Río Mezapa (Karibische See)
| Río Mezapa | ||
|---|---|---|
| Laag | Atlántida | |
| ||
| Stroomsystem | Karibische See | |
| Läng | 24 km | |
| Born | bi Paujiles | |
| Koordinaten Born: | 15° 36′ N, 87° 35′ W | |
| Münn | bi Toloa Adentro | |
| Koordinaten Münn: | Koordinaten:15° 40′ N, 87° 43′ W15° 40′ N, 87° 43′ W | |
| linke Blangenströöm | Quebrada Paujiles, Quebrada Metalias, Río Naranjo | |
| rechte Blangenströöm | Quebrada Arena Blanca, Quebrada de Piedras, Quebrada Las Borjas | |
De Río Mezapa is en Stroom in dat Municipio Tela von dat Departamento Atlántida, Honduras, de över’n Canal Martinez in de Karibische See münnt.
De Stroom hett sien Born in de Montaña el Tiburón sowat dree Kilometer in’n Oosten von dat Dörp Paujiles. Von dor flütt he na Noordwesten. De Anfang liggt bi knapp 800 Meter över de See, aver al na twee Kilometer kummt de Beek hier in dat Daal an op ünner 200 Meter över de See. De Río Mezapa löppt dör dat Dörp Paujiles, wo de Straat CA-13 mit en Brügg över em röverlöppt. Annerthalf Kilometer in’n Westen von Paujiles nimmt de Río Mezapa von links de Quebrada Paujiles op. Bi dat Dörp Planes de Arena Blanca dreiht de Stroom na Süüdwesten un nimmt von links de Quebrada Metalias op. An’n Foot von’n Cerro El Naranjo dreiht de Stroom wedder na Noordwesten un flütt dör den Oort Mezapa. Achter Mezapa nimmt he von rechts de Quebrada Arena Blanca op un kummt denn in dat siede Swemmland von dat Sula-Daal. He flütt an Los Laureles langs (de Oort liggt an’n Rand von de Montaña de Toloa) un nimmt von rechts de Quebrada de Piedras un de Quebrada Las Borjas op. Von links münnt de Río Naranjo. Bi Toloa Adentro drippt de Stroom op’n Río Guaymitas. Von hier af an flütt dat Water na Noorden över den Canal Martinez, de bet na de Karibische See reckt. De Kanaal is künstlich anleggt.
De ole Loop von’n Río Mezapa geiht wieder na Noordwesten na’n Río Ulúa. De Böverloop bet dorhen is üm un bi 24 Kilometer lang. Von dor bet na’n Río Ulúa sünd dat 11 Kilometer. Düsse 11 Kilometer sünd toglieks ok de Grenz twüschen dat Departamento Atlántida un dat Departamento Yoro, dat in’n Süüdwesten liggt. Bevör de Minsch ingrepen hett, weer de Stroom also so üm un bi 35 Kilometer lang. De Canal Martinez münnt in’n olen Loop von’n Río Tinto. Tohoop mit Río Tinto is he 29 Kilometer lang, ahn Río Tinto 25 Kilometer.