Ryugyong-Hotel

Dat Ryugyong-Hotel (koreaansch 류경호텔) is en 330 Meter hooch Hoochhuus in Pjöngjang, dat mal en Hotel warrn schull, nu aver al siet 1992 as Rohbo leddig steiht.

Dat liggt in de Naverschop Sojang in’n Stadtdeel Potonggang vun Pjöngjang. De Naam Ryugyong kummt vun een vun de olen Naams vun de Stadt Pjöngjang.

1987 harr de Firma Baikdoosan Architects & Engineers anfungen, dat Hoochhuus to boon. Dat schull ganz ut Stahlbeton boot warrn, 330 Meter hooch wesen un 105 Stock hebben. Alltohoop schullen dat 360.000 m² warrn. Noordkorea hett ok för Investoren ut dat Utland worven, de 230 Millionen US-Dollar to de Bokosten bistüern schullen. Dat Bowark hett twee grote Flögels, de so bi 100 Meter vun dat Zentrum rutloopt un 18 Meter breed sünd. Se loopt na baven spitz tohoop, de Sieden steigt mit en Winkel vun 75°. An de Spitz gifft dat acht Stockwarken, de sik dreihn schöölt un dor över noch wedder söss Stockwarken, de sik nich mitdreiht. Disse Spitz is an dat Ünnerenn so bi 40 Meter breed. Ganz baven op de Spitz steiht siet den Bostopp 1992 noch jümmer en Bokraan. Rund üm dat Bowark gifft dat en Reeg Goorns, Pavillions un Terrassen.

Dat Hotel mit siene 3000 Kamers schull egentlich na Plaan to de Weltfestspelen vun de jungen Lüüd un Studenten 1989 trech warrn. Bet 1992 stünn aver eerst de Rohbo un siet 1992 hett sik dor nix mehr an daan. Noordkorea hett nix offiziell seggt, worüm se ophöört hebbt, dat Hotel wiedertoboon. Medien in’n Westen gaht dor vun ut, dat nich noog Geld dor weer, dat se nich noog Bomaterial oder nich good noog Bomaterial harrn oder dat villicht ok de Grund nich fast is, op den dat Hotel steiht.

Op Biller vun Pjöngjang warrt vun de offiziellen Stellen vun Noordkorea faken per Bildverarbeitung Licht in dat Hotel rinmaalt, dat de Ruin nich so verlaten utsüht. De Ruin, de vun överall in Pjöngjang good to sehn is, warrt in’n Westen faken as groot Symbol vun de Dwarsheit in Noordkorea un den groten Gegensatz vun dat Egenbild vun de Offiziellen un de Würklichkeit ankeken.

Na Berichten schall de Orascom Group ut Ägypten in’n April 2008 anfungen hebben, wedder an dat Hotel to boon. Ünner annern hebbt se Mobilfunk-Antennen op de Spitz opstellt un welk Finster inboot. Wat dat för dat Bowark bedüüdt, is aver nich rut.