Blatt (Narichten)

Vun Wikipedia
Wesseln na: Navigatschoon, Söök
Bremer Wöchentliche Nachrichten vun 1743
Hannoversches Tageblatt, Titelsieten, Utgave vun'n 24. Oktober 1865
Stapel Blöer

En Blatt (in Oostfreesland ok Bladd, Bladdje un Journaal), in de wecken Gegenden woll ok Tiedung, Tieding oder, hoochdüütsch, Zeitung nömmt, is en Druckwark, dat regelmatig rutkamen deit un sik up aktuelle un allgemeene Saken betrecken deit. Dor finnt sik en ganze Reeg vun Texte in, de sik mit en bestimmten Inholt befaten doot un all for sik staht. Düsse Texte weert Artikels nömmt. Dat gifft ok Internet- oder Online-Blöer, de in't Internet stellt sünd un den Charakter vun en Dageblatt oder vun en Tiedschrift hefft.

Definitschoon[ännern | Bornkood ännern]

Ganz allgemeen seggt, is en Blatt en Druckwarks mit nich allto veel Sieten, un kummt eenmol an'n Dag oder in'e Weken rut. Blöer, de elken Dag rutkaamt, heet Dageblatt un Blöer, de bloß eenmol in'e Weken rutkaamt, heet Wekenblatt. Dat gifft Blöer, de mütt betahlt weern un annere, de weert umsunst verdeelt (Annoncenblatt). Veer Saken höört dor to, wenn vun en Blatt snackt weern kann: Aktualität (wat vertellt warrt, is noch nich lang her), Periodizität (dat Blatt kummt regelmatig rut), Publizität (all Lesers hefft freen Togang to dat Blatt) un Universalität (ganz verschedene Saken un Geschichten ut ganz unnerscheedliche Feller weert bekannt maakt).

Anners, as de Tiedschrift, is dat Blatt aktuell un hollt sik an de Narichten vun'n Dag. Dat is unnerdeelt in allerhand Afsnitte, so nömmte Rubriken, as Politik, Umto (Lokales), Weertschop, Sport oder Feuilleton (dat in de wecken Blöer ok Kultur heten deit). Düsse Rubriken weert in sunnerliche Ressorts tohopenstellt. En Ressort befaat sik jummers mit en sunnerlichen Themenfeld un is dor tostännig for un mutt tosehn, dat allens richtig wietergeven warrt. Hüdigendags gifft dat avers ok jummers mehr de so nömmte integreerte Redaktschoon, wo Ressorts nich mehr bruukt weert (Newsdesk). De Redaktschoon is de journalistische Afdeelung in en Dageblatt- oder Tiedschriftenverlag. In en Redaktschoon oder for en Redaktschoon schrievt Redakteure, Pauschalisten, free Journalisten un Voluntäre, hen un wenn ok externe Experten.

Blöer, de meist Sluderkraam bringt, weert Boulevard- oder Sluderblatt nömmt.

Blatt un Tiedschrift[ännern | Bornkood ännern]

En Narichtenblatt hollt sik an de aktuellen Narichten. Bi en Tiedschrift is dat anners: Dor staht meist Artikels in, de sik mit sunnerlichen Fackrebeeden oder Themen befaten doot un nich nee Narichten präsenteert oder kommenteert. Up Platt warrt avers en Tiedschrift faken ok eenfach Blatt nömmt.

Plattdüütsche Tiedschriften[ännern | Bornkood ännern]

  • Diesel - dat oostfreeske Bladdje: [1]
  • De Kennung: Zeitschrift für plattdeutsche Gemeindearbeit: [2]
  • Quickborn - Zeitschrift für plattdeutsche Sprache und Literatur: [3]

Literatur[ännern | Bornkood ännern]

  • Jürgen Heinrich: Mediensystem, Zeitung, Zeitschrift, Anzeigenblatt, Medienökonomie Bd. 1, 2001, ISBN 3-531-32636-8
  • Michael Meissner, Zeitungsgestaltung. Typografie, Satz und Druck, Layout und Umbruch, 3. Uplage, Berlin, 2007, ISBN 3-430-20032-6
  • Volker Schulze: Die Zeitung. Ein medienkundlicher Leitfaden, 3. Uplage, ISBN 3-892-94311-7
  • ZMG Zeitungs Marketing Gesellschaft (Rutg.), Urszula Dolder (Schrieversch): Zeitungs-Verbreitungsatlas 2015/16 - Verbreitungsgebiete und verbreitungsanalytische Daten der Tageszeitungen. Frankfort 2014, ISBN 978-3-922537-56-4

Weblenken[ännern | Bornkood ännern]

Commons-logo.svg Blöer. Mehr Biller, Videos oder Audiodateien to’t Thema gifft dat bi Wikimedia Commons.