Radiant (Astronomie)

Vun Wikipedia
Zur Navigation springen Zur Suche springen
Steernsnuppen ut een Meteorstroom. De Krink betekent den Radiant.

De Radiant betekent in de Astronomie den Oort an’n Himmel, vun den – ut de Sicht vun en Beobachter op den Planet – en Swarm vun Steernsnuppen utgeiht[1].

Bedüden[ännern | Bornkood ännern]

En Meteor (Steernsnupp) kann för den Beobachter ennerworrns an’n Himmel opduken. Man, wenn een de Bewegungsrichten vun mehrere Meteoren ut een Meteorschuer torüch verlängern deit, den sniedt de sik all in een Punkt, de as de Radiant betekent warrt. De Naam vun dissen Meteorstroom warrt vun dat Steernbild afleidt, in dat de Radiant liggt. De Perseiden hebbt to’n Bispeel jemehrn schienboren Utgangspunkt in dat Steernbild Perseus. Wenn een Meteor sik so bewegen deit, dat sien Bewegen nich op den Radiant torüch wiest, warrt de nich to den Meteorstroom torekent. Dat gifft aver ok Meteorströöm, bi de sik de Oort vun’n Radiant mit de Tiet ännert. To’n Bispeel kann sik de Radiant vun de Delta-Aurigiden in een Nacht üm mehr as een Grad verschuven[2].

Oorsaak[ännern | Bornkood ännern]

Steernsnuppen kamt tostannen dör Stoff un lütte Schören, de vun Kometen in de Neeg vun de Sünn utstött warrt un sik dorüm op jemehr Bahn verdeelt. Wenn sik de Eer dör so en Kometenbahn mit sien Schutt bewegen deit, künnt de Partikels un Schören in de Atmosphäär kamen, woneem se vergleiht. So kummt en Meteorstroom tostannen. De Partikels bewegt sik all ruchweg in de glieke Richt, so dat jemehr Sporen sik all wedder in den Utgangspunkt, den Radiant, drapen doot. Dat is de Richt, woneem de Kometenbahn liggt.

Beobachten[ännern | Bornkood ännern]

De Radiant speelt en Rull bi’t Beobachten. Wenn de Radiant an’n Horizont oder sogor dorünner liggen deit, künnt blots wenige Steernsnuppen beobacht warrn, vun wegen dat denn blots de Meteoren sichtbor sünd, de sik meist tangential to de Eerdböverflach bewegt.

För dat Oog vun’n Tokieker warrt de Meteorstroom in en Zentralprojekschoon wohrnahmen, so dat de an sik parallelen Bahnen vun de enkelten Meteoren as scheve Lienen utseht. Je wieter weg en Steernsnupp vun sien Radianten opduken deit, desto länger sütt sien Bahn an’n Himmel ut. Dat kummt dorvun, dat de Tokieker disse Bahn meist vun de Siet sütt, wiel de Meteoren dicht an’n Radiant sik meist direkt op em tobewegt.

Borns[ännern | Bornkood ännern]

  1. Earth Observatory Glossary: Radiant op NASA.gov (engelsch)
  2. Robert Lunsford: Meteors and How to Observe Them in: Astronomers’ Observing Guides, Springer Verlag, 2008, S. 86, ISBN 0387094601 [1] (engelsch)