Slacht vun Stalingrad

Vun Wikipedia

De Slacht vun Stalingrad weer en vun de gröttsten Slachten in den Tweeten Weltkrieg. Se warrt ankeken as de Punkt, wo sik de Wind in den Krieg dreiht hett. Vun dor af an is de düütsche Wehrmacht nich mehr wieder vöran kamen in de Sowjetunion. De Slacht is slahn wurrn in de Region vun dat dormolige Stalingrad an de Wolga (hüdigendags Wolgograd). In'n August 1942 güng dat los. Dor hett de Düütsche 6. Armee to'n eersten Mol de Stadt angrepen. Anfang 1943 weer allens vörbi un de Düütschen Truppen un jem ehr Verbünnten harrn verlaren. Vördem weern se in en Ketel inslaten. Tominnst 700.000 Lüde, Suldaten un Zivilisten, sünd bi düsse Slacht ümkamen. För dat Düütsche Riek bedüüd se den Anfang vun den Ünnergang.

Stalingrad[ännern | Bornkood ännern]

Stalingrad driggt hüde den Naam Wolgograd. Dormols reck dat 40,2 km vun Noord na Süden to langs de westliche Kant vun den Wolgastroom. Dor, wo de Stadt an'n breedsten weer, weern dat 6,4 bit 8 km. De Wolga is in düsse Gegend 1,6 km breet. Vunwegen düssen breden Stroom weer dat nich möglich, de Stadt in to sluten. Stalingrad hett dormols bi 600.000 Inwahners harrt, man as dat mit de Slacht losgüng, weern bloß noch bi 75.000 Zivilisten in de Stadt.

Wat de Stadt för den Krieg bedüden dö[ännern | Bornkood ännern]

De Stadt lä an de Wolga. Düsse Stroom weer en wichtigen Weg vun dat Kaspische Meer na de Midden vun Russland hen. Besunners Kriegsgöder ut de USA för de Sowjetunion sünd dor up langs schippert wurrn. De USA konnen dat maken, ofschoonst se dormols bi den Tweten Weltkrieg noch nich mitmaken döen. Se harrn ja dat Lehn- un Pachtgesetz rutbröcht, wat dor Verlööf to geev. Wenn de Düütschen de Stadt innehmen konnen, denn weer dat nich mehr länger möglich un de Weg för de Kriegsgöder weer ünnerbraken. Bavenhen scholl de Stadt en Basis afgeven för dat Wietergahn vun de Wehrmacht na de Öölfeller in'n Kaukasus.

Vunwegen de Naam is Stalingrad vun Hitler un Stalin as en Symbol ankeken wurrn. Stalingrad stünn för de Macht vun Stalin un den sien Land, de Sowjetunion. Weil dat beide Sieten so ankeken hefft, is ok mit so unbannige Woot un Bitterkeit üm de Stadt streden wurrn.

Wegen de hogen Verlusten up beide Sieten is Stalingrad later to'n Sinnbild vun den Krieg sien Schrecken wurrn.