Tobermory (Brenneree)

Tobermory
Brenneree Tobermory
Land	Schottland
Region	Islands
Tyyp	Malt
Status	aktiv
Besitter	Distell Group Ltd.
Grünnt	1798
Grünner	John Sinclair
Waterborn	Mishnish Loch
Washstill(s)	2 × 18.000 l
Spiritstill(s)	2 × 16.000 l
Produkschoonsvolumen	1.000.000 l
Websteed	www.tobermorydistillery.com

Tobermory is en Whisky-Brenneree in de Stadt Tobermory op dat Eiland Mull (Argyll and Bute), Schottland. De Lagerhüüs, de to de Brenneree höört, sünd in de schottischen Denkmollisten in de Kategorie B inordent.^[1]

Historie

De Destille Tobermory is 1798 grünnt worrn. In’t 19. Johrhunnert weer se över längerer Tiet dicht. Vun 1916 bit 1930 weer se in Besitt vun de Distillers Company Ltd. (DCL), denn aver vun 1930 bit 1972 wedder stillleggt. In 1972 is se ünner den Naam Ledaig Distillery (Tobermory) Ltd. wedder apenmaakt worrn un denn ok op veer Brennblasen vergröttert. Aver 1975 is se al wedder dicht maakt worrn, vunwegen dat keen Geld mehr dor weer.

1978 is de Brenneree an Kirkleavington Property verköfft worrn un hett denn ehrn ollen Naam Tobermory wedderkregen. Vun 1981 bit 1989 weer de Destille dichtmaakt. 1990 güng de Produkschoon wedder in lütten Ümfang los. 1993 is se vun Burn Stewart Distillers Ltd. övernahmen worrn. Siet de Tiet produzeert se ahn Ünnerbreken. Burn Stewart sülvst is aver 2013 vun de süüdafrikaansche Distell Group Ltd. opköfft worrn.

Bi de Brenneree gifft dat ok en Besökerzentrum und se kann ok besichtigt warrn.

Produkschoon

De Destille höört to de Whiskyregion Highlands/Islands. Ehr Water kriggt se ut den Mishnish Loch. Dat Molt warrt ut de Molteree vun de Brenneree Port Ellen betogen. In de Brenneree Tobermory gifft dat en Meeschfaat ut Gaatiesen vun 4,5 Tunnen un veer Gäärfatten ut Douglasienholt vun tosamen 92.000 l. Brennt warrt in twee Wash stills vun jeedeen 18.000 l un twee Spirit stills mit jeedeen 16.000 l.