Otto Schäfer (CDU)

Otto Schäfer (* 26. März 1912 in Berlin; † 14. Februar 1973 in Bookholt) weer en düütschen Politiker von de CDU.

Schäfer is 1912 in Berlin boren. Na de Oberrealschool güng he as Beroopssoldaat na de Riekswehr. He is in’n Tweten Weltkrieg swoor verwunnt un in’n Wehrersatzdeenst versett worrn. He weer denn bi dat Wehrbezirkskommando Hirschberg in’t Riesengebirge. Na’n Krieg keem he na Töst un weer dor von 1947 bet 1955 in’n öffentlichen Deenst. Von 1956 af an weer he Versekerungskoopmann. 1956 is he ok Raadsherr in’n Raad von Töst worrn un weer von 1956 bet 1964 in’n Kreisdag von’n Landkreis Horborg.

1960 is he in de CDU ringahn. Von 1967 bet 1973 weer Schäfer Vörsitter von’n Kreisverband Horborg von de CDU.

Von’n 15. April 1971 bet 14. November 1972 weer he de eerste Börgermeester von de Samtgemeen Töst. Sien Nafolger weer Kurt Bellmann. He is 1968 as Nafolger von Philipp Helbach Landraad von’n Landkreis Horborg worrn. Schäfer is 1973 in’t Amt doodbleven, sien Nafolger weer denn Otto Gellersen.

In de 7. Wahlperiood weer he von’n 21. Juni 1970 bet to sien Dood an’n 14. Februar 1973 as direkt wählt Afornten för den Wahlkreis Winsen Maat von’n Landdag von Neddersassen.