Río Cangrejal

Vun Wikipedia
Zur Navigation springen Zur Suche springen
Río Cangrejal
Laag Atlántida, Honduras
Río Cangrejal
Laag vun Río Cangrejal in Honduras
Stroomsystem Río Cangrejal
Läng 26 km
Born tohoopfleten von veer Strööm bi Jutiapa
Koordinaten Born: 15° 40′ N, 86° 41′ W
Münn in La Ceiba in de Karibische See (op 0 m över de See)
Koordinaten Münn:
Koordinaten:15° 48′ N, 86° 47′ W
15° 48′ N, 86° 47′ W
Rio cangrejo.JPG

De Río Cangrejal is en üm un bi 26 Kilometer langen Stroom in dat Departamento Atlántida, Honduras, de in de Karibische See münnt. Wenn siene Bornströöm mittellt warrt, denn is he länger (groff üm de 50 Kilometer).

De Stroom billt sik in de Cordillera de Nombre Dios twüschen de Öörd Jutiapa un Río Viejo. Dor fleet de veer Strööm Río Viejo, Río Blanco, Río Yaruca un Río del Padre tohoop. Río Viejo un Río Blanco kaamt von Süüdwesten un fleet tohoop un Río Yaruca un Río del Padre kaamt von Oosten/Süüdoosten un fleet tohoop.

Nadem de veer Strööm sik verbunnen hebbt, nehmt se den Naam Río Cangrejal an un fleet na Noordwesten. Von dor sünd dat noch 26 Kilometer bet na de Münn. De Stroom flütt dör en relativ eng Daal von de Cordillera de Nombre Dios. Dat gifft dor blots lüttjere Öörd so as Las Mangas un El Naranjo. An en lüttjen Beek, de von links in’n Río Cangrejal münnt, liggt de El-Bejuco-Waterfall. De Bargbeken (Quebradas), de von links un rechts in’n Río Cangrejal münnt, sünd dör de Engd von dat Daal man all blots en poor Kilometer kort. In düt Rebeed billt de Stroom ok de Butengrenz von’n Pico-Bonito-Natschonaalpark. Fiev Kilometer vör de Münn triddt de Stroom denn ut de Bargen rut. De Küstenebene warrt hier vondaag kumplett von de Stadt La Ceiba innahmen. Hier gaht de Straat CA-13 un de Boulevard del Este/Calle 22 mit Brüggen över’n Stroom röver. Toletzt münnt de Río Cangrejal in de Karibische See.

De Naam von’n Stroom kummt von dat spaansche Woord cangrejo, wat so veel as Krabb bedüden deit. Fröher hett dat an de Münn allerhand Krabben geven. Vondaag is dat aver nich mehr so, denn de Stadt La Ceiba sorgt dor för, dat de Stroom temlich versmuddelt is. De Stroom döggt in Delen von sien Loop för Rafting un Kajakfohren.

Weblenken[ännern | Bornkood ännern]

Commons-logo.svg Río Cangrejal. Mehr Biller, Videos oder Audiodateien to’t Thema gifft dat bi Wikimedia Commons.