Otto Gellersen

Vun Wikipedia
Zur Navigation springen Zur Suche springen

Otto Gellersen (* 29. Januar 1925 in Gö’nstörp; † 3. Juli 2012 in Solzhusen) weer en düütschen Politiker von de CDU.

Gellersen is 1925 in Gö’nstörp boren. Na de Volksschool in Solzhusen füng he en Lehr as Maler an. Na de Lehr weer he op de private Hannelsschool in Horborg. In’n Tweten Weltkrieg müss he as Soldaat Deenst doon. Von 1947 bet 1949 weer he op de Meesterschool för Malers in Hamborg un hett dor de Meesterprüfung bestahn. 1952 hett he den Malereebedriev von sien Vader övernahmen.

Gellersen is 1962 in de CDU ringahn. Bet 1979 weer he Vörsitter von’n Kreissportbund. He weer ok Maat von’n Verbandsutschuss Zweckverband Stood, bi dat Överlandwark Noord-Hannover un tweten Vörsitter von de Genossenschaft Krankenpleegvereen in Solzhusen.

Von 1961 bet 1972 weer Gellersen Raadsherr in de Gemeen Solzhusen. Ganz to Anfang för de Wählergemeenschop, denn för de CDU. Dor is he 1966 to’n Börgermeester wählt worrn. Von 1972, gleiks as se grünnt worrn is, bet 1986 weer he Raadsherr un Börgermeester von de Samtgemeen Solzhusen. 1964 is he ok noch Kreisdagsafornten worrn, wat he bet 1996 weer. Nadem Otto Schäfer 1973 doodbleven is, hett Gellersen von em dat Amt as Landraad von’n Landkreis Horborg övernahmen. Dat is he bet 1996 bleven, as em Jens-Rainer Ahrens aflööst hett.

Gellersen weer in de achte bet ölvente Wahlperiood (von’n 21. Juni 1974 bet 20. Juni 1990) as direkt wählten Afornten för den Wahlkreis Winsen Maat von’n Landdag von Neddersassen.

He hett 1985 dat Verdeenstkrüüz an’t Band un 1995 dat Verdeenstkrüüz 1. Klass von’n Verdeenstorden von de Bundsrepublik Düütschland kregen.

He hett an’n 20. Mai 1953 siene Fro Elisabeth freet. De beiden harrn twee Söhns.