Wikipedia:Platt, wo schriev ik dat?

Vun Wikipedia

Veel Lüüd sünd bang vör dat Schrieven op Plattdüütsch, dor gifft dat aver keen Grund to.

Ach, nee, ik kann bi Wikipedia nich mitmaken. Ik weet doch gor nich de rechte Schrievwies för Plattdüütsch …[Bornkood ännern]

De rechte Schrievwies för dat Plattdüütsche... Dat is würklich so’n Saak. Dor hebbt sik al veel Lüüd en Kopp üm maakt. Wi hebbt seggt, för de plattdüütsche Wikipedia wüllt wi uns geern so’n beten an de Schrievwies vun Sass hollen.

Wenn du di aver mit Sass nich utkennst: Dat maakt würklich gornix! Schriev vun uns ut as di de Snavel wussen is! Solang du man schriffst! Wi freit uns dusendmal duller över en Artikel in en beten kruse Schrievwies as wenn du gorkeen Artikel schriffst!

Een Saak dröfft wi nich vergeten: Nüms vun uns hett Plattdüütsch schrieven in’e School lehrt. Also kann sik ok nüms blameren. Richtig un verkehrt gifft dat gornich. Un wi hebbt all kleen anfungen un uns ganz suutje en bestimmte Schrievwies toleggt. Soveel is gewiss: De Schrievwies kummt mit dat Schrieven. Wenn du eerstmal en beten wat schreven hest, denn fallt de Schrievwies ok jümmer lichter.

Ach, nee, ik kann bi Wikipedia nich mitmaken. Mien Plattdüütsch is bestimmt veel to slecht …[Bornkood ännern]

Dat gifft ganz gewiss Plattdüütsch dat beter is un Plattdüütsch dat slechter is. Aver bedenk di ene Saak: Wenn du dien Plattdüütsch nich bruukst, denn fangt dat dat Rusten an. Beter warrt dat dorvun nich. Un op de annere Siet: wenn du dien Plattdüütsch bruken deist, denn warrt dat jümmer beter! Dat kummt faken vör, dat wi bi dat Plattsnacken hoochdüütsche Wöör bruukt, wenn uns dat rechte plattdüütsche Woord jüst nich infallt. Bi dat Schrieven hest du en Vördeel: Du kannst di bedenken. Villicht fallt di noch en good Woord in. Un wenn nich: Dat maakt ok nix, denn schriffst du dat hoochdüütsche Woord rin. Un denn fraagst du eenfach hier op de Wikipedia, op de annern Lüüd nich dat rechte Woord kennt. Wi hebbt dor en extra Siet för: Wikipedia:Mi fehlt dat Woort. Eenfach fragen! Wi överleggt denn tohoop. Un ans laat wi’t eben Hoochdüütsch stahn. Wenn’t anners nix helpt. Blot keen Stress. Wikipedia is keen Dichterweddstried. Schriev man eenfach to!

De Schrievwies[Bornkood ännern]

Wi versöökt hier na Johannes Sass sien Schrievwies to schrieven (Sass’sche Schrievwies). Dat geiht nich üm en eenheitliche Schriftspraak so as bi’n Duden. De Dialekten schöölt blieven. Aver wi wüllt versöken, dat Gemeensame to ünnerstrieken un dat, wat trennt, en beten to minnern. Wenn de ene Iisenbohn schrifft un de annere schrifft Isenbaan, denn süht dat temlich verscheden ut. Kann aver good angahn, dat all beid dat temlich gliek utspreken doot, as [iːzn̩bɔːn]. Na Sass warrt dat Woord Iesenbahn schreven. So is dat licht weddertokennen. Sass heet aver nich, dat Lüüd, de tohuus [iːzɐbɔːn] seggt, nu ok Iesenbahn schrieven schöölt. Na Sass schöölt se geern Ieserbahn schrieven, man blot nich Isabohn, Iserban oder noch annere Schrievwiesen.

Wenn du vun Sass sien Schrievwies nix afkennst, denn maakt dat aver ok nix. Solang dat man Plattdüütsch is, freit wi uns över allens, ganz egal wo dat schreven is!