Portal:Wikinews/Nee Plattdüütsch-Perfesser in Ollnborg steiht fast

10. September 2007: Na dat, wat de Nordwest-Zeitung schrifft, steiht de ne’e Perfesser för Plattdüütsch an de Universität Ollnborg nu fast. Dat Wetenschopsministerium in Hannover hett de Zeitung vertellt, dat se een vun de dree Lüüd, de toletzt noch in de Utwahl weren, nu nahmen hebbt. Wenn de Kandidat denn ok tostimmt, so wüllt se em bet Enn September öffentlich vörstellen.

Achtergrund is, dat dat Land Neddersassen sien eenzigen Lehrstohl för Plattdüütsch an de Universität Göttingen 2005 dicht maakt harr. De Oppositschoon in’n Landdag un ok dat Institut för nedderdüütsche Spraak harrn sik denn dor för insett, dat Neddersassen Ersatz schaffen schull. Plattdüütsch an de Universität, dat is ok een vun de Saken, de Neddersassen mit de Europääsche Sprakencharta op sik nahmen hett. Neddersassen harr dat denn ok toseggt un se hebbt seggt, in Ollnborg schull dat een Studiengang Plattdüütsch geven. Kritik gifft dat aver ok, dat de dree Kandidaten all Mann kene würklichen Experten för Plattdüütsch sünd un dat de Lehrstohl ok keen reinen Plattdüütsch-Lehrstohl is. Dat is een för Soziolinguistik un Plattdüütsch is mehr Biwark.