Zum Inhalt springen

Steven Chu

Vun Wikipedia
Steven Chu (2009)

Steven Chu (chineesch: 朱棣文; Pinyin: Zhū Dìwén}}; * 28. Februar 1948 in St. Louis, Missouri) is en US-amerikaansch Physiker.

He kreeg 1997 gemeensam mit William Daniel Phillips un Claude Cohen-Tannoudji den Nobelpries för Physik. Sien Hööftrebeet is de Beinflooten vun Atomen middels Lasern. He weer Direkter vun dat Lawrence Berkeley National Laboratory bit to sien Ernennung to’n Energieminister un hollt Professuren in Berkeley un Stanford.

In dat Kabinett vun den US-Präsidenten Barack Obama weer Chu van 2009 bit 2013 Energieminister.

Leven

[ännern | Bornkood ännern]

Chu stammt ut en chineeschstämmig Akademikerfamilie, de 1943 över den Ümweg över Frankriek in de USA inwannert is. Sien Vader weer Chemie-Perfesser an dat Brooklyn Polytechnic, un Chu is dicht bi Garden City upwussen. He hett anfangs an de University of Rochester studeert, wo he sien Bachelor maakt hett. Dornah is he an de University of California, Berkeley mit de Afsicht wesselt, sück up theoretische Physik to spezialiseeren. Bi Eugene David Commins hett he sück denn aber mit dat Meeten vun Paritätsverletzungen vun dat (in de Quantenelektrodynamik verboden) magnetischen Dipolövergangs in Thalliumatomen befaat, de nah de elektroswaak Theorie in dat Standardmodell mögelk weern (de oorsprüngliche Vörslag för sückse Experimente keem vun Claude Bouchiat un Marie-Anne Bouchiat in Frankriek 1974) un sück in en swaak Asymmetrie vun de Absorptschoon vun rechts- un linkspolariseert Lucht ütern dee. För dat Experiment muss sück Chu intensiv mit den Bau vun Lasern befaaten. Dat Experiment nehm eenig Tiet in Anspröök, un wiels disse Tiet wurr he 1976 Post-Doc – sien experimentelle Arbeit wurr as utreckend Qualifikatschoon anerkannt. Eerste Ergevnisse hett de Grupp 1979 bekannt maakt,[1] dormals aber weer neutrale Ströme all an dat SLAC in de Hoochenergiephysik nahwiest wurrn.

Af 1978 hett he bi de Bell Laboratories in Murray Hill (New Jersey) arbeit, wo he mit Experimenten to dat nipp un nau Vermeeten vun de Spektren vun Positronium anfung, dat „Waterstoffatom“ vun de Quantenelektrodynamik, bestahnd ut Positron un Elektron. Dat Experiment (mit Allen Mills) weer spoodriek, düer aber ok mehrere Johren. Dat weer dormals en vun de nauste Experimente to de Quantenelektrodynamik.[2]

1983 wurr he Baas vun de Afdeelen för Quantenelektronische Forschung vun dat Bell-Labor in Holmdel. To disse Tiet wull he sück eegentlich mit Fastkörperphysik befaaten (Pikosekunden-Laserpulse to dat Ünnersöken vun Exzitonen-Anregungen), wurr denn aber (anreegt dör Arbeiten vun sien Kolleeg Arthur Ashkin bi de Bell Labs, de doran all siet 1970 arbeiten dee) to de Entwicklung vun optisch Fallen[3] un hör Wiederentwicklung mit Laserköhlensverfohren to dat „Infangen“ vun Atomen führt, wat hüm sluutend den Nobelpries inbrocht hett.[4][5]

1987 wurr he as Nachfolger vun Theodor Hänsch Perfesser för Physik un Anwennd Physik an de Stanford University. Dor hett he van 1990 bit 1993 un 1999 bit 2001 de Physikafdeelen leit un hett sück ok mit biophysikalischen Forschungen befaat.

2004 wurr he Direkter vun dat Lawrence Berkeley National Laboratory un hett dorto ok en Professur an de University of California, Berkeley annommen.

Van 20. Januar 2009 bit to’n 22. April 2013 weer he Energieminister in de Obama-Regeeren.

Bi de Reed för beid Hüüs vun den Kongress to’n Anlaat vun de Gesundheitsreform in dat Johr 2009 weer Chu Designated Survivor. He weer in’n Fall vun en Anslag up dat Kapitol de hööchstrangige Överlevende ween un harr de Nahfolge vun Barack Obama as Präsident antreeden. 2013 weer Chu bi de State of the Union Address weer Designated Survivor.

To Tiet is Chu William R. Kenan, Jr., Professor of Physics un Professor of Molecular & Cellular Physiology in de Medical School an de Stanford University. Todem is he Liddmaat vun dat Bio-X Biosciences Institute un dat Wu Tsai Neurosciences Institute in Stanford.[6]

Wirken

[ännern | Bornkood ännern]
Barack Obama un Steven Chu (2009)

Chu hett tallriek Verfohren un Reedschopp för optische un atomphysikalische Meeten entwickelt. So hett he mit Hülp vun stabiliseert Laser de Paritätsverletzung in Thalliumatomen meeten un mit de Dopplerfree Twee-Photonen-Spektroskopie hett he Positronium un Myonium ünnersöcht (mit Mills hett he 1982 de Differenz vun 1s un 2s Niveau vun dat Positroniums mit en Nauigkeit vun en paar Deele nto een Milliarde meeten). Sien wichtigste wetenschapliche Leistung weer af Midden vun de 1980er Johren de Laserköhlen vun Atomen. Se is en zentraal Komponente vun magnetooptischen Atomfallen.[7][8]

Later hett Chu an dat Verfienern vun disse Methoden för Atomuhren nah dat Fontänenprinzip un Bose-Einstein-Kondensaten arbeit. He hett sück an hoochnau Meeten vun de Gravitatschonskonstante un Fienstrukturkonstante bedeeligt un hett eenige vun sien optisch Methoden bi biophysikalischen Ünnersöken insett, etwa bi de Manipulatschoon vun eenzelt DNA-Moleküle mit optischen Pinzetten (Optical Tweezers, 1989) oder in de Polymerdynamik.

1982 hett he mit Wong de Mögelkeit vun dat Utbreeden vun Pulsen in afsorberend Medien mit en Gruppengeschwindigkeit, de grötter as de Luchtgeschwindigkeit in dat Medium is, nahwiest.[9]

To Tiet befaat sück Chu vör allen mit de Forschung to biophysikalischen Themen (as de Synthees un Funktschonaliseeren vun Nanodeelken för de in vivo Afbillen vun zellulären Perzessen) un physikalischer Probleme mit Relevanz för Energie- un Umweltfragen (as de Entwicklung vun Batterien up Basis vun Lithium un Swefel, nee Methoden to de elektrochemische Upspalten vun Water, de Verminnern vun Kohlendioxidemissionen un de Extraktschoon vun Lithium ut Soltwaterr).[10]

He weer en vun de Eersten, de de Petitschoon för Project Steve ünnerschreeven hett, en Kampagne, de för de Ünnerrichten vun de herkömmlichen wetenschaplich Upfaaten över de Evolutschonstheorie an Scholen intreeden deiht, un hett sück dormit gegen de in den USA populären Alternativkonzepte vun den Kreatschonismus un dat Intelligent Design stellt.[11][12]

Insetten in den Beriek Energieversörgen un Klimawannel

[ännern | Bornkood ännern]
Steven Chu (rechts) un Fatih Birol (Mitte) bi en Konferenz an de University of Oxford

Chu is all lang för en starkere Forschung in den Beriek regenerativ Energien un de Wiederentwicklung vun de Karnkraft, wiel he de Meenen is, dat en Verlagerung weg vun fossilen Brennstoffen unverzichtbar is, um de globale Erwärmung to bekämpfen.

Chu hett ok wohrschoot, dat globale Erwärmung de Landwertscha in‘n US-Bundsstaat Kalifornien noch binnerhalv vun dit Johrhunnert unmögelk maaken kunn. He is Liddmaat vun den Kopenhagener Klimaraat (Copenhagen Climate Council), en Vereenigung vun Wertschaps- un Wetenschapsvertredern, de inricht wurr, um en Impuls för de UN-Klimakonferenz in Kopenhagen in‘n Dezember 2009 to geven.

Chu speel ok en wichtig Rull bi de Utarbeiten vun de spoodriek Bewarf för dat Energy Biosciences Institute, en vun BP mit 500 Millionen Dollar finanzeert gemeensam Projekt vun de Universität Berkeley, dat Lawrence Berkeley Lab un de University of Illinois. Dat hett in Berkeley för en Striederee mit de führt, de bang weern, dat disse Tosommenarbeit dat Ansehn vun de Universität för akademische Integrität beschädigen kunn.

Utteknungen un Ehrungen

[ännern | Bornkood ännern]

Chu kreeg 1987 den Herbert-P.-Broida-Pries för Laserspektroskopie vun de American Physical Society, 1993 den König-Faisal-Pries för Naturwetenschapen[13] 1994 den William F. Meggers Award vun de Optical Society of America[14] un den Arthur L. Schawlow Prize in Laser Science vun de APS[15] un 1995 den Humboldt-Forschungspries vun de Alexander von Humboldt-Stiftung, vun de ok en Wolfgang-Paul-Vorlesung organiseert wurr, de he 1998 an dat Physikalischen Institut vun de Universität Bonn hull.[16] 1996 kreeg he en Guggenheim-Stipendium.[17] He is Liddmaat vun de National Academy of Sciences, siet 1992 de American Academy of Arts and Sciences un siet 1998 de American Philosophical Society. 2014 wurr he in de Royal Society wählt un is todem Liddmaat vun de Academia Sinica, de Chineesch Akademie vun de Wetenschapen un de Korean Academy of Science and Technology.[14] Siet 2018 is he ordentlich Liddmaat vun de Päpstliche Akademie vun de Wetenschapen.[18] Chu hett över 30 Ehrendoktertitel tospraken kreegen,[6] dorünner dör de Boston University (2007),[19] de Harvard University (2009)[20] de Washington University in St. Louis,[21] Yale University[22] un de University of Strathclyde[23] (all 2010), de Australian National University (2014)[24] Dartmouth College (2015)[25] un Amherst College (2018)[26].

1997 kreeg Chu tosommen mit William Daniel Phillips un Claude Cohen-Tannoudji den Physik-Nobelpries för dat Köhlen un Infangen vun Atomen mit Laserlucht.[27]

[ännern | Bornkood ännern]
Steven Chu. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen

[ännern | Bornkood ännern]
  1. ↑ R. Conti, P. Bucksbaum, S. Chu, E. Commins, L. Hunter, Preliminary Observation of Parity Nonconservation in Atomic Thallium
  2. ↑ Steven Chu, Allen P. Mills Jr., John L. Hall: Measurement of the Positronium 13S1-23S1 Interval by Doppler-Free Two-Photon Spectroscopy. In: Physical Review Letters. Band 52, Nr. 19, 1984, S. 1689–1692
  3. ↑ Steven Chu, J. E. Bjorkholm, J. M. Dziedzic, A. Ashkin: Observation of a single-beam gradient force optical trap for dielectric particles. In: Optics Letters. Band 11, Nr. 5, 1986, S. 288–290, doi:10.1364/OL.11.000288.
  4. ↑ Steven Chu, L. Hollberg, J. E. Bjorkholm, Alex Cable, A. Ashkin: Three-dimensional viscous confinement and cooling of atoms by resonance radiation pressure. In: Physical Review Letters. Band 55, Nr. 1, 1985, S. 48–51, doi:10.1103/PhysRevLett.55.48.
  5. ↑ Jason Socrates Bardi: Focus: Landmarks: Laser Cooling of Atoms. In: Physical Review Focus. Band 21, Nr. 11, 2. April 2008, doi:10.1103/physrevfocus.21.11.
  6. ↑ a b Steven Chu: Biography. stanford.edu, afropen an’n 29. November 2018 (engelsch).
  7. ↑ Steven Chu, J. E. Bjorkholm, A. Ashkin, A. Cable: Experimental Observation of Optically Trapped Atoms. In: Physical Review Letters. Band 57, Nr. 3, 1986, S. 314–317, doi:10.1103/PhysRevLett.57.314.
  8. ↑ E. L. Raab, M. Prentiss, Alex Cable, Steven Chu, D. E. Pritchard: Trapping of Neutral Sodium Atoms with Radiation Pressure. In: Physical Review Letters. Band 59, Nr. 23, 1987, S. 2631–2634, doi:10.1103/PhysRevLett.59.2631.
  9. ↑ S. Chu, S. Wong: Linear Pulse Propagation in an Absorbing Medium. In: Physical Review Letters. Band 48, Nr. 11, 1982, S. 738–741, doi:10.1103/PhysRevLett.48.738.
  10. ↑ Current Research and Scholarly Interests. Stanford University, afropen an’n 30. November 2018 (engelsch).
  11. ↑ Steve Mirsky: Bringing in the Steves. In: The Scientist. 17. Februar 2003, afropen an’n 30. November 2018 (engelsch).
  12. ↑ Project Steve. National Center for Science Education, afropen an’n 30. November 2018 (engelsch).
  13. ↑ Professor Steven Chu: Winner of the 1993 KFP Prize for Science. kingfaisalprize.org, afropen an’n 29. November 2018 (engelsch).
  14. ↑ a b Steven Chu. OSA, afropen an’n 29. November 2018 (engelsch).
  15. ↑ 1994 Arthur L. Schawlow Prize in Laser Science Recipient: Steven Chu. APS, afropen an’n 29. November 2018 (engelsch).
  16. ↑ 1998: Steven Chu. Universität Bonn, afropen an’n 29. November 2018.
  17. ↑ Steven Chu, Fellow: Awarded 1996. Guggenheim Foundation, afropen an’n 29. November 2018 (engelsch).
  18. ↑ Nomina di Membro Ordinario della Pontificia Accademia delle Scienze. In: Tägliches Bulletin. Presseamt vun den Hilligen Stohl, 20. Oktober 2018, afropen an’n 20. Oktober 2018 (italieensch).
  19. ↑ Nobel Prize Winner Steven Chu to Speak at Boston University Commencement. Boston University, afropen an’n 29. November 2018 (engelsch).
  20. ↑ In Esteemed Company. In: Harvard Magazine. 4. Juni 2009, afropen an’n 29. November 2018 (engelsch).
  21. ↑ Five to receive honorary degrees. Washington University.
  22. ↑ Leah Finnegan: Celebs Converge At Yale's Graduation Ceremony (PHOTOS). In: Huffington Post. 24. Mai 2010, afropen an’n 29. November 2018.
  23. ↑ Honorary degrees for 3 Nobel laureates. University of Strathclyde, 4. November 2010, afropen an’n 29. November 2018 (engelsch).
  24. ↑ ANU honours Professor Steven Chu. ANU, 8. Dezember 2014, afropen an’n 29. November 2018 (engelsch).
  25. ↑ Steven Chu (Doctor of Science). Dartmouth College, 14. Juni 2015, afropen an’n 29. November 2018 (engelsch).
  26. ↑ Nate Procter: Steven Chu awarded honorary degree, offers prediction of hope. In: Daily Collegian. 22. März 2018, afropen an’n 29. November 2018 (engelsch).
  27. ↑ Steven Chu up de Sieden vun den Nobelpries (engelsch)
Vun „https://nds.wikipedia.org/w/index.php?title=Steven_Chu&oldid=1016683“