Steenflegen
| Steenflegen | ||||||||||||||
|---|---|---|---|---|---|---|---|---|---|---|---|---|---|---|
 | ||||||||||||||
| Systematik | ||||||||||||||
| ||||||||||||||
| Wetenschoplich Naam | ||||||||||||||
| Plecoptera | ||||||||||||||
| Burmeister, 1839 |
De Steenflegen (Plecoptera) sünd en Ornen mank de Insekten (Insecta). Se höört to de Fleeginsekten (Pterygota) mit to. Vun de bi 3.500 Aarden[1] sünd 127 in Düütschland un 514 in Europa tohuse.[2]. De meisten Aarden weert 3,5 bit hen to 30 Millimeters lang. De gröttste Aart is Diamphipnoa helgae. Ehr Lief is bi 40 Millimeters lang un de Flunken kann he bit hen to 110 Milimeters wiet ut’neenspannen. Allerhand Aarden könnt nich sunnerlich good flegen.
Budden
[ännern | Bornkood ännern]
De Steenflegen ehre Budden leevt in’t Water. Wassen doot se man suutje. Dor treckt se faken ehre Huud bi ut (meist 10 bit 25 mol). Se slaht all bannig na de adulten Deerter un hefft sess Been, de sünd al vull utbillt. Ok twee Anlagen vun Flunken gifft dat al, de staht stief af vun’t Lief oder liggt langs de Uppersiete. De Mundwarktüge sünd danniger utbillt, as bi de adulten Flegen. Upfallen doot de langen Steertfadens (Cerci) an’t Achterlief. Vun de Maiflegen ehre Budden verscheelt se sik, wieldat se keen Kemenblöder hefft un bloß twee, nich dree, Steertfadens.
Wie se leven doot
[ännern | Bornkood ännern]In Middeleuropa leevt de Deerter normolerwiese een Johr, en Reeg vun grode Aarden bruukt en poor Johre, um uttowassen (U.a. „Dinocras“ dree Johre). Wenn se ehre Larvenhuud afleggt un umwannelt weert to en adulte Steenflege, verlaat se normolerwiese dat Water. De Tied as Budde is de wesentliche Tied in’t Leven vun de Deerter. Dor hangt dat ok vun af, wo se vorkamen doot un wat for’n Umto se sik utsöökt. Wenn se eerst mol utkrapen sünd as adulte Flegen, leevt se bloß noch en korte Tied un sünd dor sunnerlich up ut, sik to vermehren. Man ok de adulten Flegen nehmt dörchut Freten to sik. Freten doot se u. a. Algen , de up Böömbarken sitten doot, Holt, wat ut’neenfullen is un anner Tüüch, wat man week is. De adulten Flegen leevt en poor Dage lang bit hen to en poor Weken. Dör de Luft breedt se sik nich sunnerlich wiet ut, vunwegen datt se nich good flegen könnt un dor ok keen grode Lusten to hefft. In England is bi en Studie rutsuert, datt 90 % vun de adulten Flegen nich wieter, as man 60 Meters wegkaamt vun dat Water, wo se as Larve in seten hefft. Dor speelt dat keen Rull bi, ob dat in’n Woold is oder in open Landschop, oder wie steil de Hänge dor umto sünd.[3].
Taxonomie
[ännern | Bornkood ännern]De Steenflegen weert updeelt in düsse Familien:
- Familie: Austroperlidae
- Familie: Capniidae
- Familie: Chloroperlidae (Gröne Steenflegen)
- Familie: Diamphipnoidae
- Familie: Eustheniidae
- Familie: Gripopterygidae
- Familie: Leuctridae (Nadelsteenlegen)
- Familie: Nemouridae (Beeksteenflegen)
- Familie: Notonemouridae
- Familie: Peltoperlidae
- Familie: Perlidae (Bössensteenflegen)
- Familie: Perlodidae
- Familie: Pteronarcyidae
- Familie: Scopuridae
- Familie: Styloperlidae
- Familie: Taeniopterygidae
Literatur
[ännern | Bornkood ännern]- Bernhard Klausnitzer: Plecoptera, Steinfliegen. In Westheide, Rieger (Rutg.): Spezielle Zoologie Teil 1: Einzeller und Wirbellose Tiere. Gustav Fischer Verlag, Stuttgart, Jena 1997; Seiten 635–636.
- Peter Zwick: Plecoptera (Perlaria, Uferfliegen). Handbuch der Zoologie, Eine Naturgeschichte der Stämme des Tierreiches. Lieferung 26. Verlag Walter de Gruyter; Uplage: 2. Uplage 1980. ISBN 3110081415.
Weblenken
[ännern | Bornkood ännern]
- ↑ Romolo Fochetti, José Manuel Tierno de Figueroa (2008): Global diversity of stoneflies (Plecoptera; Insecta) in freshwater. Hydrobiologia 595: 365-377.
- ↑ http://www.freshwaterecology.info
- ↑ I. Petersen, Z. Masters, A.G. Hildrew, S.J. Ormerod (2004): Dispersal of adult aquatic insects in catchments of differing land use. Journal of Applied Ecology 41 (5): 934 - 950.