Balmoral Castle

Balmoral Castle is en Slott, dat an den Stroom Dee ünnerhalv van den Barg Lochnagar in de Civil parish Crathie and Braemar^[1] in Aberdeenshire, Schottland liggt. De Naam „Royal Deeside“, de de Landschap an den Böverloop van den Dee beteekent, geiht up de königlichen Eegendömer torüch. Dat is hüüd de Sömmerresidenz van Elisabeth II., de britisch Königin. Se hollt sück dor tüschen August un Oktober för etwa twalf Weeken up. Dat Slott is dat private Eegendom van de Monarkin un nich Deel van den Crown Estate.

Geschichte[ännern | Bornkood ännern]

Dat Slott wurr in dat 14. Jorhunnert as Sitt van Sir William Drummond baut. Dat Rebeet harr tovör König Robert II. as Jagdrevier deent. In de Folgetiet hett dat Slott, dat allerdings bedüüdend lüttger as dat hüüdige is, mehrfack den Eegendömer wesselt, bit dat van James Duff, 2. Earl Fife, köfft wurr. De hett dat Slott 1848 an Königin Victoria un Prinz Albert as Urlaubsdomizil verhüert. Wiel beid van de schottisch Landschap andahn weern, hett Albert Balmoral Castle van den Earl as Privatbesitt köfft (wiels de offizielle Residenz van den jewieligen Monarken in Schottland bit hüüd Holyrood Palace in de Hööftstadt Edinburgh is, den de Queen jedes Johr för etwa een Week bewahnt).

De Landsitt umfaat etwa 243 km², worto ok mehrere lütt Dörper hörrn. Etwa 50 Mitarbeiter sünd dat ganze Johr över up Balmoral beschäftigt, etwa düppelt so völ tosätzlich in de Saison.

De Gebäudekomplex[ännern | Bornkood ännern]

De oorsprünglich van Queen Victoria anhüert Landsitt Balmoral weer 1830 van den schottischen Architekten John Smith umbaut wurrn. Mit Bau un Planung van dat hüüdige Slott Balmoral wurr 1853 sien Söhn William Smith, siet 1852 Stadtarchitekt van Aberdeen un Schöler van William Burns beupdragt. Burns hett sück wiels de Bauarbeiten an Prinz Albert wennd un hett sien ehmalgen Schüler bezichtigt, dat de sien Ideen un Plääns afschreeven harr – aber ahn Spood.^[2]

Eerste Skizzen to’n Bau harr Prinz Albert sülvst to Papeer brocht. Maatgevend wurr dorbi de Scottish Baronial Stil mit neugotischen Elementen, de dorbi ehrder düütschen denn engelsch Vörbiller entlehnt sünd; insbesünnere den Fassadendetails as ok den Toorns un de Gestaltung van de Fenster gull sien Interesse.

De Grundsteen för den Neebau nordwestlich van dat bestahn Herrenhuus wurr an’n 28. September 1853 leggt. 1855 weer de eerste Bauafsnitt mit den königlichen Appartements fardig stellt, dat Johr dorup weern de Personalquartiere un de Toorn fardig. As Baumaterial wurr hööftssächlich Granit bruukt, de up den to’n Balmoral Estate hörrn Steenbröök van Invergelder wunnen wurr.

Dat Slott besteiht ut twee jewiels dree Etagen hooch, mitnanner verschränkt quadratischen Baukörpern, de jewiels en Binnenhoff umsluuten. In den südwestlichen Gebäudedeel befinnen sück de offiziellen Rüüms un de königlichen Slaaprüüms, in den nordwestlichen Deel de Köken, Wertschapsrüüms, Lagerrüüms, Nebenrüüms un de Personalzimmer. An de Südostsiet slutt sück de 24 Meter hooch Klocktoorn an – as Vörlaag deen de Toorn van Craigievar Castle. All tosommen befinnen sück in dat Slott Balmoral över 70 Zimmer.^[3]

1856 weer dat nee Slott sowiet, dat man intrecken kunn, dat olt Anwesen wurr kört dorup afreeten. In’n Harvst 1857 wurr ok de van Isambard Kingdom Brunel entworfen nee Brügg över den Dee, dat Slott Balmoral mit de rund 800 Meter östlich liggen Oortschap Crathie verbinnen deiht, fardig stellt.

De Kösten för den Bau hemm den Kooppries um mehr as dat 15-facke översteegen. Blots dör en groot Arvschap, de Königin Victoria kört tovör kreegen harr, kunnen disse Maatnahmen betallt wurrn. In de folgend Johrteihnten wurrn um dat Slott bzw. up dat Gesamtanwesen tallriek Nebengebäude nee upricht un dat Slott sülvst um en Ballsaal utwiet.

Siet 1987 is dat Slott up de Rücksiet van de van de Royal Bank of Scotland utgeeven 100-Pund-Noten dorstellt.^[4]