Kriegstieden wurr dat Slott dorgegen starker befestigt. Dit Muster gifft dat bit hüüd.

Grundreet van dat Slott[ännern | Bornkood ännern]

Luftbild van Windsor Castle – van links nah rechts: Ünnere Hoff (Lower Ward), Mittlerer Hoff (Middle Ward) mit Motte un Rundtoorn (Round Tower), Böverer Hoff (Upper Ward), baben links in dat Bild de Themse
A: Rund Toorn (Keep) B: Böverer Hoff (dat „Veereck“) C: Staatsgemächer D: Private Gemächer E: Südflögel F: Ünnere Hoff G: St George’s Chapel H: Hufiesenkloster (Horseshoe Cloister) K: Door van König Heinrich VIII. (Hööftingang) L: De Lang Weg (The Long Walk) M: Normannsch Door N: Nordterrasse O: Toorn van Eduard III. T: Glockentoorn (Curfew Tower)

In sien duusendjohrig Geschichte hett sück dat Slott entsprekend den bevörtoogten Baustilen, Vörleeben, wat maakt wurrn muss un de finanziellen Mögelkeiten van de upnannerfolgen Monarken ännert un entwickelt. Up den nebenstahn Plaan sünd de wichtigsten Bauwarken van dat Slott indragen. Dat hüüdige Slott gruppert sück immer noch um de Motte (A), en künstlichen Eerdhümpel. Dorup hett Wilhelm de Eroberer de eerste holzen Borg upricht. Dat wiethen sichtbar Wohrteeken van dat Slott, de Rund Toorn, is in Wirklichkeit in sien Form nich zylindrisch, sonnern unregelmatig. Dat liggt an den künstlich Eerdhümpel, up dat de steiht. De Grundreet van dat Slott hett sück ut den middelöllerich Befestigungen entwickelt. De Rund Toorn deelt dat Slott in twee ünnerscheedlich Berieken, de so nömmt Hööf. In den Ünneren Hoff (F) befinnd sück de St George’s Chapel (G), wiels in den Böveren Hoff (B) de privaten königlichen Gemächer (D) as ok de Staatsgemächer (C) liggen. De St George’s Chapel is en van de muiesten Bispelen van den Perpendicular Style in England.

To de Staatsgemächern hörrt de St.-Georgs-Hall. DDat is en düchtig groot Ruum, de sien Deck mit de Wappentafeln van de fröheren un hüüdigen Ridder van den Hosenbandorden smückt sünd. Rin in de Staatsgemächern kummt man över de Nordterrassen. In de Gemäldeutstellung sünd Warken van Michelangelo un Leonardo da Vinci to sehn un in‘n Vestibül Ridderrüstungen as ok de Kugel, dör de 1805 Admiral Nelson wiels de van hüm spoodriek führt Slacht van Trafalgar gegen de Flotte van Napoleon to Dood keem. In‘n Queen’s Ball Room finnd de Besöker wertvull Gemälde van Rembrandt, Peter Paul Rubens un Anthonis van Dyck. Neben Slott Windsor befinnd sück de Home Park, in den sück ok Frogmore mit dat Mausoleum van Königin Victoria un Prinz Albert befinnd.

In den Curfew Tower (T) sünd Reste van dat Gefängniss ut dat 13. Johrhunnert to sehn. All dree Stünn speelt ut den Toorn en Glockenspeel.

De Albert-Memorial-Chapel wurr oorsprünglich van Heinrich VII. as Graffkark baut, he wurr aber in de Westminster Abbey bisett. Königin Victoria leet de Kapell nah den Dood van hör Mann Prinz Albert 1861 to en Gedenkstäe för hüm umbauen.

Geschichte van dat Slott[ännern | Bornkood ännern]

Grünnen[ännern | Bornkood ännern]

Wilhelm de Eroberer hett den Mönken van Westminster Abbey dat Grundstück afköfft un leet af 1078 en Holtborg uprichten. Ünner Heinrich I., sien Söhn, sünd de eerst Steenhüüs entstahn.

Heinrich III. hett den Bau van de eerst modern Befestigungen, ünner annern den Zappenstriek-Toorn ("Curfew Tower") up den Weg brocht. De 24 m hooch Round Tower wurr in de Regeerenstiet van Eduard III. baut, de 1312 hier boren wurr. He hett de olt Borg afrieten laaten, de ünner Wilhelm den Eroberer upricht wurrn weer, un hett den Utbau van de Borg to en Resident up den Weg brocht, deren Grundreet bit hüüd nich afännert wurr.

Windsor Castle af 1350[ännern | Bornkood ännern]

Ünnerer Hoff mit St George’s Chapel un Rund Toorn 1848

König Eduard III. wurr 1312 up Slott Windsor boren. Faken wurr he dorum ok Eduard von Windsor nömmt. Af 1350 gung he en 24 Johr düern Umbauprogramm an, bi dat he dat bestahn Slott bit up den Glockentoorn (T) un en paar lütt Butenanlagen afrieten leet. Den Updrag van den Umbau un Umgestalten van dat Slott kreeg William von Wykeham. De Bargfried van Heinrich III. (de Runn Torrn) wurr dör den immer noch vörhannen Toorn ersett. De hüüdige Hööcht kreeg he aber eerst in dat 19. Johrhunnert. Ok de Befestigungen wurrn wieder verstärkt un de Slottkapell bedüüdend vergröttert. Plääns, en nee Kark uptorichten, wurrn aber nich umsett, wohrschienlich, wiel man to wenig Arbeitskräfte un Middeln nah Utbröök van den Swaart Dood harr. Ut disse Tiet stammt ok dat Normannsch Door (M). Dit groot Door an den Foot van den Runn Toorn is de letzte Befestigung vör den Böveren Hoff (B), um den sück de königlichen Gemächer gruppeeren.

In dat Johr 1348 hett Eduard III. den Hosenbandorden grünnd, de sien jährliche Tosommenkunft in de St George’s Chapel fiert wurrd, de Hööftkapell van dat Slott.

Wiels de Herrschap van Richard II. in dat Johr 1390 hett man faststellt, dat för de St.-Georgs-Kapell de Gefohr bestunn, dat se tosommenfallen dee, man de hett dorum nee maakt. De Baas van de Arbeiten weer en van de Favoriten van Richard II., Geoffrey Chaucer. He weer Diplomat as ok Baas van de königlichen Bauprojekte. Hör eng Verbunnenheit düer över de gesamte Herrschapstiet van Richard II. In dat Johrteint vör den Dood van Chaucer hett hüm Richard mehrere Geschenke un Renten tokommen laaten, dorünner 1394 en Bedrag van 20 £ in dat Johr up Levenstiet as ok 1397 en en Leefern van 955 Liter Wien in (252 Gallonen) jedes Johr. Chaucer is an’n 25. Oktober 1400 storven. Wat ok immer sien Fähigkeiten as technisch Saakverständiger un Bauherr ween hemm möchte, binnerhalv van 50 Johren weer de Kapell weer baufällig.

König Eduard IV. (1461–1483), den eersten König ut dat Huus York, wurr nahseggt, dat he süchtig nah de Förderung van den eitlen Prunk ween hemm sall. He fung an mit den Bau van de St George’s Chapel in hör hüüdig Form. Tatsächlich is de Kapell, de af 1475 in hör hüüdig Form upricht wurr, ehrder en lütt Utgaav van en Kathedrale un en königlich Mausoleum. Se is in Perpendicular Style upricht. Wiels de Herrschap van Heinrich VII. wurr en Deel van de Kapell afreeten, um Ruum för de Marienkapell (Lady Chapel) to schaffen, deren Bau later van den König afbraaken wurr. Dat Bauwark van de Kapell weer en van de eerst prächtigen Architekturwarken up dat Borggelände.

Dat Uprichten van de Kapell stell en Wennenpunkt in de Architektur van dat Slott dor. Dat fastere politische Klima nah dat Enn’n van den Rosenkriege führ dorto, dat bi de lateren Vergrötterungen un Umbauten ehrder Gestaltung un Bequemlichkeit in‘n Mddelpunkt stunnen, nich, as tovör, starkere Befestigung. Up disse Wies änner sück de Charakter van de Borg van en königlich Festung to en königlichen Palast. En Bispeel dorför is de Hufiesenkrüüzgang (Horseshoe Cloister) ut dat Johr 1480, de dicht bi de Kapell upricht wurr, um de Kleriker ünner to bringen. Dit swungen Backsteengebäude sull de Form van en Peerfoot hemm. Dat weer en Afteeken van Eduard IV. 1871 wurrn Restaureerensarbeiten vörnommen, um den gröttsten Deel van de oorsprünglich bruukt Baumaterialien bi Siet to packen.

Van de Festung to’n Palast[ännern | Bornkood ännern]

Rotwild löppt dwars över den "Long Walk" (L), de dör den "Windsor Great Park" to dat Slottführt

Eduard III. weer de Monark, de den Umbau van de Borg van en Festung hen to en komfortablen Palast anfung. Vergleeken mit den königlichen Residenzen as Whitehall un Nonsuch bleev Windsor aber achtern. König Heinrich VIII. (Herrschap 1509–1547) hett den Hööftingang van dat Slott (K) um 1510 nee upricht. Dorbi wurr de so platzeert, dat en Angrieper nahdem he dat Door överwunnen harr en Kamp bargup führen muss. Dat Wappen över den Doorbagen un dat Fallgitter wiest dat Granatappelwappen van de eerst Königin van Heinrich VIII., Katharina von Aragón.

De Söhn un Nahfolger van Heinrich VIII., König Eduard VI., schreev as Jung wiels sien Upenholt in dat Slott sinngemäß: „Ick denk, ick bin in en Gefängnis hier, dat gifft wedder Galerien noch Gordens to’n Spazeerengahn hier.“

De Süster van Eduard VI., Königin Elisabeth I. (Herrschap 1558–1603) verbroch den gröttsten Deel van hör Tiet up Slott Windsor un hull dat för den sekersten Oort in hör Königriek. In Tieden van de Anspannung truck se sück hierhen torüch. Se gung dorvan ut, dat dat Slott, wenn dat ween muss, ok en Belagern wedderstahn kunn. Ofschons se also dat Slott ok woll as Festung sehn hett, droog se ebenfalls to de sien Umgestaltung to en bequem Residenz bi. So leet se de Nordterrasse as Oort van de Lievertüchtigung herrichten un leet doröver en överdaakt Galerie anleggen. Dat is en fröh Bispeel van en Wintergorden. Dat Gebäude is wietgahnd in sien oorsprünglich Form erhollen bleeven. Dat enthollt en düchtig grooten Kamin ut de Tudortiet. Hüüd is dor de königliche Bibliothek ünnerbrocht.

Engelsch Börgerkrieg[ännern | Bornkood ännern]

Nah Elisabeth I. folg Jakob I. up den Thron. Dornah gung de Herrschap up de sien Söhn Karl I. över. Beid hemm kien bedüüdend Umbauarbeiten an dat Slott maakt. Nahdem man Karl I. afsett harr wurr dat Slott to dat Hööftquartier för Oliver Cromwell sien New Model Army. Windsor Castle full all kört nah Utbröök van den Engelsch Börgerkrieg an de Parlamentstruppen. Dat hett man den dör’t Ohr brennt Obersten John Venn to verdanken. Prinz Ruprecht von der Pfalz keem wenig Daag later in Windsor an, um de Stadt un dat Slott torüch to erobern. He hett woll de Stadt düchtig beschaaten un verneelt, alleen dat Slott kunn he nich innehmen. Venn bleev bit 1645 Slottgouverneur.

Ünner de Kontroll van de Parlamentstruppen wurr dat Slott temelk verneelt, aber ok nich so, as man dat för en sinnbildlich Symbol van de Monarkie verwachten kunn. De dor ünnerbrocht Garnison kreeg aber to wenig utbetallt, un dat wurr hör erloovt, de königlichen Wertgegenstände to plünnern. Wiels de Periood van den Commonwealth bleev dat Slott militärisch Hööftquartier as ok Staatsgefängnis för bedüüdend fangen nommen Royalisten (Königstrüe). Karl I. weer vör sien Henrichtung 1649 för en körten Tiet in Windsor Castle in Haft. Nah hüüdig Maatstaff weer dat aber ehrder en Huusarrest as Haft. Nah de Henrichten van den König wurr Grootbritannien bit to de Rückkehr van de Monarkie 1660 van Cromwell regeert. De Liek van Karl I. wurr in en dunkel Nacht wiels en Schneestorm nah Windsor schmuggelt, um dor ahn Fierlichkeiten in en Gewölbe ünner den Chor van de St George’s Chapel neben den Sargen van Heinrich VIII. un sien Fru Jane Seymour bisett to wurrn.

De Restauratschoon van de Monarkie 1660[ännern | Bornkood ännern]

Nah de Restauratschoon van de Monarkie 1660 wurr Slott Windsor, dat völ Johr lang nich ännert wurrn weer, nu weer bedüüdend umgestalt. Karl II. hett sück düchtig Möe geeven, de in’n Börgerkrieg entstahn Schaden an dat Slott uttobetern un dat nee uttustatten. To disse Tiet wurr in Frankriek Slott Versailles upricht, un mit den Gedanken doran in’n Achterkopp leet Karl II. de Allee van den Langen Weg (The Long Walk, L) anleggen. De Allee steekt südlich van dat Slott af un hett en Längt van 4,8 km (3 Mielen) un en Breedt van 80 m. De oorsprünglich van den König plant Ulmen an de Sieden sünd intüschen dör Eddelkastanien un Platanen ersett wurrn. De Lang Weg is nich de eenzige Deel, de van Slott Versailles inspireert wurr. Karl II. hett den Architekten Hugh May den Updrag geven, de königlichen Gemächer un de St.-Georgs-Hall umtobauen. May hett de oorsprünglichen Gemächer ut de Tiet van de Plantagenets an de Nordterrasse dör dat wörpelförmige Steernbauwark (Star Building) ersett. Disse Gemächer wurrn mit Deckengemälden van Antonio Verrio un Snitzereen van Grinling Gibbons utsmückt. De König hett ok Wandteppiche un Biller köfft, um de Rüüms uttostatten. Disse Kunstwarken weern de Grundstock för de königliche Sammlung van hüüd, de Royal Collection. Dree van de Rüüms sünd wietgahn unverännert bleeven: dat Upenholtszimmer un dat Audienzzimmer van de Königin, de beid för de Ehfru van Karl II., Katharina von Braganza gestalt wurrn, un de Spiesensaal van den König. In disse Rüüms sünd sowohl de Deckengemälde van Verrio as ok de Wandvertäfelungen van Gibbons erhollen. Oorsprünglich geev dat aber 20 Rüüms in disse Utstattung. Eenige van Gibbons sien Arbeiten wurrn aber rett, wenn dör Umbauten oder Restaureeren Ännerungen dörführt wurrn. In dat 19. Johrhunnert wurrn disse Snitzereen denn in de nee Binnenutstattung van den Thronsaal van den Hosenbandorden as ok in de Waterlookamer mit inbaut.

Dat 18. un 19. Johrhunnert[ännern | Bornkood ännern]

Slott Windsor, Ostflögel. Dor befinnen sück de privaten Gemächer

Nah den Dood van Karl II. in dat Johr 1685 leet man dat mit dat Erhollen van dat Slott in de Loop van de Tiet wat schliepen. Wiels sück up dat Slottgelände un den Park en Rieg van bewahnt königlich Gebäude befunnen, hemm de Monarken aber lever an anner Öörd wahnt. Wiels de Herrschap van Wilhelm III. un Maria II. (1689–1702) wurr Hampton Court Palace vergröttert un in en gewaltigen modernen Palast umwannelt. Königin Anne hett later lever in en lütt Huus dicht bi de Müern van dat Slott leevt. Eerst 1804 hett König Georg III. as Vader van 13 Kinner en gröttere Resident bruukt, de aber annerswo nich to finnen weer, so dat dat Slott weer vullstännig bewahnt wurr. De Umbauten ut de Tiet van Karl II. hemm den dormals anseggten klassischen Baustil wedderspeegelt. Inigo Jones harr to Tieden van Karl I. den Palladianismus in England inführt. Georg III. funn dissen Baustil för en so olt Slott nich passend un leet völ van de Fenster ut de Tiet van Karl II. mit gotischen Spitzbagen versehn. So kreeg dat Slott weer sien middelöllerich Utsehn, Wiels disse Epoche wurr Windsor Castle weer en Oort van königlichen Huusarrest. 1811 full Georg III. in en Tostand van düersam geistig Umnachtung un muss to sien eegen Sekerheit up dat Slott inslooten wurrn. Wiels de letzt negen Johr van sien Leven hett he sien Gemächer up Slott Windsor blots selten verlaaten.

In de Tiet van de Herrschap van Georg IV. tüschen 1820 un 1830 funnen de deepgriependst Umbauten in de Slottgeschichte statt. Georg IV., de för sien extravaganten Gebäude Carlton House un den Royal Pavilion ut de Tieden van sien Regentschap bekannt weer, kunn dat Parlament dorvan övertüügen, hüm 300.000 £ för de Restaureeren to bewilligen. De Architekt Jeffry Wyatville wurr utwählt, un de Arbeiten fungen 1824 an. De Umbauten hemm 12 Johr düert. Dorbi wurrn de Bövere Hoff, de privaten Gemächer (D), de Rund Toorn (A) un de Butenfassade van den Südflögel (D) kumplett umgestalt. Dat geev dat Slott sien meest symmetrische Fassade, as se van de Allee van den Langen Gang sichtbar is.

Wyatville weer de eerste Architekt, de dat Slott as en Gesamtwark sehn hett, statt en Ansammlung van verscheeden Hüüs un ünnerscheedlich Epochen un verscheeden Baustilen. As Architekt weer he för indrucksvull Symmetrien, wiels dat Slott as Produkt van en johrhunnertelang Entwicklung tonächst kien Eenheitlichkeit wies. Wyatville hett dit Ensemble van Gebäuden an’n Böveren Hoff en gewisse Symmetrie updwungen, indem he eenig Toorns upstocken leet, um de up glieker Hööcht as anner Toorns to bringen. Buterdem kreegen all Gebäude an’n Böveren Hoff en gotische Fassade mit Tinnenkranz, um mit de middelöllerich Bauwarken gliek to ween. Dat glieker passeer mit de St George’s Chapel in’n Ünneren Hoff. De Rund Toorn weer all immer en drungen Bauwark ween, mit de nu höhgeren Bauwarken an’n Böveren Hoff full dat aber noch mehr up. Wyatville hett dit Problem aber överwunnen, indem he up den Rund Toorn en holl steenern Kroon bauen leet, wenn man so will en Bövergeschossattrappe. Disse Attrappe is 10 hoch un verleeht dat gesamte Slott sien dramatische Silhouette, de över völ Kilometer sichtbar is.

Ok de gröttste Deel van de Binneninrichtung van dat Slott wurr överarbeit. Völ van de Staatsgemächer ut de Tiet van Karl II., de nah de Umbauten ünner Georg III. nich ännert wurrn weern, wurrn nu in’n gotischen Stil nee utstatt. Dat hett vör allen de St.-Georgs-Hall bedrapen, de nu düppelt so lang wurr, as bither. Wyatville leet ok en Binnenhoff mit en Daak versehn, um de Waterlookamer to schaffen. Disse gewaltige Hall, de mit Hülp van Bövergaden in Lucht sett wurr, fier de Sieger van de Slacht vun Waterloo un wurr mit Porträts van de verbünnd Monarken utstatt, de Napoléon Bonaparte vernicht harrn. An de groot Tafel in de Midden van de Kamer könnt 150 Personen sitten.

Dat Wark weer bi den Dood van Georg IV. 1830 noch nich fardig, kunn aber noch meest tietgliek mit den Dood van Wyatville 1840 afslooten wurrn.

Victoriaansch Epoche[ännern | Bornkood ännern]

Königin Victoria un Prinz Albert hemm Windsor to hör Hööftresidenz maakt. An dat Slott hemm se nich völ ännert, dorför wat mehr an den umliggend Park. Besünners en van dat Parlament 1848 verafscheed Gesett hett dat erloovt, olt Weeg to sluuten oder umtoleiten, de tovör dör den Park van Windsor in Richt Datchet un Old Windsor verleepen. Disse Ännern hett de königlich Familie de Mögelkeit geven, en grooten Deel van den Park för dat normal Volk to sparren un en Privatpark to schaffen. Up dat Gelände van den Park wurr dich bi Frogmore House en Mausoleum erricht, in dat Victoria un Albert begraven sünd.

Königin Victoria truck sück nah den Dood van hör Mann 1861 in de Afscheedenheit van dat Slott torüch. Van dissen Tietpunkt an bi t o hör Dood 1901 hett se sück meest blots dor uphollen un hett den Buckingham Palace blots noch selten besöcht. De Zimmers van hör Mann wurrn nah sein Dood nich ännert. Un ofschons sück en gewisse Atmosphäre van de Melancholie för den Rest van dat 19. Johrhunnert över dat Slott legg, wurrn aber trotzdem noch eenige Verbeterungen un Restaureeren dörführt. 1866 hett Anthony Salvin de Groot Trapp in den Staatsgemächern schafft. De Hall, in de se sück befinnd, is mit Wappen un Rüstungen utstatt, dorünner en Rüstung, de van König Heinrich VIII. in dat Johr 1540 anfertigt wurr. De böveren Trappenstuufen wurrn van levensgroot Peerstandbiller mit upsitten Riddern in Rüstung flankeert. Dit Thema van de Dekoratschoon sett sück bit in de Kamer van de Garde un dat Vörzimmer van de Königin fort. Salvin hett ok den Glockentoorn (T) den kegelförmigen Daakupsatz in‘n Chateaustil toföögt.

Dat Slott in dat 20. Johrhunnert[ännern | Bornkood ännern]

Windsor Castle un de Themse, van Eton ut sehn
Windsor Castle / Ingang
Blick in de St George's Hall
Queen Victoria in Windsor

Nah de Thronfolg dör König Eduard VII. iin dat Johr 1901 bleev dat Slott faken för längere Tiet nich bewahnt, de König hett sück lever in anner Paläste uphollen. He keem aber in de Week van dat Peerrennen in Ascot un to Ostern nah Windsor. De Anlaag van en Golfplatz weer en van de wenigen Ännnern, de he vörnehmen leet. Ok de Nahfolger van Eduard VII., Georg V., de van 1910 bit 1936 herrschen dee, weer ok lever up anner Landsitten. Sien Fru aber, Königin Maria, weer en groot Kunstleevhebberin. So hett se nich blots versöcht, ehmals verköfft Slottgegenstände torüch to koopen, sonnern hett ok völ nee Kunstwarken köfft, um de Staatsgemächer weer smucker to maaken. Se leet ok den Gebruuk van dat Slott nee utrichten, indem se de barocke Vörstellung upgeven hett, nah de en groot Affolg van Staatsgemächern in dat Eerdgeschoss för de wichtigen Gäste reserveert weer. Stattdessen leet se in dat Bövergeschoss bequeme Slaapzimmer inrichten, so dat de tovör reserveerten Rüüms in dat Eerdgeschoss nu to dat Ünnerhollen un för Hofffunktschonen to Verfügung stunnen. Dat Staatsslaapzimmer sülvst wurr so bibehollen, dat aber ehrder ut historsch Interesse. Siet 1909 is dat nich mehr as Slaapzimmer bruukt wurrn.

Wiels den Eersten Weltkrieg hett dat de königliche Familie as notwennig ansehn, hör dynastischen Naam to ännern. Dat düütsch Huus van Sachsen-Coburg-Gotha wurr nah dat Slott nu in Huus Windsor umnömmt. Königin Mary weer as Leevhebberin van miniaturiseerten Dingen bekannt. Dorum wurr van en Cousine van hör 1921–24 en so nömmt Puppenhuus för hör anfertigt, dat en groot aristokraatsch Huus nahbildt weer. Dat wurr van den Architekten Edwin Lutyens schafft. De Möbel un Biller wurrn van führend Handwarker un Designern van de 1920er Johren anfertigt. Queen Mary’s Dolls’ House bildt hüüd en van de völ Touristenattraktschonen van dat Slott.

König Georg VI. besteeg 1936 den Thron nahdem sien Bröer afdankt harr. Eduard VIII. hull sien in dat Radio överdragen Afdankensreed an dat Britisch Empire in en van de Rüüm van dat Slott Windsor. Wiels sien kört Herrschap harr he aber leever in sien in Fort Belvedere in’n Slottpark van Windsor leevt. Georg VI. un sien Fru Königin Elizabeth trucken ebenfalls in hör fröhere Wahnen in de Royal Lodge in Windsor in. Bi Utbröök van den Tweeten Weltkrieg 1939 nehm dat Slott weer sien Rull as königliche Festung in, un dat Königspaar as ok hör Kinner Prinzessin Elisabeth un Prinzessin Margaret hemm ut Grünnen van de Sekerheit up dat Slott wahnt. De König un de Königin sünd jeden Dag nah London fohren un keem abends weer torüch. To de Tiet weer dat aber en groot Geheimnis, wiel to Propagandazwecke un wegen de apenlich Moral immer bericht wurrn is, dat de König de ganze Nacht över in’n Buckingham Palace blieven wüür. Nah dat Kriegsenn‘ 1945 hett de Familie Slott Windsor verlaaten un is weer in de Royal Lodge trucken.

Königin Elisabeth II. hett 1952 entscheeden, Windsor to hör Törüchtreckoort an’n Weekenenn‘ to maken. Dorto hett se de Privatgemächer (D), de siet de Tiet van Königin Maria nich dörgahnd bewahnt ween weern, renoveeren un wieder moderniseeren.

An‘n 20. November 1992 is in de Privatkapell van de Königin en Füer utbraken, dat sück flink utbreeden dee. Utlööst wurr dat dör en Halogenstrahler, de en Vörhang in Brand setten dee. 15 Stünn hett dat Füer brennt und orbi negen van de wichtigstes Staatsgemächer zerstört. Wiedere Rüüms wurrn swoor beschädigt. De Gebäude an’n Böveren Hoff wurrn insgesamt beschädigt, van dat Slott full een Fieftel den Brand to’n Opfer, insgesamt harr also en Gebäudeflach van 9000 m² Schaden nommen. De Renoveerensarbeiten hemm fief Johr düert. 70 Perzent van de Kösten kunnen dör dat eerstmalig Apenmaaken van de Staatsgemächer van den Buckingham Palace för de Apenlichkeit upbrocht wurrn. De Gesamtkösten för de Reparatur hemm 37 Millionen Pund (50 Millionen Euro) bedragen. De Restaureeren wurr so detailgetrüe vörnommen, dat de Ünnerscheed tüschen olt un nee blots swoor to sehn is. De private Kapell, de Laternenlobby un de nee Deck van de St.-Georgs-Hall wurrn in’n historschen Stil nee gestalt. De Hall is dorbi mit Grööneeken utstatt wurrn, en Technik, de man all in dat Middelöller bruukt hett. Weniger to sehn is, dat de Restaureeren to bedüüdend technisch Vebeterungen führt hett, besünners in de Anordnung van de apenlich Rüüms un de Dienstrüüms. Blots en lütt Henwiestafel an den Oort van den Brandutbröök wiest de Besöker noch up den Brand hen.

Sekerheit[ännern | Bornkood ännern]

De Sekerheit van den Palast wurrd hööftsächlich dör de Thames Valley Police as ok dör en Afdeelen van de Londoner Metropolitan Police wohrnommen, de för den Schuul van de königlich Familie as ok van de Diplomaten toständig ist. Dorneben leisten Bataillone van de Foot Guards van de Household Division as ok de Victoria-Kaserne in Windsor in’n Rahmen van de Palastwaak van Windsor Waakdeenst.

Wichtige Ereignisse[ännern | Bornkood ännern]

Literatur[ännern | Bornkood ännern]

  • Raymond South: The Book of Windsor. The Story of a Royal Town. Barracuda Books, Chesham 1977, ISBN 0-86023-038-4.
  • Neville Williams: Royal Homes of Great Britain. From medieval to modern Times. Lutterworth Press, London 1971, ISBN 0-7188-0803-7.
  • Barrington J. Hill: Windsor Castle. The history and treasures of Windsor Castle. Pitkin Pictorials, London 1972, ISBN 0-8537-2012-6.

Weblinks[ännern | Bornkood ännern]

Commons-logo.svg Windsor Castle. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten: 51° 29′ 2″ N, 0° 36′ 16″ W