Viktor Knorre

Vun Wikipedia
Viktor Knorre, üm 1870

Viktor Karl Knorre (* 22. Septemberjul./4. Oktobergreg. in Mykolajiw, Russ’sch Kaiserriek; † 25. August 1919 in Lichterfelde bi Berlin) weer en russ’schen Astronom mit düütsche Afstammen.

Leven un Wark[ännern | Bornkood ännern]

Viktor Knorre weer dat föffte vun föffteihn Kinner ut en olle Familie vun Astronomen. Al sien Grootvadder Ernst Christoph Friedrich Knorre ut Niehalslä bi Meideborg, weer twüschen 1803 un 1810 Beobachter vun de Steernwacht Derpt un Professer för Mathematik an de Kaiserliche Universität in Derpt. Sien Vadder Karl Friedrich Knorre weer bit 1871 Direkter vun de Steernwacht Mykolajiw.

Viktor Knorre weer na Viljandi in Livland schickt, dat he en anmeten Schoolutbilln kreeg. Na sien Afsluss in de School keem he torüch un hett twee Johr lang as Hülpsmann bi sien Vadder an de Steernwacht arbeit. 1862 is he na Berlin gahn un hett dor Astronomie bi Wilhelm Foerster studeert. Na sien Promotschoon hett he 1867 en Steed an de Pulkowo-Steernwacht annahmen, woneem he astronoomsche Bereken maakt hett. In disse Tiet hett he veel Reisen maakt in meteorologische Statschonen nakeken, wobi he jemehr naue Öörd bestimmt un dat Eerdmagnetfeld meten hett.

Knorre güng 1869 na Mykolajiw torüch, woneem he eerst sien jüngeren Süsters un Bröder ünnerricht hett un denn en Schollmeestersteed an de öörtlichen School annehmen de. För sien Arbeit hett he veel Acht kregen, man betahlt weer de Steed nich good. Dorüm güng he wedder torüch na Berlin, woneem sik intwüschen ok sien Vadder daallaten harr.

Vun 1873 an arbeit he opletzt as Beobachter an de Berliner Steernwacht. Ofschoonst he keen Lehramt an de Humboildt-Universität harr, is he 1892 Professor för Astronomie worrn. 1906 güng he in Rohstand un is na Berlin-Lichterfelde in en Dubbelhuus vun Gustav Lilienthal togen, woneem he sien Levensavend verbröcht hett. Lilienthal sülvst wahn in dat Naverhuus[1]. Beide Ehfroen weern Süsters.

An de Berliner Steernwacht hett Knorre en Fraunhofer-Refrakter bruukt. He hett sik vör allen mit dat Beobachten vun Asteroiden, Kometen un Dubbelsteerns befaat. Dorbi hett he ok veer ne’e Asteroiden opdeckt, nämlich (158) Koronis, (215) Oenone, (238) Hypatia un (271) Penthesilea. För’t Bestimmen vun de Asteroidenbahnen hett he en Instrument (en Mikrometer) utklamüstert, dat he in de Astronomischen Nachrichten beschreven hett. Knorre hett an dat Verbetern vun astronoomsche Redschoppen un de äquatoriale Monteren vun Teleskopen arbeit. Ok as he al in Rohstand weer is Knorre wieter aktiv bleven. So hett he in de Johren 1909 un 1911 Arbeiten to en ne’en äquatorialen Monteren vun’n Tyyp Knorre un Heele publizeert, vun de en Prototyyp boet worrn is.

Butendem weer Knorre ok as Schachspeler bekannt. He hett ünner fre’e Partien gegen Adolf Anderssen, Louis Paulsen, Johannes Zukertort un Gustav Neumann wunnen. He hett ok en poor Schachkumpositschonen publizeert

Ehren[ännern | Bornkood ännern]

Knorre is 1887 as Liddmaat vun de Leopoldina wählt worrn. In’t Johr 2010 is na em, sien Vadder un sien Grootvadder de Asteroid (14339) Knorre[2].

Weblenken[ännern | Bornkood ännern]

Borns[ännern | Bornkood ännern]

  1. http://lilienthal-museum.museumnet.eu/archiv/objekt/17096 Dat Dubbelhuus in’t Archiv vun’t Otto-Lilienthal-Museum
  2. Minor Planet Circ. 69493