Pjöngjang

Vun Wikipedia
Wesseln na: Navigatschoon, Söök
Laag von de Provinz Pjöngjang binnen Noordkorea
Satellitenbild von de Stadt
Stadtplaan von 1946

Pjöngjang (koreaansch 평양) is de Höövdstadt von Noordkorea. Se liggt an’t Över von’n Taedong. De Stadt sülvs mit ehre dunn 19 Stadtdelen harr an’n 1. Januar 2010 3.270.582 Inwahners, tohoop mit veer Kreise ümto de Stadt harr de Provinz Pjöngjang 4.138.187 Inwahners op en Rebeed von 2.653 km².

Geografie[ännern | Bornkood ännern]

Pjöngjang liggt in’n Noordwesten von de Koreaansche Halvinsel an’n Stroom Taedong op üm un bi 38 m över de See. De Ooldstadt liggt an’t rechte Över von’n Stroom, aver dat gifft ok en Neestadt an’t linke Över. Ok de Eilannen Rungna, Yanggak, Ssuk un Turu höört to de Stadt.

Historie[ännern | Bornkood ännern]

De Legenn seggt, dat de Stadt 2333 v. Chr. von Dangun Wanggeom grünnt worrn wesen schall. Dat eerste echte Tüügnis von en Vörlöper von dat hüdige Pjöngjang is aver en olen Text, dat de Chinesen 108 v. Chr. bi Pjöngjang en Hannelskolonie grünnt hebbt. 427 is Pjöngjang denn de Höövdstadt von dat Königriek Goguryeo worrn. 668 hebbt de Chinesen ehr wedder innahmen. 1135 hett Myo Cheong, König von Goryeo, de Stadt to sien twete Höövdstadt maakt.

Von 1592 bet 1593 hebbt de Japaners in de Stadt seten. 1627 kemen wedder de Chinesen un hebbt de Stadt dorbi ansteken.

In’n Eersten Japaansch-Chineeschen Krieg hett Pjöngjang swoor wat afkregen un weer to’n groten Deel in Schutt un ahn Inwahners. In de Tied von de Japaansche Herrschop in Korea von 1910 bet 1945 hebbt de Japaners Pjöngjang to en Industriestadt utboot. De Japaners hebbt de Stadt in disse Tied Heijō nöömt. In’n Koreakrieg von 1950 bet 1953 is de Stadt denn aver wedder utbummt worrn.

Religion[ännern | Bornkood ännern]

De Inwahners von Pjöngjang weren von öllers vör allen Buddhisten un Konfuzianer. In dat 19. un fröhe 20. Johrhunnert sünd aver ok veel Lüüd in Pjöngjang Christen worrn un dat hett mehr as 100 Karken in de Stadt geven. Nadem Noordkorea kommunistisch worrn is, hett de Regeren en Politik maakt, de den Atheismus föddert un vondaag hett de Mehrheit in Pjöngjang offiziell keen Religion.

Pjöngjang is Seet von en kathoolschen Bischop. Dat Bisdom Pjöngjang hett ehren Sitt in de Kathedraal von Jangchung.

Inwahnertall[ännern | Bornkood ännern]

Johr Inwahners
1906-00-00 1906[1] 43.000
1911-00-00 1911[1] 36.800
1920-00-00 1920[1] 58.600
1922-00-00 1922[1] 86.500
1924-00-00 1924[1] 102.700
1929-00-00 1929[1] 120.000
1932-00-00 1932[1] 144.200
1935-00-00 1935[1] 182.100
1938-00-00 1938[1] 234.700
1940-00-00 1940[1] 286.000
1944-00-00 1944[1] 388.000
1962-00-00 1962[1] 653.000
1965-00-00 1965[1] 800.000
1967-00-00 1967[1] 840.000
1970-00-00 1970[1] 940.000
1978-00-00 1978[1] 1.250.000
1981-00-00 1981[1] 1.283.000
1986-00-00 1986[1] 1.300.000
1993-00-00 1993[1] 2.354.898
2002-00-00 2002[1] 2.724.700

Politik[ännern | Bornkood ännern]

Ünnerafdelen[ännern | Bornkood ännern]

De Stadt Pjöngjang is indeelt in 18 Stadtdelen. Blangen de Stadt Pjöngjang sülvs höört to de Provinz Pjöngjang ok noch de Kreis Kangdong (강동군; 江東郡).

Bet 2010 hebbt ok noch de Stadtdeel Sŭngho-guyŏk un de dree Kreise Kangnam, Chunghwa un Sangwŏn to Pjöngjang höört, sünd denn aver Deel von de Provinz Noord-Hwanghae worrn.

Stadtfründschoppen[ännern | Bornkood ännern]

Pjöngjang hett Fründschopsverdrääg mit disse Städer:

Kultur[ännern | Bornkood ännern]

Wichtige Bowarken[ännern | Bornkood ännern]

De Juche-Toorn in Pjöngjang

Dat höögste Bowark in de Stadt is dat Ryugyong-Hotel mit 330 m. Annere Bowarken, de sik uttekent, sünd de Kumsusan-Pallast, de Triumphbagen, de Juche-Toorn un de Wedderverenigungsbagen.

Sport[ännern | Bornkood ännern]

Grote Stadien in Pjöngjang sünd dat Maidag-Stadium op Rungna, dat Kim-Il-sung-Stadion (in dat ok de Sportvereen Pjöngjang Stadt speelt), dat Moranbong-Stadion (Sportvereen Moranbong), dat Yanggakdo-Stadion, dat Seosan-Stadion un dat Ryugyong-Jong-Ju-Yong-Stadion. Annere Footballverenen sünd de Sportvereen Amrokgang un de Sportvereen Rimyongsu. För’n Iessport gifft dat de Iessporthall Pjöngjang.

Elk Johr in’n April gifft dat den Pjöngjang-Marathon.

Medien[ännern | Bornkood ännern]

In Pjöngjang sitt de Koreaansche Zentrale Narichtenagentur un dor kummt ok de Rodong Sinmun rut.

Ok en poor Bläder in frömme Spraken warrt in de Stadt rutgeven: The Pyongyang Times, Foreign Trade of the DPRK, Korea Today un The People's Democratic Republic of Korea.

Ok dat Koreaansche Zentralfeernsehn un de Koreaansche Zentralrundfunk sitt in de Höövdstadt. För dat Butenland sünd Voice of Korea un Radio Pjöngjang.

In’n Noorden von de Stadt liggt dat Gelänn von de Koreaanschen Filmstudios. Dat SEK-Studio maakt Animatschoonsfilms. All twee Johr warrt in de Stadt ok dat Internatschonaal Filmfestival Pjöngjang afhollen.

Theater[ännern | Bornkood ännern]

De Stadt hett twee Opernhüüs, dat Grote Opernhuus an de Sungni- un Yongwang-Straten un en tweet bi de Rungna-Brügg. Dat Moranbong-Theater is bi de Cholima-Statue.

Freetied[ännern | Bornkood ännern]

De Zoo Pjöngjang liggt in’n Noordoosten von de Stadt bi’n Taesong-Barg un wiest över 5000 Deerten ut 650 Oorden. Elk Johr in’n August bet Oktober gifft dat in’t Maidag-Stadion dat Arirang-Festival.

Eten un Drinken[ännern | Bornkood ännern]

Restaurants mit butenlandsch Eten gifft dat in Pjöngjang man kuum. Dat gifft vör allen koreaansche Köök un en poor Restaurants mit chineesch Eten. De wichtigsten Restaurants von de Stadt sünd dat Okryugwan un dat Chongryugwan.

Museums[ännern | Bornkood ännern]

Dat wichtigste Museum in Pjöngjang is dat Histoorsche Museum. De Koreaansche Kunstgalleree steiht güntsied de Straat. Annere Museums sünd dat Museum von dat Grünnen von de Partei, dat Museum för Volkskunn. An’t Över von’n Taedong is dat US-amerikaansche Schipp USS Pueblo utstellt, dat de noordkoreaansche Marine 1968 fangen nahmen harr.

Infrastruktur[ännern | Bornkood ännern]

Verkehr[ännern | Bornkood ännern]

Pjöngjang hett en Haven an’n Taedong, in den Scheep bet 2000 Tunnen anleggen köönt. An Brüggen över den Stroom gifft dat de Chungsong-Brügg, de Yanggak-Brügg, de Taedong-Brügg, de Okryu-Brügg, de Rungna-Brügg un de Chongnyu-Brügg. Dat Trolleybus-System von Pjöngjang hett den Bedriev an’n 30. April 1962 anfungen.

De eerste Stratenbahn in Pjöngjang hett an’n 20. Mai 1923 föhrt. 1933 weer dat Stratenbahnnett 14 Kilometer lang. In’n Koreakrieg hett dat mit de Stratenbahn denn aver wedder ophöört. Von’n 15. April 1991 af an hett dat denn aver wedder en Stratenbahn in Pjöngjang geven. De U-Bahn Pjöngjang hett an’n 6. September 1973 apenmaakt.

De Höövdbahnhoff Pjöngjang verbinnt de Stadt över de Pyongbu-Lien mit Kaesong, över de Pyongui-Lien mit Sinuiju (un wieder na China) un över de Pyongnam-Lien mit Nampo.

De wichtigste Flegerhaven is de Flegerhaven Sunan.

Scholen[ännern | Bornkood ännern]

De Grote Studienhall von dat Volk

Dat gifft en Reeg Universitäten in Pjöngjang. De gröttste is de Kim-Il-sung-Universität. Wichtig is ok dat Polytechnische Institut Kim Chaek. Ans gifft dat de Universität för Inschenöörswetenschoppen, de Universität för Musik un Dans, de Universität för Film- un Theaterkunst, de Kim-Choi-ju-Universität, de Kim-Hyong-jik-Universität, de Kim-Ir-sen-Universität, de Samhung-Universität, de Iesenbahn-Universität, de Universität för Lichtindustrie, de Universität för Natschonalökonomie, de Universität för Butenpolitik un de Sportuniversität. De wichtigste Bibliotheek von Noordkorea is de Grote Studienhall von dat Volk.

För butenlandsche Kinner hett Pjöngjang en extra Grundschool, de Frömmenschool Pjöngjang.

Weertschop[ännern | Bornkood ännern]

Pjöngjang is de Sitt von de wichtigsten Ünnernehmen in Noordkorea. Dorto höört ünner annern Mansudae Overseas Projects, Korea Iesenmetall Export & Import, de Korea Zink-Industriegrupp, Korea Maschinenhannel, Korea Chemikalienhannel un Korea Ponghwa.

Footnoten[ännern | Bornkood ännern]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 1,19
  2. First China-DPRK sister cities meeting held in Pyongyang, People's Daily Online, 12. Mai 2009 (engelsch)

Weblenken[ännern | Bornkood ännern]

Commons-logo.svg Pjöngjang. Mehr Biller, Videos oder Audiodateien to’t Thema gifft dat bi Wikimedia Commons.



Koordinaten:39° 2′ N, 125° 44′ O