Shipstern Lagoon

Vun Wikipedia
Zur Navigation springen Zur Suche springen
Luftbild von de Region mit Sarteneja links un de Laguun rechts (nich kumplett to sehn), von Westen keken
Blick op de Laguun

De Shipstern Lagoon is en System von Lagunen an de Küst von de Karibische See (Bucht von Chetumal) in’n Distrikt Corozal von dat Land Belize. Dat Rebeed von de Lagunen tohoopnahmen liggt bi över 50 km².

Von de Karibische See is de Laguun dör en Reeg Barren ut Mangrovenholt afdeelt, de aver dör en poor Waterlööp ünnerbraken sünd, dör de dat Water in de See ströömt. Binnenlands billt de Laguun en Reeg Seen, de deelwies blots dör smalle Waterlööp verbunnen sünd. Allens tohoop reckt de Laguun von Noordoost na Süüdwest 20 Kilometer in dat Land rin. Dat gifft keen grote Strööm oder Beken, de in de Laguun münnt, blots lüttjere Waterlööp, von de de Corozalito Creek de gröttste is.

En Deel von de Laguun is siet 1990 as Shipstern Conservation & Management Area schuult. De Karibische See vör de Laguun is as Corozal Bay Wildlife Sanctuary schuult.

Öörd gifft dat kuum in dat Rebeed. Dat lierlüttje Dörp Fire Burn liggt an de Laguun un de Oort Sarteneja liggt 2,5 Kilometer in’n Noorden von de Laguun an de Küst. In’n Westen is de Kolonie von Little Belize vondaag bet dicht an de Laguun ranrückt. De Maya-Ruinen von Kakantulix sünd nich wied af von Fire Burn.


Koordinaten:18° 18′ N, 88° 9′ W