Diesel (Blatt)

Vun Wikipedia
Zur Navigation springen Zur Suche springen

Diesel – dat oostfreeske Bladdje weer en plattdüütsch Blatt, dat vun September 1992 an veermal in’t Johr rutkeem, rutgeven vun Hans-Hermann Briese ut Nörden un Carl-Heinz Dirks ut Emden. Mit de leste Utgaav Nr. 106 worr dat Blatt in'n Dezember 2018 instellt. Johannes Diekhoff ut Auerk, de de Tietschrift mitgründt harr, weer in Sömmer 2013 overleden.

In Diesel worrn allerhand „Dööntjes un Vertellsels“ rutbrocht, man ok Gedichte un Prosatexte, de wat eernsthaftiger to nehmen sünd. Allens weer up Platt schreven. Böker worrn ok bespraken. De meisten Lesers weren in Oostfreesland tohuus oder harrn Wuddeln in Oostfreesland. Dorüm weren de Texte dor allermeist in oostfreesch Platt schreven, un twoors in de Schrievwies, de de Oostfreesche Landschop vörleggt hett. De Tietschriften-Makers geeven sik Mööh, dat düsse Schrievwies[1] dörgahns bruukt worr. Mööglichst in jede Utgaav vun dat Blatt worrn blangen hüdige oostfreesche Schrievers ok Schrieverslüüd ut annere Kuntreien vun Plattdüütschland afdruckt, fakener mol ut Grunneng, hen un wenn ok ut de USA. Jümmers wedder geev dat ok Texte vun wichtige Schrievers, de al storven weren, as Oswald Andrae, Enno Wilhelm Hektor, Moritz Jahn, Greta Schoon, Wilhelmine Siefkes un Berend de Vries.

Dat Blatt dee bovento sien Deenst as Tietschrift vun den Vereen för oostfreesche Spraak un Kultur Oostfreeske Taal; in jede Utgaav weren veer Sieden mit Informatschonen ut un för den Vereen mit bi. 2004 worrn de DIESEL-Rutgevers mit den Keerlke-Pries un ok mit dat Totius-Frisiae-Siegel[2] van de Oostfreeske Landskupp uttekent.

Weblenken[ännern | Bornkood ännern]

Borns[ännern | Bornkood ännern]

  1. ostfriesischelandschaft.de: Schrievregels (hoochdüütsch)(PDF, 206 KB)
  2. ostfriesischelandschaft.de: Auszeichnungen, Ehrungen (PDF, 76 KB)