Aphrodite

Vun Wikipedia
(wiederwiest vun Venus (Mythologie))
Venus von Milo (Paris, Louvre)

Aphrodite (greeksch Ἀφροδίτη), up latiensch Venus, is in de greeksche un röömsche Mythologie de Göddin vun de Leev, vun de Schöönheit un vun dat Hebben willen. Se is een vun de twölf Olympiers. Toeerst weer se tostännig för dat Wassen un up’e Eer kamen, man later is se denn to de Göddin vun de Leev wurrn.

Geboort[ännern | Bornkood ännern]

Hesiod vertellt, se is den Uranos sien Dochter. Den sien Söhn Kronos hett eenen Upstand gegen em maakt un woll de Macht an sik rieten. Bi düssen Striet hett Kronos sienen Vadder de Geslechtsdelen afsneden un achter sik in de See smeten. Siene Mudder Gaia harr em seggt, he scholl dat man so maken. Dat Blood un de Saat hefft sik mit de See vermengeleert un de is denn upschüümt un dor is Aphrodite vun baren. Zephyros hett ehr toeerst nah Kytheira föhrt. Dornah is se an de Küst vun Zypern an Land gahn. Vunwegen datt se naakt un bloot weer, hett se sik een Struuk vun Myrthe vörhollen. Up Zypern sünd de Horen kamen un hefft ehr utstaffeert un bi de Gödder vörstellt. Se is denn in den Olymp upnahmen wurrn un Zeus hett ehr as Dochter annahmen (Theogonie, 182, 91).

As Nonnos un Pausanias dat seggt, is de Göddin Thalassa, «de See», dat ween, de de Saat vun Uranos upnahmen hett.

Μοῦσά μοι ἔννεπε ἔργα πολυχρύσου Ἀφροδίτης,
Κύπριδος, ἥ τε θεοῖσιν ἐπὶ γλυκὺν ἵμερον ὦρσε
καί τ' ἐδαμάσσατο φῦλα καταθνητῶν ἀνθρώπων
οἰωνούς τε διιπετέας καὶ θηρία πάντα,
ἠμὲν ὅσ' ἤπειρος πολλὰ τρέφει ἠδ' ὅσα πόντος•
πᾶσιν δ' ἔργα μέμηλεν ἐυστεφάνου Κυθερείης.

(Homer sien Hymnus. 5,1-6)

Düsse Mythos (wo ok de Ökelnaam Schuumbaren vun herkummt) hett sik woll ut dat greeksche Woort ὁ ἀφρός; aphros – „Schuum“ utspunnen. Hüdigendags warrt annahmen, datt de Naam Aphrodite mit düt greeksche Woort gor nix to kriegen hett, man ut den Orient kümmt.


Man ok anner Geschichten weert vertellt öber de Geboort vun de Aphrodite. Bi Homer is se ganz eenfach de Dochter vun Zeus un Dione. Anner meent, se weer in een Mussel baren, just so as Sandro Botticelli dat maalt hett. Noch anner seggt, se weer mit de Erinyen un de Moiren tohopen een vun de Döchter vun Kronos.

„Venus warrt baren“ vun Botticelli

Aphrodite ehre Leefhebbers[ännern | Bornkood ännern]

Verheiraat weer Aphrodite mit Hephaistos. Dat weer de Gott vun dat Füür un vun de Smeedkunst. Jümmers wedder hett se em bedragen mit Minschen un Gödder. Lang weer se tosamen mit Ares, den Gott vun den Krieg. Mit em hett se de Kinner Eros, Harmonia, Phobos, Deimos un Anteros harrt. Eenmal weer de Saak den Hephaistos to dull un he hett een iesern Nett smeed un de beiden In Flagranti dor in fungen. As he de beiden denn de annern Gödder präsenteeren dö, fungen se dat homersche Lachen an, datt een ut’n Sprickwoort kennt.

Mit den Troja ner Anchises hett se ok ehren Spaaß harrt. Dor keem denn de Held Aeneas vun up’e Welt, de in den Krieg vun Troja een grode Rull speel un de later een vun de Stammvaders vun Rom tohören dö. Mit Dionysos hett se den Priapos tüügt un mit Hermes den Hermaphroditos. Ok in den schönen Adonis hett se sik verkeken, man de wurr vun Ares bi de Jagd ümbröcht, vunwegen dat he ieversüchtig weer.

Aphrodite seggt Paris to, datt he Helena as Froo kriegen schall

Symbole un Attribute[ännern | Bornkood ännern]

Aphrodite vun Knidos

De Göddin warrt faken mit Deerter tohopenbröcht, as mit de Duuv, de Swulk, de Jynx, den Swaan un den Dickkopp, man ok de Schildkrööt, den Delfin un de Haasen.

Besunners is se de Göddin vunde Blomen, vun de Bööm un de Frücht. Mank jem sünd de Anemoon, de Roos, de Zypress, de Linn un de Appel hillig för ehr.

Veel Planten, de de Seel in Swung bringen (psychoaktiv) un de Lust upwecken (erotisierend), de oorntlich röken doot oder een symbolisch Form hefft, sünd mit Aphrodite in’n Tosamenhang bröcht wurrn (Aphrodisiaka) un bi ehr Festdaag ok bruukt wurrn. Up Zypern, Samos un up Kreta, man ok in Athen un an den Kephisos hören ehr Hillige Gaarns un Hölter to.

Weblinks[ännern | Bornkood ännern]

Aphrodite. Mehr Biller, Videos oder Audiodateien to’t Thema gifft dat bi Wikimedia Commons.