Thorkild Hansen

Vun Wikipedia

Thorkild Hansen (* 9. Januar 1927 in Kopenhagen; † 4. Februar 1989) is en däänschen Schriever ween. For siene Roman-Trilogie over den däänschen Hannel mit Slaven hett he 1971 den Literaturpries vun den Noordschen Raat kregen. Sunnerlich dör sien Wark over de Perzesse, de na den Weltkrieg gegen den Schriever un Nobelpries-Dreeger Knut Hamsun föhrt wurrn sünd, is he bekannt wurrn. Düt Wark is 1979 in dree Bänn rutkamen.

Leven[ännern | Bornkood ännern]

Nadem he de School besocht harr, gung he bi un studeer vun 1945 af an Literaturgeschicht an de Universität Kopenhagen. Vun 1951 - 1971 weer he verheiraat mit Birte Lund. Later hett he en tweete Fro nahmen un weer vun 1978 bit to sien Dood mit Gitte Jæger tohopen. Ut de eerste Eh hett he de beiden Kinner Marie un Vera harrt. He is an'n 4. Februar 1989 an Boord vun en Krüüzfohrtschipp in de Karibische See sturven.

Wark[ännern | Bornkood ännern]

1947 hett he sien Debütroman over den däänschen Schriever Jacob Paludan rutgahn laten. Achterna is he as Jounalisten bi dat Boulevardblatt Extra Bladet togange ween. Bito hett he avers en Reeg vun annere Böker rutbrocht. Groot rutkamen is he to'n eersten Mol 1962 mit sien Roman Det lykkelige Arabien (düütschen Titel: Reise nach Arabien, 1965). Dor gung dat over Carsten Niebuhr siene Expeditschoon na Arabien in. For düt Book hett Hansen 1963 den Søren-Gyldendal-Pries kregen.

Den Noordschen Raat sienen Literaturpries hett he 1971 kregen for sien Roman over den däänschen Hannel mit Slaven. Dat keem rut in dree Bännen unner de Originalnaams Slavernes kyst (1967), Slavernes skibe (1968) un Slavernes øer (1970). Sien Book Jens Munk over den däänsch-norweegschen Updecker un Seefohrer Jens Munk keem up Düütsch to'n eersten Mol rut bi den VEB Hinstorff Verlag in Rostock. Dat weer 1974.

Ok groot rutkamen is he mit sien Biographie in dree Bännen over den norweegschen Schriever Knut Hamsun. De is 1978 rutbrocht wurrn mit den Titel Processen mod Hamsun. Hansen hett sik in düsse Böker sunnerlich mit Hamsun un siene Fro Marie ehre Perzesse na den Tweeten Weltkrieg un mit Hamsun sien letztet Book Auf überwachsenen Pfaden befaat. Hamsun weer na den Krieg vorsmeten wurrn, he harr dat bannig mit dat Düütsche Riek holen un harr sik mit de Nazis afgeven. Wat Hansen dor hett hören laten, dor hefft sik de Lesers un Literaturkritikers hüdigendags noch over in'e Plünnen.[1][2] Mit sien Satz vil du se idioter, så tag til Norge (Wenn du Döösbaddels sehn wullt, mösst du na Norwegen hengahn) hett he de Norwegers dormols sunnerlich in Brass brocht. 1996 is vun dat Book en Film mit den Titel Hamsun maakt wurrn. Dor hett de sweedsche Schauspeler Max von Sydow de Hööftrull in speelt.

Wat sunst noch vun Hansen rutkamen is[ännern | Bornkood ännern]

  • Resten er Stilhed (1953)
  • Pausesignaler (1959)
  • Syv seglsten (1960)
  • En kvinde ved en flod (1961)
  • De søde piger (1974)
  • Kurs mod solnedgangen (1982)
  • Søforhør (1982)
  • Et atelier i Paris I-II (posthum 1990).

Weblenken[ännern | Bornkood ännern]

Belege[ännern | Bornkood ännern]

  1. Wolfgang Butt: Thorkild Hansen-Essay (Munzinger-Archiv)
  2. DER SPIEGEL: Das ist vielleicht die Nemesis (Nr. 46/1979)