Ramshuus

Vun Wikipedia
Zur Navigation springen Zur Suche springen
Wapen/Flagg Koort
hett keen Wapen
Ramshuus
Laag vun Ramshuus in Düütschland
Basisdaten
Bundsland: Neddersassen
Landkreis: Rodenborg (Wümm)
Samtgemeen: Zittens
Gemeen: Vierden
Inwahners:
Hööchd: 31 m över de See
Postleettall: 27419
Vörwahl: 04169,04282
Geograafsche Laag:
Koordinaten:53° 20′ N, 9° 33′ O
53° 20′ N, 9° 33′ O

Huus in Ramshuus

Ramshuus (hoochdüütsch Ramshausen) is en lütten Oort un Deel vun de Gemeen Vierden (Samtgemeen Zittens) in’n neddersassischen Landkreis Rodenborg (Wümm). De Naam bedüüdt Huus an de Ramm, wat vun de Laag vun dat Dörp an den Beek Ramm afleddt is. In Ramshuus leevt ruchweg 100 Minschen.

Geografie[ännern | Bornkood ännern]

De Oort liggt an’n Rand vun de Gemeen Vierden, aver ok an’n Rand vun’n Landkreis Rodenborg an de L 130 twüschen Zittens un Sounsiek, wat denn al in’n Landkreis Stood liggt. Vun wegen disse Randlaag hett Ramshuus nich veel Mööglichkeiten, sik to vergröttern oder veel to ännern.

De meisten Hüüs staht an de L 130, sünd aver nich ganz gliekmatig verdeelt. En Ansammeln vun Hüüs gifft dat mehr na Zittens to, wo en lütte Straat na’t Dörp Vierden aftwiegt, de gröttere Deel liggt üm de Krüüzung rüm, woneem de K 121 na Woonst afgeiht. Op de annern Siet kummt man in dat Wekenendrebeet. Dat is en Ansammeln vun tomeist lüttere Hüüs, de veel in Besitt vun Lüüd ut de grötteren Städer as t. B. Hamborg sünd un faken ok blots an Wekenennen oder in’n Urlaub nütt warrt.

Ümgeven is Ramshuus veel vun Wischen mit en beten Ackerland. Fröher geev dat hier veel Bueree. Man dorvun is vundaag nich mehr veel över. Na’n Oosten hen grenzt Ramshuus an den Thörenwoold, de mit sien Wanner- un Radweeg en schöön Teel för en Spazeergang is un geern ok besocht warrt.

Historie[ännern | Bornkood ännern]

Ramshuus is 1393 to’n eersten mol op en Schriftstück nöömt worrn. Dat weer to de Tiet woll blots en enkelten Hoff, de sik an de Ramm daallaten harr. Disse „Hoff an de Ramm“ warrt vundaag Lühmanns Hoff nöömt. De Naam Lühmann weer mitbrocht, as de Hoff 1912 vun Johann Peter Klindworth köfft weer. Da is de eenzige Hoff, woneem ok hüüt noch en beten Bueree bedreven warrt. In fröhere Tieten is in den Oort ok Törf steken worrn. Dat is aver al lang her.

Gegenöver vun den hüütigen Lühmanns Hoff hett dat lang en Gastweertschap geven. Dor geev dat bit kort vör den Eersten Weltkrieg en Bördesteed för Wegtoll. Dor harr man 2 Gröschen to betahlen: een Gröschen för dat Föhrwark un een för den Sluck ut de Kömbuddel för de beiden Föhrknechten. To de Gaststeed keem later noch en Veehwaag dorto. Hüüt is dorut en Huus för veer Familien ut worrn.

Religion[ännern | Bornkood ännern]

Ramshuus is evangeelsch-luthersch präägt un höört to dat Kaspel von de Dionysius-Kark in Zittens.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kulturell Leven[ännern | Bornkood ännern]

In’n Oortskarn an de Krüüzung steiht aver ok vundaag noch de olle Sogeree. De un en Reetdachdeckeree sünd de eenzigen Bedrieven, de in Ramshuus to finnen sünd. In de Freetiet is man op dat Auto anwiest. Dat gifft in Ramshuus en Kegelvereen un dorbinnen ok en Männerdansgrupp, man en Kegelbahn gifft dat in den Oort sülvst nich.

To Oostern warrt vun de Jöögd en Oosterfüer utricht, dat mit en lütt Fest verbunnen warrt. Traditschoon is ok dat Fest, wat to Pingsten veranstalt warrt. Do maakt toeerst de Freewilligen Füerwehren vun ümto Wettkämpen watt denn mit Teltdisco, Kaffee un Koken, Fröhschoppen usw. afrunnt warrt. Dat Pingstfest warrt vun de Vierdener Füerwehr utricht.

Literatur[ännern | Bornkood ännern]

  • Hartmut Vollmer: Gemeinde Vierden. Aus der Geschichte der beiden Dörfer Vierden und Ippensen., Chronik (hoochdüütsch)

Weblenken[ännern | Bornkood ännern]

Commons-logo.svg Ramshuus. Mehr Biller, Videos oder Audiodateien to’t Thema gifft dat bi Wikimedia Commons.