Boulevardblatt

Vun Wikipedia

En Boulevard- oder Sluderblatt is en Blatt, wo dat, neven Politik un allgemeene Narichten to en groten Deel um Sport, Sluderkraam, (Sex) Schandalen vun bekannte Lüde und Stars, um Amüsemang (in’t Feernsehn) un um sensatschonelle Vertellen over Moord un Doodslag in geiht. De Naam wiest up de Historie vun so’n Blöer hen: Vörmols, sunnerlich to’n Anfang vun dat 20. Johrhunnert, sünd so’n Aart Blöer up’e Straten – up den „Boulevard‘‘ – verkofft wurrn un konnen nich dör en Abonnemang bestellt weern.

En Boulevardblatt is dat Gegendeel vun en Qualitätsblatt. Unner annern in England weert düsse Blöer tabloids nömmt, vunwegen, datt se in dat Format vun en Tabloid rutkamen doot.

De Spraken un ok de Deepgang liggt meist bi de Sluderblöer düütlich unner dat Niveau vun de Qualitätsblöer. Vundeswegen kiekt de Lesers vun düsse Blöer faken hendal up de Boulevardpresse. Sluderblöer weert denn ok sunnerlich vun Lüde mit en ringere Bildung lesen. Bloß man wenig vun düsse Blöer hoolt sik neutral un overleggt eerst groot, wat se schrieven doot. De meisten hefft in’e Politik en starke Meenung, de meist rechts, konservativ un sunnerlich bannig populistisch is.

In Düütschland is sunnerlich de „Bild“ as Sluderblatt bekannt. Man ok de Hamburger Morgenpost, de Kölner Express un de B.Z. weert to den Boulevard torekent. Echte Boulevardblöer sünd de engelschen Dageblöer The Sun, Daily Mirror un Daily Mail. In de Nedderlannen hett dat Blatt De Telegraaf Elemente vun en Boulevardblatt, just so, as in Flannern Het Laatste Nieuws.

Dat Sönndagsblatt vun The Sun, de News of the World, möss 2011 dichtmaakt weern vunwegen en Afhöörschandal. Hööftredakteur Rebekah Brooks hett hett automaatsch in’n groten Maatstaff Telefonen vun bekannte Lüde un vun Oppers vun Verbreken afhören laten. Dor hett dat brittsche Parlament denn en Utschuss insett unner Leit vun Lord Leveson, de scholl de ganze Boulevardpress unnersöken.