West of the Divide
| Filmdaten | |
|---|---|
| Plattdüütsch Titel: | — |
| Originaltitel: | West of the Divide |
| Düütsch Titel: | Flussabwärts |
| Produkschoonsland: | USA |
| Johr vun’t Rutkamen: | 1934 |
| Läng: | 54 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Robert N. Bradbury |
| Dreihbook: | Robert N. Bradbury un Oliver Drake |
| Produkschoon: | Paul Malvern |
| Musik: | Dave Stoner |
| Kamera: | Archie Stout |
| Snitt: | Carl Pierson |
| Dorstellers | |
| |
West of the Divide (op plattdüütsch so veel as „In’n Westen vun de Scheed“; dt. Titel: Flussabwärts) is de Titel vun en US-amerikaanschen Western ut dat Johr 1934 vun den Speelbaas un Dreihbookschriever Robert N. Bradbury. John Wayne speel de Hööftrull. De Premiere vun den Film weer an’n 15. Februar 1934[1].
Inholt[ännern | Bornkood ännern]
Ted Hayden is mit sien Fründ Dusty ünnerwegens, de em vör twölf Johren dat Leven reddt hett. Ted söcht na sien lütten Broder, de as Baby dormols vun den Mann roovt worrn is, de kort vörher sien Vadder dootschaten hett. As de beiden en Poos inleggen doot, drapt se op den Verbreker Gat Ganns, de in’t Starven liggt. He sütt meist so ut as Ted un hett en Schrieven bi sik, dat em as Möörder bi en Kerl mit Naam Gentry inföhren schall. Gentry is de Mann, de inst de Farm köfft hett, op de Ted sien Familie vörher leevt hett. Üm mehr över Gentry ruttofinnen, gifft Ted sik as Ganns ut.
Gentry versöcht gliektietig, ok de Farm vun sien Naver Mr. Winter to köpen, de dor aver nich op ingahn will. Vör Brass lett Gentry Winter sien Dochter Fay överfallen, de op’n Weg in de Stadt is, üm Geld na de Bank to bringen. Se warrt vun Gentry sien Lüüd anschaten, warrt aver rechttietig vun Ted un Dusty funnen. Swoor besehrt bringt se ehr na en Doktor in de Stadt. Korte Tiet later kummt Ted op Gentry sien Farm an, woneem he ünner annern ok Spuds drapen deit – en Jung, de vun de Lüüd op de Ranch misshannelt un verstött warrt. Gau faat he Vertroen to Ted. Vun Gentry aver kriggt Ted den Opdrag, den ollen Winter an de Siet to maken. Ted deit so, as weer dat vör em normal un as wull he sien Opdrag glieks utföhren, man in Wohrheit gifft he Wohrschau, so dat Winter sik in Sekerheit bringen kann.
Ansteed, dat he Winter ümbringen deit, vertellt he em vun sien Plaan. Ted geiht dorna torüch na Gentry un vertellt, dat he sien Opdrag achter sik bröcht hett. Gentry, de Ted den annern Dag utbetahlen schall, plaant nu aver, Ted ok an de Siet to maken. Dat kriggt Spuds aver mit un ritt ut. Spuds riddt na Winter sien Farm, üm Ted Bescheed to geven. Dör en Breef, den Spuds bi sik hett, warrt nu ok kloor, dat he de Broder vun Ted is, den he twölf Johren lang nich mehr sehn hett. Dormit nich noog, stellt sik ok noch rut, dat Gentry de Mann is, de jemehrn Vadder ümbröcht hett. Opletzt kummt dat to’n Showdown, bi den Gentry dootschaten warrt. Ted freit si, dat he na all de Tiet sien Broder wedder funnen hett. He un Fay finnt opletzt to’nanner.