Portal:Wikinews/Jörg Peters is de ne’e Perfesser för Nedderdüütsch an de Universität Ollnborg

5. Dezember 2007: 2005 hett Perfesser Dieter Stellmacher an de Universität Göttingen ophöört un is in Rohstand gahn. De Universität hett denn beslaten, den Studiengang Nedderdüütsch optogeven. Na Protest vun Plattsnackers harr dat Bundsland Neddersassen toseggt, dat se an en annere Universität den Studiengang wedder nee anbeden wull. Lang hett dat duert un dat Land Neddersassen keem nich to Pott. Eerst in’n September 2007 harrn se kund daan, dat se en ne’en Perfesser funnen harrn, den Studiengang Nedderdüütsch in Ollnborg wedder antobeden. Un vundaag hett de Universität ok offiziell den Perfesser vörstellt. Dat Fack Nedderdüütsch an de Universität Ollnborg schall Jörg Peters övernehmen. Peters harr betherto en Steed as Perfesser an de Radboud-Universität in Nijmegen. För den Lehrstohl hett dat Wetenschopsministerium ok Geld för en Steed för en Nawusswetenschopler un 180.000 Euro för en Linguistiklabor toseggt.