Bundsministerium för Post un Telekommunikatschoon

Vun Wikipedia
Dat ehmolige Huus vun’t BMPT an’t Bonner Rhienöver (1954-1988), wat vundaag Sitt vun’n Bundsrekenshoff is.
De Neebo, de vun 1988 bit 1997 Sitt vun’t BMPT weer. Vundaag is dat de Sitt vun’t Ümweltministerium

Dat Bundsministerium för Post un Telekommunikatschoon is 1949 ünner de Beteken Bundsministerium för Saken vun’t Feernmellwesen inricht un an’n 1. April 1950 in Bundsministerium för dat Post- un Feernmellwesen ümnöömt worrn. In’t Johr 1989 kreeg dat denn noch mol’n annern Naam, vun wegen dat „Feernmellwesen“ ut de Mood weer un nu dör „Telekommunikatschoon“ uttuuscht worrn is.

As de Post un dat Feernmellwesen in private Hannen wesselt is, geev dat för dat Ministerium nich mehr so veel to doon. Dorüm is dat Ministerium mit Wirken vun’n 1. Januar 1998 oplöst worrn. De Opgaven, de dat Ministerium vörher harr güngen an dat Bundsministerium för Finanzen över un to’n Deel ok an de Bundsanstalt för Post un Telekommunikatschoon Düütsche Bundspost. Dat Ministerium is de böverste Instanz in’t Rebeet vun de Düütschen Bundspost wesen un stünn direkt över de Böverpostdirekschoon un de anner’n zentralen Behörden vun de Bundspost.

Bit to sien Oplösen hett dat Ministerium ok de Opsicht över de Bundsdruckeree hatt. De is denn ok an dat Finanzministerium gahn.