Urban VII.

Urban VII.

Wappen vun Papst Urban VII., moderne Nahteeken

Urban VII. (* 4. August 1521 in Rom; † 27. September 1590 in Rom), eegentlich Naam Giambattista (Giovanni Battista) Castagna, weer van’n 15. bit to‘n 27. September 1590 Paapst vun de kathoolsch Kark. Sütt man vun den (siet 1961 formal nich mehr as Paapst führten) Stephan (II.) af, weer sien Pontifikat da körteste vun all Paapsten.

Leven

Giovanni Battista Castagna weer de Söhn vun den Genuesen Cosimo Castagna un de sien Ehefru, de Römerin Costanza Ricci. He hett Zivil- un Karkenrecht an verscheeden Universitäten in Italien studeert. All beid Studiengänge hett he in Bologna mit en Doktertitel afslooten, weer also Doctor iuris utriusque.

He is dornah in de Deensten vun sien Unkel, den päpstlichen Legaten in Frankriek, Girolamo Kardinal Verallo intreeden. An‘n 1. März 1553 hett hüm Paapst Julius III. to’n Arzbischop vun Rossano nöömt. Wiel he noch kien Preester weer, folg an’n 30. März 1553 de Preesterweehn un an’n 4. April 1553 denn sluutend de Bischopsweehn.

Paapst Julius III. hett hüm 1555 to’n Gouverneur vun Fano nöömt. Paapst Paul IV. hett hüm bald dorup noch to’n Gouverneur vun Perugia un Umbria nöömt. In sien Eegenschap as Arzbischop vun Rossano nehm he an dat Konzil vun Trient deel.

1565 wurr he päpstlicher Nuntius an den Hoff vun Philipp II. Bi sien Rückkehr nah Italien hett he in’n Januar 1573 sien Amt as Arzbischop vun Rossano daalleggt. Paapst Gregor XIII. hett hüm in dat glieker Johr as päpstlichen Nuntius nah Venedig schickt.

1578 hett hüm Paapst Gregor XIII. as besünnern Legaten nah Köln schickt, nah sien Rückkehr ut Köln hett hüm de Paapst to’n Konsultor vun dat Hillige Offizium bestimmt. An’n 12. Dezember 1583 hett hüm Paapst Gregor XIII. sluutend to’n Kardinal vun San Marcello nöömt.

Ünner dat Pontifikat vun Paapst Sixtus V. wunn he bannig völ Infloot; an‘n 19.November 1586 wurr he Grootinquisitor vun dat Hillig Offizium.

So keem dat, dat dat Konklave hüm an’n 15. September 1590 to’n neen Paapst wählt hett. As Paapstnaam hett he bewusst en Naam wählt, de all lang nich mehr vörkommen weer: Der hillige Urban I. weer all Römer. Urban VII. wurr aber all in de Nacht nah sien Wahl, vermootlich an Malaria krank un is nah en kört Pontifikat vun blots 12 Daag storven. He is in de Cappella del’ Annunziata vun de Basilika Santa Maria sopra Minerva begraven.

Literatur

• Gino Benzoni: Urbano VII. In: Massimo Bray (Hrsg.): Enciclopedia dei Papi. Band 3: Innocenzo VIII, Giovanni Paolo II. Istituto della Enciclopedia Italiana, Rom 2000, S. 222–230
• Indrag in de Catholic Encyclopedia, Robert Appleton Company, New York 1913.

Weblinks

Urban VII.. Mehr Biller, Videos oder Audiodateien to’t Thema gifft dat bi Wikimedia Commons.

• Castagna, Giambattista In: Salvador Miranda: The Cardinals of the Holy Roman Church. (Website vun de Florida International University, engelsch), afropen an’n 4. August 2021.

Vörgänger	Amt	Nafolger
Sixtus V.	Paapst 1590	Gregor XIV.