Richard Stücklen

Richard Stücklen (* 20. August 1916 in Heideck; † 2. Mai 2002 in Weißenburg in Bayern) weer en düütschen Politiker vun de CSU. He weer vun 1957 bit 1966 Bundsminister för Post- un Feernmellwesen un vun 1979 bit 1983 Präsident vun’n Düütschen Bundsdag.

Biografie

Stücklen hett de Volksschool besöcht un dorna en Lehr in’t Elektrohandwark maakt. in den Beroop hett he dorna ok arbeit, hett aver blangento en Feernstudium in de Ingenieurwetenschoppen mit Fachricht Elektrotechnik afleggt. In’t Johr 1936 is Stücklen to’n Rieksarbeitsdeenst intogen worrn un achteran to’n Wehrdeenst. Vun 1940 bit 1943 weer he Soldat in’n Tweeten Weltkrieg. Dorna folg en Deenstverplichten in de Elektroindustrie. 1944 künn he sien Utbilln as Elektroingenieur an’t Technikum Mittweida in Sassen to Enn maken un weer dorna bit to de Demontaasch vun’n Bedrief Afdeelleider bi de AEG in Freiberg. Af 1945 arbeit he in de Slosseree vun sien Öllern in Heideck un weer as Mitgrünner vun 1952 bit 1989 Sellschopper vun de BMS Ingenieurgesellschaft mbH & Co. KG in Köln.

Stücklen weer verheiraat un harr twee Kinner.

Partei

Stüücklen weer af 1939 Liddmaat vun de [[NSDAP]. Na’t Enn vun’n Krieg weer Stücklen 1945 een vun de Mitgrünners vun de CSU in Heideck un in’n Landkreis Hilpoltstein. Vun 1953 bit 1957 weer he Liddmaat vun’n geschäftsföhren Vörstand un vun 1967 bit 1989 Liddmaat in’t Präsidium vun de CSU. In’n Wahlkamp to de Bundsdagswahl 1976 weer Stücklen Deel vun’t Schaddenkabinett vun Helmut Kohl för den Fall vun’n Wahlsieg.

Politische Arbeit

Richard Stücklen is vun 1949 bit 1990 Liddmaat vun’n Düütschen Bundsdag wesen. Dormit weer he över ölven Legislaturperioden lang in Düütschen Bundsdag, so lang as opstunns noch keen annern Politiker.

Vun 1953 bit 1957 is he as geschäftsföhren Vörsitter vun de CSU-Landsgrupp de Viez-Vörsitter vun de CDU/CSU-Frakschoon wesen un in disse Tiet gliektietig ok Vörsitter vun den Utschuss för Sünnerfragen vun’n Middelstand. Dormols weer he de jüngste Vörsitter vun en Bundsdagsutschuss.

Tosamen mit sien Frakschoonskollegen hett he an’n 24. Juni 1955 en Gesett utarbeit to’n Inföhren vun’t relative Mehrheitswahlrecht na dat britische Vörbild. 1957 hett he gemeensom mit Bundsdagsafordente vun de CSU und vun de DP en Gesettvörslag to’n Opheven vun’n Artikel 102 vun’t Grundgesett inbröcht mit dat Teel, de Doodsstraaf wedder intoföhren. De Vörslag harr aver keen Spood.

Vun’n 25. Januar 1967 bit in’t Johr 1976 weer he Vörsitter vun de CSU-Landsgrupp un noch mol wedder Viez-Vörsitter vun de Frakschoon. To de Tiet vun de Groten Koalitschoon hett he Frakschoonskollegen wietere Versöken ünnernahmen, dat Mehrheitswahlrecht intoföhren, is dormit aver nich dörkamen.

Bito weer Stücklen vun 1968 bit 1969 Viez-Vörsitter vun’n Parlamentaarschen Ünnersökensutschuss to’n Överprüfen vun de vörherrschen Organisatsschoon, Kompetenzverdelen, personell un Saakmiddelutstatten vun de Narichtendeensten, de för den Staatsschuul un de Spionaaschafwehr tostännig sünd.

Na de Bundsdagswahl 1976 is he an’n 14. Dezember 1976 to’n Viez-Präsident vun’n Düütschen Bundsdag wählt worrn. As Karl Carstens denn to’n Bundspräsident wählt worrn weer, is Stücklen an’n 31. Mai 1979 sien Nafolger as Präsident vun Düütschen Bundsdag un na de Bundsdagswahl 1983 noch mol wedder to’n Viez wählt worrn. Dat Amt hett he bit to sien Utscheden ut’n Bundsdag an’n 20. Dezember 1990 utöövt.

In’n Tosamenhang mit den Schleyer-Roov 1977 hett Stücklen mit en Anmarken Acht op sik togen, as he segg, en doden Terrorist künn nich noch mol Deder warnn un ok nich freepresst warrn.^[1]

1979 bit 1983 weer he Vörsitter vun de Ünnerkommisschoon för den Huusholt, 1979/80 vun de Ünnerkommisschoon vun’t Gremium to’n Koordineeren vun de „Enquete-Kommisschoon Verfatensreform“ un 1980 bit 1987 vun de Bokommisschoon elk vun den Öllstenraat vun’n Bundsdag. Wiel sien Präsidentschop weer he ok Vörsitter vun’n Gemeensomen Utschuss vun Bundsdag un Bundsraat na Artikel 53a vun’t Grundgesett.

In sien Tiet as Bundsdags-Viezpräsident fallt dat beropene Zitat vun Joschka Fischer: „Mit Verlaub Herr Präsident, Sie sind ein Arschloch!“ Stücklen harr an’n 18. Oktober 1984 den Afordenten Jürgen Reents vun de Grönen utslaten, as de Helmut Kohl as „vun Flick freeköfft“ betekent hett. De gröne Afordente Christa Nickels hett dorophen den Andrag stellt, de Sitten to ünnerbreken. As Stücklen ehr dat Mikrofon afstellt hett, is Fischer de beropen Spröök utneiht, worophen ok he utslaten worrn is. An’n nächsten Dag hett Fischer den Satz wedder torüch nahmen.

Stücklen is jümmer as direkten Kandidaten in’n Bundsdag intogen. He hett toeerst den Wahlkreis Weißenburg vertreden un af 1976 den Wahlkreis Roth. Toletzt hett he bi de Bundsdagswahl 1987 in sien Wahlkreis 59,2 % vun de Eerststimmen kregen.

Apentliche Ämter

Na de Bundsdagswahl 1957 weer Stücklen an’n 29. Oktober 1957 as Bundsminister för dat Post- un Feernmellwesen in de vun Konrad Adenauer föhrte Bundsregeeren beropen un weer dormit de dormols jüngste Bundsminister. in disse Funkschoon weer he ok in de Kabinetten vertreden, de af 1963 vun Ludwig Erhard leidt worrn sünd. In sien Amtstiet is ünner annern de Inföhren vun de veerstelligen Postleddtallen fallen. Mit Billn vun de Groten Koalitschoon is Stücklen an’n 1. Dezember 1966 ut de Bundsregeeren utscheedt.

Ehrenämter

Stücklen weer 1977 bit 1979 Vörsitter vun de Düütschen Parlamentaarschen Sellschop

Utteken

Ehrenbörger vun de Stadt Weißenburg in Bayern
Ehrenliddmaat vun de K.D.St.V. Gothia to Erlangen in’n CV
1964: Grootkrüüz vun’n Verdeenstorden vun de Italieenschen Republiek
1966: Verdeenstnadel in Gold vun’n Bund vun de Düütschen Philatelisten (BDPh)
1980: Orden wider den tierischen Ernst
1981: Europääsch Karlspries vun de Sudetendüütschen Landsmannschop
1985: Krawattenmann vun’t Johr

Publikatschonen

Die Opposition in der modernen Demokratie, in: Rudolf K. Fr. Schnabel, Die Opposition in der modernen Demokratie, Stuttgart, 1972, Sieten 22 bit 30.
Parlamentarier der ersten Stunde, in: Friedrich Zimmermann, Anspruch und Leistung. Widmungen für Franz Josef Strauß, Stuttgart, 1980, Sieten 13 bit 31.
Das Parlament in unserer Mitte, in: Wirtschaftswoche, 1981, Heft 11, Siet 25.
Würde und Humor gehören zusammen, in: Rupert Schick, Der Bundestagspräsident. Amt, Funktion, Personen, 9. Oplaag, Stuttgart, 1987, Sieten 129 bit 133.
Am wichtigsten ist Glaubwürdigkeit, in: Sonja Schmid-Burgk, Ein Leben für die Politik? Briefe an jüngere Mitbürger, Freiburg, 1988, Sieten 140 bit 146.