Walter A. Kreye
Walter Arthur Kreye (* 2. Juni 1911 in Ollnborg; † 23. November 1991 in Bremen) weer en plattdüütschen Schriever, Schauspeler un Speelbaas.
Leven
[ännern | Bornkood ännern]Kreye is 1911 as Söhn von en Polizist in Ollnborg boren un dor ok opwussen. Na’n Afsluss op de Oberrealschool 1928 hett he ünner annern as Journalist bi den Anzeiger für das Harlinger Land in Esens arbeidt. 1931 warrt he Polizist in Ollnborg. He weer as Soldaat in’n Tweten Weltkrieg un is 1943 in Fangenschop kamen. Bet 1948 weer he in de USA un in Frankriek.
Sien Söhn Walter Kreye is 1942 boren.
To Anfang de Johren 1950 warrt he denn Programmgestalter, Speelbaas un Spreker in’n Heimatfunk von Radio Bremen. 1957 warrt he Baas von’t Afdeel Heimatfunk un blifft dat bet 1974.
Blangen dat weer he ok Schauspeler an de August-Hinrichs-Bühn in Ollnborg un fakener Gastschauspeler un Gastspeelbaas bi dat Nedderdüütsch Theater Bremen. Dat hett he 1963 aver vonwegen Krankheit nageven.
As Schriever hett Kreye en Reeg Stücken för’t Theater schreven, to’n Bispeel de Kummedie Als die Römer frech geworden..., de op en Episood ut sien Höörspeelreeg Fidele Weltgeschicht op Platt opsett oder dat Stück Appeln in Naobers Gaorn, dat ok op Westfäälsch översett worrn is. Ok Warken ut de Weltliteratur hett he as Theaterstück op Plattdüütsch översett, so as John Steinbeck sien Romaan Van Müüs un Minschen. Bi de Höörspelen hett he ünner annern Fitzgerald Kusz sien Swieg still, Jung!, Stinkwoot, Segg doch wat! oder Wolfgang Gerth sien Draumverkaiper maakt.
Dit Stück hett ünner annern ok dat Ohnsorg-Theater speelt, wat siet Anfang de Johren 1970 fakener Stücken von Kreye speelt hett.
Kreye hett en Reeg Höörspelen schreven, so as Eenmaol in’t Jaohr, De Gast oder de Episoden ut de Fidele Weltgeschicht op Platt. Ok welk hoochdüütsche Höörspelen hett he maakt. Ok Stücken von annere Schrievers so as Hinnerk Kruus un Fritz Reuter hett he as Speelbaas as Höörspeel ümsett. Bi dat Nedderdüütsch Höörspeelbook weer he Rutgever.
Ok Spreker in Höörspelen weer he, to’n Bispeel in de Rull as Janjakob Lau in Ivo Braak sien Tein Jahr un dree Daag.
To sien egenstännig Warken as Schriever tellt Dag un Düster över de Normandie von 1962.
Von 1961 bet to sien Dood weer he ok Maat von’n Bund Schlaraffia in Bremen un höört to de Ehrenmaten von dissen Bund.
Priesen
[ännern | Bornkood ännern]Kreye hett 1969 den Richard-Ohnsorg-Pries, 1986 de Senatsmedaille för Kunst un Wetenschop von dat Land Bremen un 1988 den Friedestrom-Pries kregen.
Warken
[ännern | Bornkood ännern]Sprechplatten
[ännern | Bornkood ännern]- Twüschen de tieden, Gedichte in niederdeutscher Mundart (Book mit Schallplaat)
- Fidele Weltgeschicht op Platt, De Hemmannslacht (in de Reeg Niederdeutsche Stimmen)
Schriften
[ännern | Bornkood ännern]- Niederdeutsches Hörspielbuch I (Hrsg.)
- Niederdeutsches Hörspielbuch II (Hrsg.)
- Dag un Düster över de Normandie.
- De Dag höllt sienen Aten an.
- Die Kluckhenne an'n Rathaus zu Bremen, drei Bremer Geschichten.
Kiek ook bi
[ännern | Bornkood ännern]Weblenken
[ännern | Bornkood ännern]- Walter A. Kreye in de Datenbank Die niederdeutsche Literatur (hoogdüütsch)