Roosevelt-Fluss

Vun Wikipedia
Roosevelt-Fluss
Laag Brasilien
Roosevelt-Fluss
Laag vun Roosevelt-Fluss in Brasilien
Stroomsystem Amazonas
Läng 750 km
Afströömrebeed 35.000 km²
Born bi Vilhena (op 600 m över de See)
Koordinaten Born: 12° 39′ S, 60° 8′ W
Münn in’n Rio Aripuanã (op 34 m över de See)
Koordinaten Münn:
Koordinaten:7° 35′ S, 60° 41′ W
7° 35′ S, 60° 41′ W
linke Blangenströöm Rio Branco, Rio Madeirinha
rechte Blangenströöm Tenente Marques, Rio Capitão Cardoso

De Roosevelt-Fluss (portugeesch Rio Roosevelt) is en üm un bi 750 Kilometer langen Stroom in Brasilien, de in’n Rio Aripuanã münnt.

Loop[ännern | Bornkood ännern]

De Born liggt teihn Kilometer in’n Noorden von Vilhena in’n Bundsstaat Rondônia. Von dor flütt he groff jümmer na Noorden dör’n Oorwoold dör de Bundsstaten Mato Grosso un Amazonas. He löppt hier dör’n Campos-Amazônicos-Natschonaalpark.

De Roosevelt-Fluss münnt in’n Rio Aripuanã, de sülvs wedder in’n Rio Madeira flütt. De Rio Madeira flütt in’n Amazonas un de in’n Atlantik.

Historie[ännern | Bornkood ännern]

As eersten utkunnt hett den Stroom Cândido Rondon 1909. Rondon hett em toeerst den Naam Rio da Dúvida geven, wat „Twievel-Stroom“ bedüden deit. 1913 bet 1914 weer Rondon wedder an’n Roosevelt-Fluss ünnerwegens. Dütmaal tohoop mit’n fröheren US-amerikaanschen Präsident Theodore Roosevelt bi de Roosevelt-Rondon Scientific Expedition. De Expeditschoon wull rutfinnen, wat de Stroom woll in’n Amazonas flütt oder nich. To Ehren von Roosevelt hett de Stroom denn den ne’en Naam Rio Roosevelt kregen. Bi de Pomeranos, de sik dor later ansiedelt hebbt, is dor op Plattdüütsch de Naam Roosevelt-Fluss von worrn.[1] Von wegen dat Roosevelt op Portugeesch swoor uttospreken is, warrt de Stroom ok fakener Rio Teodoro nöömt (na Roosevelt sien Vörnaam in de portugeesche Form).

1927 hett George Miller Dyott noch wedder en Expeditschoon na’n Stroom daan.

Minschen leevt kuum an’n Stroom. An’n Böverloop leevt von öllers de Stamm von de Cinta Larga. In jüngere Tiet sünd vör allen in Rondônia Öörd grünnt worrn, in de sik ünner annern ok Pomeranos dallaten hebbt, de noch jemehr pommersch Plattdüütsch plegen doot.

Footnoten[ännern | Bornkood ännern]

  1. Ismael Tressmann: Dicionário Enciclopédico Pomerano-Português. 2006, Siet 560